သျှမ်းပြည်မြောက်ပိုင်း လားရှိုးမြို့ရှိ ကျောင်းသားတစ်ဦးသည် ယနေ့ (စက်တင်ဘာ ၄) ရက် နံနက် (၇) နာရီဝန်းကျင်၌ ကျောင်းသို့ သွားနေစဉ် ဆိုင်ကယ် လုယက် ခံရကြောင်း စုံစမ်းသိရှိရသည်။
ဖြစ်စဥ်မှာ ကျောင်းသားတစ်ဦးသည် ယနေ့ နံနက် (၇) နာရီဝန်းကျင်၌ ကျောင်းသို့ သွားနေစဥ် လားရှိုးမြို့ ရပ်ကွက် (၅) အရောက်တွင် အမည်မသိ လူလတ်ပိုင်း (၂) ဦးက ဆိုင်ကယ်တစ်စီးဖြင့် ကပ်မောင်းလာပြီး ကျောင်းသားကို ဓားထောက်ခြိမ်းခြောက်ကာ ဆိုင်ကယ်လုယူသွားကြောင်း သိရသည်။
“အခုနောက်ပိုင်း ဆိုင်ကယ်တွေ လုယက်ခံရတာ အများဆုံးပဲ။ အိမ်နဲ့ကျောင်း လမ်းသွားလမ်းလာတွေ မှာ မိဘတွေက ဒီထက်ပိုပြီး ဂရုစိုက်ပေးဖို့လိုတယ်” ဟု လားရှိုးမြို့ ပရဟိတ အသင်းထံမှ တာဝန်ရှိသူတစ်ဦး ကပြောသည်။
အလားတူ ပြီးခဲ့သည့် ၂ ပတ်တွင် လားရှိုးမြို့ အထွက် တန့်ယန်းလမ်းခွဲအကျော်ရှိ ဓာတ်တိုင်တွင် ဝါယာကြိုးခိုးယူနေသည့် အမျိုးသားတစ်ဦးလည်း ဓာတ်လိုက်ပြီး ပွဲချင်းပြီး သေဆုံးသွားကြောင်း သိရသည်။
ထို့အပြင် လားရှိုးမြို့တွင် သူခိုး၊ ဓားပြ များပြားလာသဖြင့် ပြည်သူများ၏ ဆိုင်ကယ်များ၊ ပစ္စည်းများကို ဘယ်ချိန်မှာ လုယက်မည်ကို မသိထားသောကြောင့် ဒီထက်ပိုပြီး သတိထားရန်အတွက် လိုအပ်ကြောင်း လားရှိုးမြို့ အသက် (၃၀) ကျော် ဒေသခံ အမျိုးသားတစ်ဦးက ပြောသည်။
“သူခိုးက ဘယ်ချိန်မှာ ခိုးမယ်ဆိုတာ မသိဘူး။ သူတို့ကတော့ ခိုးဖို့ချောင်းနေရမှာပဲ။ အဖွဲ့အစည်းကို အားကိုးလို့ လည်းမရဘူး။ ရဲတပ်ဖွဲ့ကိုလည်း အားကိုးလို့လည်းမရဘူး။ ကိုယ့်ပစ္စည်းတွေ ကိုယ့်ဟာကိုယ် စောင့်ရှောက်ဖို့ ပဲလိုတော့တယ်။ ပြီးတော့ လမ်းသွားလမ်းလာမှာလည်း အထူးဂရုစိုက်ဖို့ လိုအပ်ပါတယ် “ ဟု ၎င်းက အမျိုးသား တစ်ဦးကပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်း သျှမ်းပြည်အပါအဝင် မြန်မာနိုင်ငံတစ်ဝှမ်းလုံး၌ တရားဥပဒေ စိုးမိုးမှု နည်းပါးလာသည့်အပြင် ဒေသအတွင်း အုပ်စုဖွဲ့ ခိုးယူလုယက်မှုများနှင့် ခြိမ်းခြောက်သတ်ဖြတ်မှုများက တစ်နေ့တစ်ခြား များပြားလာကြောင်း သတင်းသိရသည်။
Leave a Comments