Saturday, December 3, 2022

မြန်မာငွေဈေးနှုန်းကျဆင်း ကုန်ဈေးနှုန်းမြင့်တက်လာ ဆိုင်တစ်ချို့ပိတ်သိမ်းရ

Must read

လက်ရှိ မြန်မာငွေဈေးနှုန်းအလွန်ကျဆင်းလာသဖြင့် ပြည်တွင်း ကုန်ဈေးနှုန်း မြင့်တက်လာပြီး သျှမ်းပြည်အတွင်းရှိ ဆိုင်တစ်ချို့က ပိတ်သိမ်းလိုက်ရကြောင်း စုံစမ်းသိရှိရသည်။

ယခု ရက်ပိုင်းတွင် ထိုင်းငွေ ၁၂၀၀ ဘတ်ကို မြန်မာငွေ ၁ သိန်းကျပ်ရနေပြီး၊ တရုတ်ငွေ ယွမ် ၁၀၀ ကို မြန်မာငွေ ၄၅,၀၀၀ ထိဈေးပေါက်နေပြီး ပြည်တွင်းက ကုန်ဈေးနှုန်း မတည်ငြိမ်သဖြင့် ဆိုင်များပိတ်သိမ်းခဲ့ရကြောင်း သျှမ်းပြည်တောင်ပိုင်း လဲချားမြို့ ကုန်ဆုံဆိုင်ပိုင်ရှင်တစ်ဦးက ပြောသည်။

“ရောင်းရင်လည်း မမြတ်ဘူးလေ။ အမြတ်ထဲကတောင် ပြန်စိုက်ထုတ်ပြီးရောင်းနေရတာ။ အရင်လည်း ပြုတ်တယ်လေ။ အဲ့ကြောင့်မလို့ ပိတ်ထားလိုက်တာ။ ငွေဈေးတည်ငြိမ်မှပဲ ပြန်ဖွင့်တော့မယ်” ဟု ၎င်းက ပြောသည်။

အလားတူ ကုန်စုံကြီးများလည်း ကုန်ပစ္စည်းတွေကို အများကြီး မတင်ထားရဲတော့ပဲ နေ့စဉ် စားသောက်ကုန်များကိုသာ တင်ပြီး ရောင်းချနေရကြောင်းသိရသည်။

လဲချားမြို့

“ကျမတို့လည်း ကုန်ပစ္စည်းတွေကို အများကြီးမတင်ရောင်းထားတော့ဘူး။ နေ့တိုင်းရောင်းရတာပဲတင်ရောင်းတော့တယ်။ ဆန်၊ ဆီ၊ ဆားတွေပဲ တင်ထားတော့တယ်။ တစ်ချို့ကုန်တွေဆို သိပ်မတင်ရောင်းတော့ဘူး။ ဆန်တွေကိုတောင် အများကြီးမတင်ထားဘူး” ဟု တာချီလိတ်မြို့ ကုန်သည်ဆိုင်ကြီး တစ်ဦးက ပြောသည်။

ထိုအပြင် လက်ရှိ ကုန်သည်များသည်လည်း ရောင်းဝယ်ရေးအတွက် ခက်ခဲနေပြီး နေ့စဉ်အလိုက် ကုန်ပစ္စည်းကို ဈေးမြင့်တင်ပြီးရောင်းချနေရကြောင်း အဆိုပါ တာချီလိတ်ကုန်သည်ကြီးက ထပ်လောင်းပြောသည်။

ထိုသို့ ဈေးမြင့်တင် ရောင်းချတာကြောင့် ဝယ်ယူသုံးစွဲသူများအနေဖြင့်လည်း ချင့်ချိန်ပြီး ဈေးဝယ်သုံးစွဲနေရကြောင်း ကုန်ဈေးနှုန်းမြင့်တက်လာတာကြောင့် တစ်ရက်သာ လုပ်အားခနှင့်လည်း ကုန်ဈေးနှုန်းဝယ်ယူမှု မကိုက်ညီကြောင်း ကျောက်မဲမြို့ ဒေသခံ အမျိုးသမီးက ပြောသည်။

“ကျမတို့က နေ့စားခ လိုက်တာလေ။ တစ်ရက်ဆို အများဆုံး ၅ ထောင်ပဲရတာ။ တစ်ချို့ရက် ကုန်ဈေးနှုန်းမြင့်တက်လာတော့ ကျမတို့ဝယ်ယူဖို့က ခက်လာတယ်။ တစ်ချို့ရက်ဆို ကိုယ့်ရဲ့ လုပ်အားခနဲ့တောင် မတန်ဘူး။ မစားတော့လည်း မရတော့ ဝယ်နေရတယ်။ ပိုက်ဆံတွေလည်း မစုမိနိုင်တော့ဘူး” ဟု ကျောက်မဲမြို့ အမျိုးသမီးတစ်ဦးက ပြောသည်။

ယခင်က ထိုင်း- မြန်မာ ငွေလဲလှယ်မှုနှုန်း မြန်မာကျပ်ငွေ ၁ သိန်းကို ထိုင်းဘတ်ငွေ ၂၂၅၀ ရရှိပြီး လက်ရှိမှာ မြန်မာငွေ ၁ သိန်းကို ထိုင်းဘတ်ငွေ ၁၀၀၀ ဝန်းကျင်သာရရှိတော့ကြောင်းသိရသည်။
လက်ရှိမှာလည်း ပြည်သူတွေစားဝတ်နေရေး ယခင်ကထက် ပိုခက်ခဲလာနေကြောင်းသိရသည်။

Leave a Comments

- Advertisement -spot_img

Latest article