သျှမ်းပြည်တောင်ပိုင်း နမ့်စန်မြို့ အခြေစိုက် စစ်ကောင်စီ လေတပ်စခန်းမှ တပ်ကြပ်အရာရှိတစ်ဦးသည် နေအိမ်၌ အဆိပ်သောက်ကာ သေကြောင်းကြံခဲ့ကြောင်း သတင်းသိရသည်။
သြဂုတ်လ ၃၁ ရက်နေ့ ညနေ ၃ နာရီ ဝန်းကျင်တွင် ဖြစ်စဥ်ဖြစ်ပွားခဲ့ခြင်းဖြစ်ပြီး ပြင်းထန်သော ဝေဒနာဖြင့် နမ့်စန်ဆေးရုံသို့ ပို့ဆောင်ပေးစဥ် လက်မခံသဖြင့် အောင်ပန်းမြို့ရှိ ကုတင် ၇၀၀ စစ်ဆေးရုံသို့ ပို့ဆောင်လိုက်ရကြောင်း တပ်နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“အဆိပ်သောက်ပြီး သွေးတွေအန်လာလို့ သူ့ယောက္ခမက တွေ့လိုက်တာ၊ နမ့်စန်ဆေးရုံကိုပို့လိုက်တော့ လက်မခံဘူး၊ အဲ့ကြောင့် အောင်ပန်းက ကုတင် ၇၀၀ ကို ပို့လိုက်တယ်၊ ၄ နာရီဝန်းကျင်မှာ အောင်ပန်းက ဆေးရုံမှာပဲ သေဆုံးသွားတယ်” ဟု တပ်နှင့် နီးစပ်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
သေဆုံးသူ တပ်ကြပ်အရာရှိသည် ချမ်းငြိမ်း နာမည်ဖြစ်ပြီး အသက် ၃၂ နှစ်ရှိ လက်ရှိတွင် ၉ လအရွယ် သမီးလေး နှင့် ဇနီးဖြစ်သူ ကျန်ရစ်ခဲ့ကြောင်း သတင်းသိရသည်။
