သျှမ်းပြည်တောင်ပိုင်း မိုးနဲမြို့နယ် မှ လူငယ် (၂)ဦးကို လူတစ်စုက အကြောင်းမဲ့ဝိုင်းရိုက်နှက်ခဲ့ပြီး ဒဏ်ရာပြင်းထန်ခဲ့ပြီး လက်ရှိအချိန်ထိ ကျူးလွန်ခံရသူများကို အရေးယူမှုမရှိသေးကြောင်း စုံစမ်းသိရသည်။
ဖြစ်စဉ်မှာ ဇူလိုင် ၁၂ ရက်နေ့ (ဝါဝင်ရက်) တွင် လူငယ် (၂) ဦးသည် ဘုန်းကြီးကျောင်းသို့အလှူသွားလုပ်စဉ် လမ်းတစ်ဝက်၌ လူ (၈) ဦးက သံလက်တီး၊ တုတ်တို့ဖြင့် ရိုက်နှက်ပြီးထွက်ပြေးသွားခဲ့သည်။
ထိုသို့ ရိုက်နှက်ခံခဲ့ရသူ လူငယ်တစ်ဦးသည် ဒဏ်ရာပြင်းထန်ကာ ဆေးရုံသို့ဆေးသွားကုသခဲ့ရကြောင်း၊ လက်ရှိအချိန်ထိ ကျူးလွန်ခဲ့သည့် သူများကို အရေးယူပေးခြင်းမရှိသေးကြောင်း လူငယ်(၂)ဦး၏ ဆွေမျိုးများက ပြောကြားသည်။
“ အဲနေ့ကလူငယ် (၂) ယောက်က ဘုန်းကြီးကျောင်းအလှူသွားလုပ်တာ။ လမ်းတစ်ဝက်မှာ သူတို့နဲ့လည်းမသိတဲ့ လူတစ်စုက ဝိုင်းလာရိုက်တာတဲ့။ (၈) ယောက်က လူ (၂) ယောက်ကို ဝိုင်းရိုက်တာ။ သူတို့ရိုက်တာ သံလက်တီးတွေကောပါတယ်။ ဟိုနှစ်ယောက်ကတော့ ဆေးရုံတက်လိုက်ရတယ်” ဟု ရိုက်ခံရသည့် လူငယ် (၂) ဦး၏ ဆွေမျိုးဖြစ်သူ အမျိုးသား က ပြောသည်။
ရိုက်ခံရသည့်လူငယ် ၂ ဦးသည် စိုင်းဟတ်ခေး (၂၇) နှစ် နှင့် စိုင်းလတ် အသက် (၂၇) ရှိနေပြီးဖြစ်ကြသည်။
၎င်းတို့ရိုက်ခံရချိန်တွင် ရဲတွေရောက်ရှိလာခဲ့သော်လည်း ဖမ်းဆီးသွားခြင်းမရှိဘဲ လက်ရှိအချိန်ထိလည်း အရေးယူမှုမရှိသေးပေ။
ထိုရိုက်ခံရသည့် လူငယ် (၂) ဦးသည် ဒဏ်ရာပြင်းထန်ခဲ့ပြီး ဆေးရုံသို့ (၅) ရက်ဆေးကုခဲ့ရကြောင်းသိရသည်။
“ ရိုက်ခံရတဲ့သူကတော့ ဆေးရုံ (၅) ရက်လောက်တက်ရတယ်။ တစ်ယောက်ကတော့ မျက်ရိုးနဲ့ ပါးစပ်ချုပ်လိုက်ရတယ်။ ကျန်တစ်ယောက်တော့ ရိုးရိုးဒဏ်ရာရခဲ့တာ။ သူတို့ရိုက်ခံရတဲ့ချိန် ရဲတွေရောက်လာလည်း အရေးယူတာဖမ်းတာမရှိဘူး။ အခုထိလည်း ဘာမှအရေးယူပေးတာမျိုးမရှိဘူး။ တရားစွဲထားလည်း အခြေနေက မတက်လာဘူး။ အလုပ်မလုပ်ကြဘူး” ဟု အထက်ပါ အမျိုးသားက ပြောသည်။
အဆိုပါ (၈) ဦးသည် ယခင်ကလည်း တစ်ခြားလူငယ်အဖွဲ့ကို သွားရိုက်ဖူးခဲ့ကြောင်းသိရသည်။
ထိုသို့ ရိုက်ခံရသောကြောင့် တရားမျှတမှုကို ဖော်ထုတ်ပေးရန် နှင့် ဥပဒေ အရ အရေးယူသင့်ကြောင်း ရိုက်ခံရသည့် လူငယ်က ပြောသည်။
“ ကျနော်တို့တော့ တရားမျှတမှုလိုချင်တယ်။ ဥပဒေ အရအရေးယူခိုင်းစေချင်တယ်။ အခုက ဒီလိုမျိုး အရေးယူ ပေးတာမရှိဘူး။ အခုချိန်ထိ ဖမ်းဆီးတာမျိုးလည်းမရှိသေးဘူး” ဟု ရိုက်ခံရသည့် လူငယ် တစ်ဦးက ပြောသည်။
လက်ရှိရိုက်ခဲ့သည့် လူ (၈) ဦးသည် ၂ ဦးသာ ရဲက ခေါ်ယူထားပြီး ကျန်ရှိသည့် ၆ ယောက်ကို အရေးယူဆောင်ရွက်မှု မရှိသေးပေ။
အလားတူ ပြီးခဲ့သည့် ဇူလိုင် ၁၅ ရက်နေ့လည်း လဲချားမြို့ ရပ်ကွက် (၇) ကျွဲကျောင်းသားတစ်ဦးကို လူငယ်တွေက ဝိုင်းရိုက်ခဲ့မှုဖြစ်ပွားခဲ့ကြောင်းသိရသည်။
