သျှမ်းပြည် မိုးနဲမြို့ ဥယျာဉ်ရပ်ကွက်တွင် နေထိုင်သော အမျိုးသမီးငယ်တစ်ဦးသည် ချစ်သူများနေ့ (ဖေဖော်ဝါရီ ၁၄ ရက်)၌ သွားလည်နေစဉ် အသတ်ခံရလိုက်ကြောင်း ဒေသခံများထံမှ စုံစမ်းသိရသည်။
အဆိုပါ အမျိုးသမီးငယ်၏ ရုပ်အလောင်းကို (ဖေဖော်ဝါရီလ ၁၅ ရက်) နံနက် ၁၀ နာရီဝန်းကျင်တွင် နမ့်စန်မြို့နယ် လွိုင်ဆိုင်းရွာအဝင်ရှိ ဝက်သားဆိုင်အနီး၌ ပြန်လည်တွေ့ရှိခဲ့ကြောင်း ၎င်းနှင့်နီစပ်သူတစ်ဦးက သျှမ်းသံတော်ဆင့်ကို ပြောသည်။
မိုးနဲမြို့နှင့် နမ့်စန်မြို့သည် မိုင်ပေါင်း ၃၀ သာ ကာဝေးသည်။
“ပြီးခဲ့တဲ့ ချစ်သူများနေ့တုန်းက သွားလည်ရင်းအသတ်ခံရတာ။ ဦးခေါင်မှာလည်း ရိုက်နှက်ထားတဲ့ ဒဏ်ရာတွေကော၊ ခြေတွေ၊ လက်တွေကော ကျိုးထားတယ်။ သူ့မှာပါသွားတဲ့ ဆွဲကြိုး၊ လက်စွပ်တွေကော အကုန်ပါသွားတယ်” ဟု ၎င်းက ပြောသည်။
အသတ်ခံရသော အမျိုးသမီးတစ်ဦးသည် အသက် ၁၈ နှစ်အရွယ်ရှိ နန်းဆိုင်အွန် ဖြစ်ပြီး မိုးနဲတွင် ကျောင်းတက်နေသေးကြောင်း သိရသည်။
သို့သော် အသတ်ခံရသည်ဆိုသည့် ပြောကြားချက်နှင့်ပတ်သက်၍ သျှမ်းသံတော်ဆင့်မှ သီခြားအတည်ပြုနိုင်ခြင်း မရှိသေးပေ။
ဖြစ်စဉ်မှာ (ဖေဖော်ဝါရီလ ၁၄ ရက်) ညနေပိုင်း ၅ နာရီခန့်က နန်းဆိုင်အွန်သည် ၎င်း၏သူငယ်ချင်း မိန်းကလေးတစ်ဦးနှင့်အတူ သွားလည်ရန် အိမ်မှထွက်သွားခဲ့ကြောင်း ၎င်းနှင့်နီးစပ်သည့် သူငယ်ချင်းများက ပြောသည်။
သို့သော် ထိုညတွင် ၎င်း၏သူငယ်ချင်းမိန်းကလေးတစ်ဦးနှင့်အတူ ချက်ချင်းပြန်လာခြင်းမရှိဘဲ မိုးနဲမြို့ရှိ ဆီပန့်ဆိုင်တွင် လာကြိုသော ယောက်ျားလေးသူငယ်ချင်းများနှင့်အတူ ထပ်မံလိုက်သွားခဲ့ကြောင်း ဆိုသည်။
ထိုသို့ လိုက်သွားပြီးနောက် (ဖေဖော်ဝါရီလ ၁၅ ရက်) နံနက်ပိုင်း ၁၀ နာရီဝန်းကျင်တွင် နန်းဆိုင်အွန်ကို သေဆုံးနေလျက် အလောင်းကိုသာ ပြန်လည်တွေ့ရှိခဲ့ခြင်း ဖြစ်ကြောင်း ဒေသခံများကပြောသည်။
“ပြီးခဲ့တဲ့ရက်တုန်းက သူ့သူငယ်ချင်းလာခေါ်လို့ လိုက်သွားတာ။ သွားလည်ပြီးတော့ သူ့ငယ်ချင်းက အိမ်ပြန်ဖို့ပြောတာ။ သူက အိမ်မပြန်ဘဲ သူ့ကိုဆီပန့်မှာ သွားပို့ပေးဖို့ပြောတာ။ အဲ့မှာ crown ကားအဖြူရောင် တစ်စီးက လာကြိုပြီး လိုက်သွားတာ။ အဲ့ကားထဲမှာလည်း ယောက်ျားလေးတွေ တော်တော်များပါတယ်။ လိုက်သွားပြီးနောက်ပိုင်း အခုလိုဖြစ်သွားတာပဲ” ဟု မိုးနဲမြို့ခံတစ်ဦးက ပြောသည်။
လက်ရှိတွင် ၎င်း၏သူငယ်ချင်း မိန်းကလေးတစ်ဦးကို စစ်ဆေးမေးမြန်းရန်အတွက် မိုးနဲမြို့ ရဲတပ်ဖွဲ့က ဖမ်းဆီး ခေါ်ဆောင်သွားကြောင်း သိရသည်။
သို့သော် သံသယရှိသူ အဆိုပါ ကား (crown အဖြူရောင်)တွင် လိုက်ပါလာသူများအား လိုက်လံဖမ်းဆီးနိုင်ခြင်း မရှိသေးပေ။
Leave a Comments