သျှမ်းပြည်တောင်ပိုင်း မိုးဗြဲမြို့ အတွင်းရှိ စစ်ရှောင်များထံ ပစ္စည်းသွားရောက်လှူဒါန်းရန် အတွက် ခက်ခဲမှုများရှိနေကြောင်း စုံစမ်းသိရှိရသည်။
လက်ရှိကာလမှာ ကုန်စျေးနှုန်း နှင့် စက်သုံးဆီ မြင့်တက်လာမှုကြောင့် မိုးဗြဲစစ်ရှောင် ဦးရေ (၁၀၀၀) ထက်မနည်းထံ ပစ္စည်းသွားရောက်လှူဒါန်းရန် ခက်ခဲနေကြောင်း စစ်ရှောင်ကူညီနေသူများက ပြောဆိုလိုက်သည်။
စစ်ရှောင်စခန်းသည် တောတောင်ထဲတွင် ရှိနေပြီး စစ်ရှောင်များလိုအပ်သော စားနပ်ရိက္ခာများ၊ ဆေးဝါးများကို သွားရောက်ကူညီရန်အတွက် စက်သုံးဆီဈေး အဆမတန် မြင့်တက်နေသောကြောင့် ယနေ့ချိန်ထိ သွားလှူရန် ခက်ခဲနေကြောင်း မိုးဗြဲ စစ်ရှောင်ကူညီရေးအသင်း (Mobye Rescue Team) မှ တာဝန်ခံ အမျိုးသမီး တစ်ဦး ပြောသည်။
“ကျမတို့က စစ်ရှောင်စခန်းကို အဝေးကြီးသွားရတယ်။ ကားနဲ့အသွားအပြန် တစ်ခေါက်ဆိုရင် ဓာတ်ဆီ (၁၀) ဂါလံ နဲ့ (၁၅) ဂါလံ ကြားလောက်ကုန်ပါတယ်။ ကျမတို့ကားက ဓာတ်ဆီ (95) လီတာ ထည့်ရတယ်၊ အခုတစ်ဂါလံကို (၁၇,၀၀၀) ကျပ်လောက် ရှိတယ်။ အခုစစ်ရှောင်ကို သွားရောက်ကူညီဖို့ အရမ်းခက်နေပြီ“ ဟု ၎င်းတာဝန်ခံ အမျိုးသမီး တစ်ဦးက ပြောသည်။
မိုးဗြဲ စစ်ရှောင် (၁,၀၀၀) ကျော်အတွက် စားနပ်ရိက္ခာများ၊ ဆေးဝါးများ ပြတ်လပ်နီးပါးဖြစ်နေကြောင်း သိရသည်။
ထို့အပြင် ပင်လောင်းမြို့နယ် လွယ်ကျိုင့်စစ်ရှောင် ဦးရေ (၆၀၀) ကျော်သည် ပြီးခဲ့သည့် သြဂုတ် (၁၅) ရက်တွင် နေရပ်သို့ ပြန်ရန်အတွက် အိမ်ပြန်လမ်းတလျောက်တွင် မြေမြှုပ်မိုင်းများ ရှိနေသဖြင့် လွယ်ကျိုင့်စစ်ရှောင်စခန်းသို့ လှည့်ပြန်ခဲ့ရကြောင်း သိရသည်။
“ ပြီးခဲ့တဲ့ (၃) ရက်နေ့က ကျနော်တို့ အိမ်ကိုပြန်ဖို့ လမ်းတစ်ဝက်မှာ ဆောင်နန်းခဲကျေးရွာကို ရောက်နေပြီ။ သက်ဆိုင်ရာက ကျနော်တို့ လိုက်ပို့ပေးတဲ့သူကို ဖုန်းဆက်လာတယ်။ အိမ်ပြန်လမ်းတလျှောက်မှာ မြေမြှုပ်မိုင်းတွေအများကြီးရှိနေသေးလို့တဲ့၊ ကျနော်တို့ကိုလည်း မပေးပြန်တော့ဘူး။ စစ်ရှောင်အားလုံး လွယ်ကျိုင့်စခန်းကို ပြန်လာရတယ် “ ဟု လွယ်ကျိုင့် စစ်ရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။
သျှမ်းပြည်တောင်ပိုင်း ဖယ်ခုံမြို့နယ်အတွင်း ပြည်သူ့ကာကွယ်ရေးတပ်ဖွဲ့ (PDF) နှင့် စစ်ကောင်စီတို့ကြား ယနေ့အချိန်ထိ စစ်ရေးတင်းမာနေဆဲဖြစ်ကာ စစ်ရှောင်များလည်း စားဝတ်နေရေးအတွက် ခက်ခဲနေကြောင်း သိရသည်။
Leave a Comments