သျှမ်းပြည်အရှေ့ပိုင်း တာချီလိတ်မြို့တွင် (၂) နှစ်ဆက်တိုက် ရေကြီးရေလျှံမှု ဖြစ်ပွားခဲ့ပြီးနောက် သြဂုတ် ၁၄ ရက်နေ့တွင် ရေများကျသွားပြီဖြစ်သော်လည်း ရွှံ့နုန်းများကို ယနေ့အချိန်ထိ ရှင်းလင်းနေရကြောင်း စုံစမ်းသိရှိရသည်။
တာချီလိတ်မြို့ ဆန်ဆိုင်းရပ်ကွက် နှင့် တာလော့ဈေးတွင် ရေကြီးရေလျှံမှု ဖြစ်ပွားပြီး ရွံ့ ၊ နုန်း များသည် ဒူးထိရှိကာ ယနေ့အချိန်ထိ သန့်ရှင်းရေးလုပ်ဆောင်နေရသေးကြောင်း ဆန်ဆိုင်းရပ်ကွက်ဒေသခံ တစ်ဦးက သျှမ်းသံတော်ဆင့်ကို ပြောသည်။
“ တာလော့ဈေး နဲ့ ဆန်ဆိုင်းရပ်ကွက်မှာတော့ ရေတအားဝင်တယ်။ နေအိမ်က တစ်ဝက်လောက် မြှုပ်တယ်။ ရေကျသွားပြီး ရွှံ့ တွေကတော့ ဒူးလောက်ထိရှိတယ်။ အခုထိ သန့်ရှင်းရေးလုပ်လို့မပြီးသေးဘူး။ ကိုယ့်ဟာကိုယ်တော့ လုပ်နေရတာပေါ့။ ဒီနှစ်ရေကြီးတာတော့ အများကြီးဆုံးရှုံးသွားတယ်” ဟု ၎င်းဒေသခံ တစ်ဦးက ပြောသည်။
အဆိုပါ ဆန်ဆိုင်းဈေး နှင့် တာလော့ဈေးတွင် ဈေးသည်များ သိုလှောင်ထားသော ပစ္စည်းများ၊ အဝတ်အထည် ဆိုင်များတွင် ရွှံ့များဖြင့် ပြန်လျော်လို့မရသော အင်္ကျီများ စွန့်ပစ်လိုက်ရကြောင်း ၎င်းက ထပ်လောင်းပြောသည်။
အလားတူ ရေကြီးရေလျှံမှုကြောင့် ပြောင်းရွှေ့၍မရသော ဆိုင်ကယ် နှင့် ကားများလည်း ရေထဲတွင် (၂) ရက်လောက် နစ်မြှုပ်ထားရာ စက်အင်ဂျင်များ ပျက်စီးသွားကြောင်း သိရသည်။
“ ဆိုင်ကယ် ၊ ကားတွေက ရွေ့လို့မရဘူးလေ။ ဒီမှာ ဆိုင်ကယ် (၃) စီး နဲ့ ကား (၅) စီးလောက်တော့ ပျက်သွားတယ်။ စက်တွေ ဘာတွေ နိုးလို့မရတော့ဘူး။ အဝတ်လျော်စက်တော့ အင်္ကျီတွေကော ရစရာကို မရှိသေးဘူး“ ဟု တာလော့ရပ်ကွက်ရှိ ဒေသခံတစ်ဦးက သျှမ်းသံတော်ဆင့်ကို ပြောသည်။
ထိုရေကြီးမှုကြောင့် သြဂုတ် ၈ ရက် ညနေ ၃ နာရီခွဲတွင် တာချီလိတ်မြို့ ဆေးခမ်းရပ်ကွက် ဦးထွန်းအောင် တံတားအနီး ကားတစ်စီးသည် ရေစီး နှင့် အတူ မျောပါသွားခဲ့ပြီး ရေနစ်သေဆုံးခဲ့ကြောင်း သိရသည်။
Leave a Comments