သျှမ်းပြည်မြောက်ပိုင်း ကျောက်မဲမြို့နယ် မြို့ပေါ်ရပ်ကွက်များတွင် လောင်းကစားဝိုင်းများအပြင် ငါးပစ်ဂိမ်းများ ပါ ထပ်မံတိုးလာကြောင်း သတင်းသိရသည်။
ယခုရက်သတ္တပတ်အတွင်း ကျောက်မဲမြို့ ရပ်ကွက် ၈ နှင့် တခြားရပ်ကွက်များအတွင်း မူလ ရှိနေပြီးသည့် လောင်းကစားဝိုင်းရုံများအပြင် ငါးပစ်ဂိမ်းများပါ ထပ်မံတိုးချဲ့ဖွင့်လှစ်လာကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“အရင်က လေးကောင်ဂျင်တို့၊ ကုံးကင်းတို့ပဲ ရှိတာ ဒါပေမဲ့ ဒီတစ်ပတ်ထဲမှာ ငါးပစ်ဂိမ်းတွေပါ တိုးလာပြီး ဆော့တဲ့သူတွေလည်း ပိုပြီးစည်လာတယ်၊ တချို့က သွားတုန်းက ကားအကောင်း ပိုက်ဆံအိတ်အပြည့်နဲ့ သွားကြပေမဲ့ ပြန်ထွက်လာတဲ့အခါကျရင် အဝတ်တစ်ထည်ကိုယ်တစ်ခုကျန်ခဲ့လောက်အောင်ရှုံးခဲ့ရတယ်” ဟု အထက်ပါ ပုဂ္ဂိုလ်က ပြောသည်။
လက်ရှိတွင် ကျောက်မဲမြို့ပေါ် ရပ်ကွက် ၇ ၊ ၈ နှင့် ပိန္နဲကုန်းတို့တွင် လောင်းကစားဝိုင်း နှင့် ငါးပစ်ဂိမ်းများ ဖွင့်လှစ်နေလျက်ရှိပြီး တစ်နေရာပြီး တစ်နေရာသို့ ပြောင်းရွှေ့ဖွင့်လှစ်လေ့ရှိကြောင်း ဒေသခံများက ပြောသည်။
ယင်းကဲ့သို့ လောင်းကစားဝိုင်းများ ပွင့်လင်းမြင်သာစွာ ပေါများလာမှုကြောင့် ဒေသအတွင်း ကား၊ ဆိုင်ကယ် ပျောက်ဆုံးမှု ၊ ပစ္စည်းများခိုးယူခံရမှုများလည်း တစ်နေ့ထက် တစ်နေ့ အခြေအနေဆိုးရွားလာကြောင်း ကျောက်မဲမြို့နေ အမျိုးသမီးတစ်ဦးက ပြောသည်။
“ကားတွေ ဆိုင်ကယ်တွေ ပျောက်တာနေ့တိုင်းနီးပါးလောက်ရှိနေတယ်၊ တခြား ဖုန်းတို့ လုယက်ခံရတာတို့လည်း ရပ်ကွက်တိုင်းမှာ ကြားနေရတယ်၊ လောင်းကစားဝိုင်းတွေမှာ အရှုံးပေါ်တဲ့သူရယ်၊ လောင်းကစားဝိုင်းနဲ့ အတူ လာတဲ့ မူးယစ်ဆေးတွေကြောင့်ရယ် ဒီလောက်ထိ သူခိုးတွေ သောင်းကျန်းနေတာလို့ မြင်တယ်” ဟု အထက်ပါ အမျိုးသမီးက ပြောသည်။
ပြီးခဲ့သည့် ဇူလိုင် ၂၀ ရက်မှ စတင်ကာ ကျောက်မဲမြို့နယ် ခုံအုံ (ခိုခမ်း) ကျေးရွာ ဘုန်းကြီးကျောင်းအနီးရှိ အသံမစဲ ပဌာန်းပြုလုပ်နေမှုကို အခွင့်ကောင်းယူပြီး လူတစ်စုက လောင်းကစားဝိုင်းလာရောက် ဖွင့်လှစ်နေရာမှ လောင်းကစားဝိုင်းများသည် ကျောက်မဲမြို့အတွင်း တစ်နေရာပြီးတစ်နေရာပြောင်းရွှေ့ဖွင့်နေကြောင်းသိရသည်။
ယခင် NLD အစိုးရလက်ထက်က ပွဲလမ်းသဘင်များတွင် လောင်းကစားဝိုင်းများ ဖွင့်ခွင့်မရှိပဲ ယခု စစ်ကောင်စီ လက်ထက်တွင် ပွဲတိုင်းနီးပါး လောင်းကစားဝိုင်းများပါရှိပြီး သျှမ်းပြည်တစ်ဝှမ်းရှိ မြို့နယ်တိုင်း လောင်းကစား ဝိုင်းများ ယခင်ထက် ပိုမို များပြားစွာရှိလာကြောင်း သိရသည်။
Leave a Comments