မိုးဗြဲမြို့ ပြည်သူ့နေအိမ်မှ တန်ဖိုးရှိ ပစ္စည်းများဖောက်ထွင်းခံရ

0

သျှမ်းပြည်တောင်ပိုင်း မိုးဗြဲမြို့အတွင်း စစ်ရှောင်နေရသည့် ပြည်သူများနေအိမ်မှ တန်ဖိုးရှိ ပစ္စည်းများ ဖောက်ထွင်းခိုးယူမှု ခံနေရကြောင်း သတင်း သိရသည်။

မိုးဗြဲ

မိုးဗြဲမြို့ပေါ်ရှိ လူမနေသည့် စစ်ရှောင်ပြည်သူများနေအိမ် နှင့် ဝီသဲဂူကျေးရွာ နှင့် တခြားစစ်ရှောင်ရှိ ကျေးရွာများတွင် မူးယစ်ဆေးသမား နှင့် သူခိုးတို့သည် နေအိမ်များကို ဖောက်ထွင်းကာ တန်ဖိုးရှိ ပစ္စည်းများ ခိုးယူဆောင်သွားကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အဲ့ဖောက်ထွင်းမှုလုပ်တဲ့ တော်တော်များများက ဆေးသမားတွေပေါ့၊ ပြည်သူအားလုံးနီးပါးက စီးပွားရေးခက်ခဲနေတဲ့အချိန် စစ်ရှောင်သွားရတဲ့ ပြည်သူအိမ်တွေ လူမနေတဲ့အိမ်တွေကို ဖောက်ပြီး ဆေးဖိုးကို ရှာကြတာ၊ ဖောက်ခံရတဲ့နေအိမ်က ၁၀ လုံးလောက်ရှိနေပြီ” ဟု အထက်ပါအမျိုးသမီးက ပြောသည်။

လက်ရှိ မိုးဗြဲမြို့အတွင်းတွင် စစ်ကောင်စီတပ်ဖွဲ့များ သွားလာလှုပ်ရှားနေလျက်ရှိနေပြီး ယင်းကဲ့သို့ ပြည်သူ့ အိမ်များ ဖောင်ထွင်းခံနေရသော်လည်း အရေးယူဆောင်ရွက်ခြင်းများ မရှိကြောင်း ဒေသခံများက ပြောသည်။

ယင်းကဲ့သို့ ခိုးသူများ ဆေးသမားများ သောင်းကျန်းနေမှုကြောင့် ဒေသခံ ပြည်သူများသည် ပြည်သူ့ကာကွယ်ရေး တပ်ဖွဲ့များထံ တိုင်စာပေးပို့ကာ အကူအညီတောင်းခံထားကြောင်းလည်း သိရသည်။

“စစ်ကောင်စီတွေက မြို့ထဲနေရာယူထားပေမဲ့ ပြည်သူတွေရဲ့ အခွင့်အရေးတွေ လုံခြုံရေးတွေကို ဘာမှ တာဝန် မယူပေးတဲ့အခါကျတော့ PDF တွေကိုပဲ အားကိုးရတာလေ၊ ဒီသူခိုးတွေ ဖောက်ထွင်းသူတွေကို အရေးယူပေးဖို့ Local PDF တွေကို တိုင်စာပို့ပေးထားတယ်လို့သိရတယ်” ဟု အမည်မဖော်လိုသူ ဒေသခံ အမျိုးသား တစ်ဦးက ပြောသည်။

ယင်းကိစ္စများနှင့် ပတ်သက်ပြီး ပြီးခဲ့သည့် သြဂုတ်လ ၁၂ ရက်တွင် မူးယစ်ဆေးသုံးသူများနှင့် စစ်ဘေးရှောင် ပြည်သူများ၏ ပစ္စည်းများကို လိုက်လံခိုးယူနေသည့် သူခိုးအုပ်စုများအား မိုးဗြဲပြည်သူ့ကာကွယ်ရေးတပ်မှ ထိုက်လျောက်သည့် ပြစ်ဒဏ်ဖြင့် အရေးယူဆောင်ရွက်သွားမည်ဟု ၎င်းတို့စာမျက်နှာမှ တစ်ဆင့် ထုတ်ပြန်ကြေညာထားသည်။

တိုက်ပွဲကြောင့် စစ်ရှောင်နေရသည့် နေအိမ်များမှ ပစ္စည်းများကို ခိုးယူမှုဖြစ်နေခြင်းသည် ဗိုးဗြဲမြို့အပြင် တခြားမြို့ရွာရပ်ကွက်များမှာလည်း ဖြစ်ပွားနေကြောင်း သိရသည်။

Leave a Comments