သျှမ်းပြည်အရှေ့ပိုင်း တာချီလိတ်မြို့နယ်တွင် အသက် (၁၈) နှစ် မပြည့်သေးသည့် လူငယ်များ ကောင်မလေးကိစ္စ ဖြင့် စကားများရာမှ သတ်ဖြတ်မှုအထိ ဖြစ်ပွားခဲ့ကြောင်း သတင်းသိရသည်။
ပြီးခဲ့သည့် သြဂုတ်လ (၁၀) ရက်နေ့ ညနေပိုင်းတွင် တာချီလိတ်မြို့နယ် ဆန်ဆိုင်း (ခ) ရပ်ကွက်၊ မြို့ပတ်လမ်း နှင့် ဟံသာဝတီလမ်းသွယ်ရှိ ရေမြောင်းမှာ အမည်မသိ အမျိုးသားတစ်ဦးအလောင်း တွေ့ရှိရာမှ လူသတ်မှု ဖြစ်စဥ်ကို သိရှိခဲ့ရကြောင်း အလောင်းကို သွားရောက် သယ်ဆောင်ခဲ့သည့် ဦးလှမိုး လူမှုကူညီရေးအသင်းမှ အသင်းဝင်တစ်ဦးက သျှမ်းသံတော်ဆင့်ကို ပြောသည်။
“ဘယ်အချိန်ကတည်း ဖြစ်ခဲ့တာလဲတော့ မသိခဲ့ပါဘူး၊ ကျနော်တို့ အလောင်းကို သွားသယ်တဲ့ အချိန်မှာ အလောင်းက ပုပ်နေပြီ၊ သက်ဆိုင်ရာ မိသားစုဝင်တွေကို စုံစမ်းရင်း သူ့ဖုန်း Messenger ကို စစ်ကြည့်တော့ ကောင်မလေးကိစ္စ စကားများထားတဲ့ အကြောင်းတွေ တွေ့ရတယ်၊ နောက်တော့ ပြောဆိုထားတဲ့ အကောင့်တွေ ဆီလိုက်ရင်းနဲ့ တရားခံတွေကိုလည်း ဖမ်းမိသွားတယ်” ဟု လူမှုကူညီရေးအသင်းဝင်က ပြောသည်။
ဖြစ်စဥ်မှာ သေဆုံးသူ မောင်ကျော်ဇင်ဝင်း၏ Facebook စာမျက်နှာ Messenger မှတစ်ဆင့် သေဆုံးမည့် နေရာအနီး ခိုက်ရန်ဖြစ်ပွားချိန်းဆိုသည့် စာသားများကို စစ်ဆေးတွေ့ရှိခဲ့ပြီး အကောင့်ပိုင်ရှင်များအား လိုက်လံ စုံစမ်းခဲ့ရာ သတ်ဖြတ်မှု ကျူးလွန်သူ လူငယ် ၄ ဦးကို ဖမ်းဆီးရမိခြင်းဖြစ်ကြောင်း သိရသည်။
“သေဆုံးသူရော ကျူးလွန်သူတွေရာ အသက် (၁၈) နှစ်မပြည့်ကြသေးဘူး၊ ကောင်မလေး ကိစ္စကြောင့် ပြင်ပမှာ ခိုက်ရန်ဖြစ်ပွားခဲ့တာလို့လည်း ထွက်ဆိုခဲ့တယ်၊ တခြားလူငယ် ၃ ဦးကတော့ သူငယ်ချင်း နောက်လိုက်ရင်း ကျူးလွန်ဖြစ်ခဲ့တယ်တဲ့၊ အားလုံးက တာချီလိတ်မြို့က ဖြစ်ကြပါတယ်” ဟု ဖြစ်စဥ်ကို သိရှိရသည့် ရဲစခန်းနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
ကျူးလွန်သူ လူငယ်များသည် တာချီလိတ်မြို့၊ မယ်ယန်းရပ်ကွက်မှ Su Myat အကောင့်ပိုင်ရှင်၊ မယ်ခေါင် ရပ်ကွက်၊ မြို့ပတ်လမ်းရှိ ၇၇၇ ကားဝပ်ရှော့တွင် လုပ်ကိုင်သူ ဇော်မင်းထွေး (ခ) ဖိုးသား၊ ဇော်မျိုးနိုင် (ခ) နေထူးနိုင်၊ သိန်းဌေးအောင် (ခ) ဟိန်းကိုကိုအောင် နှင့် မျိုးမင်းသန့် တို့ ဖြစ်ခဲ့ကြောင်း သိရသည်။
လက်ရှိတွင် ကျူးလွန်သူ (၄) ဦးသည် အသက် (၁၈) နှစ် မပြည့်သေးသည့် ကလေးသူငယ်တရားခံများ ဖြစ်သဖြင့် ၎င်းတို့ (၄) ဦးအား တာချီလိတ် မြို့မရဲစခန်း စခန်းမှူး၏ထိန်းသိမ်းမှုအောက်တွင် ထိန်းသိမ်း ထားပြီး တာချီလိတ်မြို့မရဲစခန်း (ပ)၁၃၇/၂၀၂၂၊ သေမှုသေခင်း အမှတ်စဉ်(၇/၂၀၂၂)မှ လူသတ်မှု ရာဇသတ်ကြီးပုဒ်မ-၃၀၂ အမှုဖွင့် ထားကြောင်း သတင်းသိရသည်။
ယင်းကဲ့သို့ ဖြစ်စဥ်ဖြစ်ပွားခဲ့ခြင်းနှင့် ပတ်သက်ပြီး နိုင်ငံရေး အခြေအနေကြောင့် တချို့သော လူငယ်များသည် တရားဥပဒေ စိုးမိုးမှုကို ယုံကြည်မှုကင်းမဲ့သည့် သဘောဖြစ်ကြောင်းလည်း အထက်ပါ ပုဂ္ဂိုလ်က ပြောဆိုသုံးသပ်ထားသည်။
တာချီလိတ်မြို့သည် နယ်စပ်မြို့နှင့် လောင်းကစားဝိုင်းများ၊ Bar&club များ ပေါများသည့် မြို့ ဖြစ်သည့် အပြင် လူပေါင်းစုံ ဝင်ထွက်သွားလာသည့်မြို့ ဖြစ်သည့်အတွက် တရားဥပဒေ စိုးမိုးမှု အားနည်းနေပြီး တရားမဝင်လုပ်ရပ်များ၊ သတ်ဖြတ်လုယက်မှုများ ပေါများသည့် မြို့ဖြစ်ကြောင်း သိရသည်။
Leave a Comments