သျှမ်းပြည်အရှေ့ပိုင်း ကျိုင်းတုံမြို့နယ်မှ ပင်တောက်ကျေးရွာတွင် နေထိုင်သည့် အမျိုးသမီးတစ်ဦး မိုးကြိုးစက်ကွင်း ထိမှန်ပြီး သေဆုံးသွားကြောင်း သတင်းသိရသည်။

ယမန်နေ့ (သြဂုတ် ၁၁ ) ရက် မွန်းလွဲပိုင်း ၂ နာရီတွင် နေအိမ်ခြံဝင်းထဲ ရောက်နေသည့် အသက် ၄၀ ဝန်းကျင် ဒေါ်လီဟယ်သည် မိုးကြိုးစက်ကွင်း ထိမှန်ကာ အသက်သေဆုံးသွားရကြောင်း နီးစပ်သည့် ဒေသခံအမျိုးသမီး တစ်ဦးက သျှမ်းသံတော်ဆင့်ကိုပြောသည်။

“မိုးရွာနေတဲ့အချိန် ခြံထဲဟင်းခူးဖို့ ဆင်းသွားရင်း ဝက်ခြံနားမှာ မိုးကြိုးပစ်ခံရပြီး ပွဲချင်းပြီး သေဆုံးသွားခဲ့ပါတယ်၊ မျက်နှာနဲ့ ဝမ်းဗိုက်မှာ ညိုမဲဒဏ်ရာတွေ တွေ့ရတယ်၊ ဖြစ်စဥ်ဖြစ်ဖြစ်ချင်း မိသားစုဝင်တွေ အကြောင်းကြားလို့ ရဲ နဲ့ မှုခင်း ဆရာဝန်တွေကလည်း လာစစ်ဆေးတာတွေ့ရတယ်” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။

အဆိုပါ မိုးကြိုးစက်ကွင်းမိသည့် ဒေါ်လီဟယ်သည် ပင်းတောက်အုပ်စု၊ ပင်းတောက်ရွာ၊ အမက (ပင်းတောက်) အခြေခံပညာ မူလတန်းကျောင်းမှ ကျောင်းသန့်ရှင်းရေးလုပ်သားဖြစ်ကြောင်းသိရသည်။

ပြီးခဲ့သည့် ဧပြီလအတွင်းတွင်လည်း သျှမ်းရှေ့ တာချီလိတ်မြို့နယ် လွယ်တော်ခမ်းကျေးရွာအုပ်စု၊ စန်းလု ကျေးရွာတွင် မိုးကြိုးစက်ကွင်းထိမှန်မှုကြောင့် နေအိမ်တစ်လုံးမီးလောင်မှု ဖြစ်ပွားခဲ့သည်။

ယခုလို မိုးရာသီကာလအတွင်းတွင် လေပြင်းများတိုက်ခတ်ခြင်း၊ လေပြင်းနှင့်အတူ ထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း ၊ မိုးသီး ကြွေခြင်းနှင့် နေရာကွက်ကျား မိုးထစ်ချုန်းရွာခြင်းစသည့် သဘာဝဘေး အန္တရာယ်ဆိုင်ရာ မိုးလေဝသဖြစ်စဉ်များ ဖြစ်ပေါ်နိုင်သည့်အတွက် အသိပညာပေးများ လိုအပ်အကြောင်းလည်း ဒေသခံပြည်သူများက ပြောဆိုကြသည်။