သျှမ်းပြည်တောင်ပိုင်း ပုံးအင်းဒေသတွင် မိုးများအဆက်မပြတ် ရွာသွန်းနေမှုကြောင့် စိုက်ပျိုးရိတ်သိမ်းပြီး နှင့် မရိတ်သိမ်းရသေးသည့် ရာချီ စပါးခင်းများ ရေလွှမ်းမိုးခံရပြီး ဆုံးရှုံးမှု ကြီးမားစွာ ရင်ဆိုင်နေရကြောင်း စုံစမ်းသိရသည်။

ပုံးအင်းဒေသအတွင်း (၁၀) ရက်ကျော်အထိ အဆက်မပြတ် မိုးရွာသွန်းမှုကြောင့် မိုးရေများ အဆမတန် များလာပြီး ရေကြီးရေလျှံမှုများ ဖြစ်ပွားကာ ရာချီစပါးခင်းများလည်း ပျက်စီးဆုံးရှုံးမှုကို ရင်ဆိုင်နေရကြောင်း ဝမ်နောက် ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“ကျမရဲ့ လယ်မှာ ရိတ်ရမယ့် စပါးတွေလည်း ရေအောက်မှာ တစ်တောင်ဆစ် လောက်နစ်နေတယ်။ ရေအောက်မှာ (၃) ရက်နစ်နေပြီ အညှောင့်တွေလည်းထွက်၊ ဝါးတန်းပေါ်လန်းထားတဲ့ စပါးတွေလည်း အကုန်မြှုပ်နေတယ်။ အညှောင့်ထွက်လာတဲ့ စပါးတွေလည်း မရိတ်ပဲထားရတော့မယ် “ ဟု ၎င်းအမျိုးသမီးက ပြောသည်။

အလားတူ ပုံးအင်းဒေသ အနိမ့်ပိုင်းရှိသော ဝမ်ပုံးရွာ ၊ ကွန်ဆိုင်းရွာ၊ ဆိုင်လဲရွာ၊ နောင်စန့်ရွာ နှင့် နမ့်ကွတ် စသည့် အနိမ့်ပိုင်းရှိသော ကျေးရွာများမှ စပါးများသည် ရေထဲနစ်မြှုပ်နေသောကြောင့် အညှောင့်ပင်အသစ်များ ထွက်နေပြီဖြစ်ကြောင်း သိရသည်။

ဆီဆိုင်မြို့နယ် နောင်စန့်ကျေးရွာ နှင့် ဆိုင်လဲကျေးရွာတွင် မရိတ်ရသေးသော စပါးခင်းများသည် ရေအောက်တွင် (၁) ပေကျော်အထက်တွင် နစ်မြှုပ်နေပြီး ရိတ်ပြီး၍ ဝါးတန်းပေါ်လှန်းထားသော စပါးခင်းများလည်း ရေထဲတွင် ထပ်မံ နစ်မြှုပ်နေပြီဖြစ်ကြောင်း ပုံးအင်းဒေသခံ လယ်သမားအမျိုးသားတစ်ဦးက ပြောသည်။

“ မရိတ်ရသေးတဲ့ စပါးတွေလည်း ရိတ်လို့မရတော့ဘူး။ ရိတ်ပြီး ဝါးတန်းပေါ် လှန်းထားတော့လည်း ထပ်ပြီးမြှုပ်ပြန်ပြီ။ စပါးတွေက အညှောင့်တွေ ထွက်နေပြီ၊ ရေက တအားနက်တော့ဆင်းရိတ်လို့လည်း မရတော့ဘူး “ ဟု ၎င်းလယ်သမား အမျိုးသားတစ်ဦးက ပြောသည်။

ပုံးအင်းဒေသတွင် စပါးများ ရေလွှမ်းမိုးသွားသောကြောင့် လယ်သမားများ နှောင်နှစ်စပါးများ ထပ်မံစိုက်ပျိုးရန် နှင့် လက်ရှိ စားဝတ်နေရေးအတွက် အခက်အခဲများစွာ ရင်ဆိုင်ရကြောင်း သိရသည်။

“နောက်နှစ် စပါးစိုက်ဖို့တောင်မှ ဒီနှစ်တော့ စားဖို့သောက်ဖို့တောင် ခက်တယ် ၊ စားရိတ်လည်း ပြန်မရဘူး။ အခုပုံးအင်း ဒေသတစ်ခုလုံးက ရေကြီးနေပြီးတော့ နောက်နှစ် စပါးစိုက်ဖို့တော့ မဖြစ်နိုင်တော့ဘူးထင်တယ် “ ဟု ၎င်းကဆိုသည်။

ထို့ကြောင့် ပုံးအင်းဒေသရှိ စပါးခင်းများ ရေနစ်မြုပ်သွားသည့် အတွက် လယ်သမားများသည် တကြိမ်တခါမှ မကြုံဖူးသည့် အခက်အခဲများ ရင်ဆိုင်နေရသည်။

ရေကြီးရေလျှံမှုကြောင့် မူလတန်းကျောင်းသား၊ သူများ ကျောင်းသွားရန် အခက်ခဲဖြင့် ကြုံတွေ့နေရကြောင်း သိရသည်။

“ ချောင်းအနောက်ကမ်းရှိတဲ့ မူလတန်းကျောင်းငယ်ကလေးတွေ ကျောင်းအရှေ့ကမ်းမှာ ကျောင်းသွားတက်ဖို့က ခက်တယ်။ ဘီလူးချောင်းက ရေစီးသန်တယ်။ တချို့ကလေးတွေ ကျောင်းမတက်တော့ဘူး“ ဟု နောင်စန့်ဒေသခံ ကျောင်းသားမိဘတစ်ဦး က ပြောသည်။

ပုံးအင်းဒေသတစ်ခုလုံးတွင် ချောင်းခြားပြီး မြို့နယ်အလိုက် ခွဲခြားသွားသဖြင့် ထိုချောင်းမှတစ်ဆင့် စီးဆင်းနေသော မိုးရေများ နှင့် အတူ အမှိုက်များသည်လည်း ပုံးအင်းအောက်ပိုင်းတွင်ရှိသော ချောင်းကူးတံတားများကြားတွင် အမှိုက်များက ပြည့်နှက်နေသည့်အတွက် ရေစီးဆင်း၍မရကြောင်း သိရသည်။

ပုံးအင်းဒေသတွင် အဆမတန် ရေကြီးရေလျှံမှုများမှာ လွန်ခဲ့သော (၁၂) နှစ်အတွင်းတွင်လည်း တစ်ကြိမ် ဖြစ်ပွားခဲ့ဖူးကြောင်း ပုံးအင်းဒေသခံများထံမှ သိရသည်။