သျှမ်းပြည်တောင်ပိုင်း ဟိုပုံးမြို့ရှိ Non CDM ပညာရေးဝန်ထမ်းများ နှင့် မြို့နယ်ကျန်းမာရေးဝန်ထမ်းများသည် (၈) လကြာ လစာမရသောကြောင့် စားဝတ်နေရေးအတွက် အခက်အခဲကြုံတွေ့နေရကြောင်း စုံစမ်းသိရှိရသည်။
စစ်ကောင်စီ လက်အောက်ခံ ပညာရေးဝန်ထမ်းများ နှင့် မြို့နယ်ကျန်းမာရေး ဝန်ထမ်းများသည် ယခင်က (CDM) ပြုလုပ်ထားသော ဝန်ထမ်းများ ဖြစ်ခဲ့ကြပြီး (ဇန်နာဝါရီ) မှစတင်ပြီး (Non-CDM) ဖြင့် အလုပ်ပြန်ဝင်ရာမှ ယနေ့အချိန်ထိ လစာ မရသေးသဖြင့် စားဝတ်နေရေးအတွက် အခက်အခဲ ကြုံတွေ့နေရကြောင်း နီးစပ်သူတစ်ဦးမှ သျှမ်းသံတော်ဆင့် ကိုပြောသည်။
“ Non – CDM ဝင်လုပ်တဲ့ သူတချို့က (၁) လပိုင်းကနေ ဝင်လာကြတဲ့သူတွေရှိတယ်။ ပြည်နယ် ဦးစီးဌာနက လစာမထုတ်ပေးဘူး။ တချို့တွေက (၈) လကြာပြီ မရတာ၊ တချို့တွေလည်း အရင် (ဇူလိုင်) လကဝင်လာတဲ့ သူတွေရှိတယ်။ အကုန်လုံးပဲ ၂၀၂၂ ခုနှစ် နောက်ပိုင်း (Non-CDM) ပြန်ဝင်ကြတဲ့သူတွေက ပြည်နယ်ဦးစီးဌာနက ပြန်ဝင်လာကြတဲ့သူတွေကို လစာမပေးဘူးလို့ အမိန့်ထုတ်ထားတယ်။ စားဝတ်နေရေးအတွက် ကြုံသလိုဖြေရှင်း နေရတယ် “ ဟု ၎င်းနီးစပ်သူတစ်ဦးက ပြောသည်။
လက်ရှိ Non – CDM ပြုလုပ်သော ပညာရေးဝန်ထမ်းများက ကျူရှင် ဖွင့်လှစ်သင်ကြားခြင်း ကျန်းမာရေး ဝန်ထမ်းများက အိမ်တိုင်ရာရောက် ဆေးကုသမှု ဝန်ဆောင်မှု ပေးခြင်းများ ပြုလုပ်ပြီး စားဝတ်နေရေးအတွက် ဖြေရှင်းနေရသည်။
အဆိုပါ ၂၀၂၁ ခုနှစ် (နိုဝင်ဘာ) လမှစ၍ ( Non-CDM ) ဖြင့် ပြန်ဝင်ခဲ့ကြသော ဝန်းထမ်းများမှာ လစာမရသော်လည်း (ကိုဗစ်-၁၉) ချေးငွေများကို လတိုင်းဖြေရှင်းနေရသည်ဟု သတင်းသိရသည်။
“ ၂၀၂၁ ခုနှစ်တွေ (Non-CDM) ပြန်ဝင်ကြတဲ့သူတွေက လစာရတယ်ဆိုပေမယ့် သူတို့မှာ လတိုင်း အကြွေးဆပ်နေရတယ်။ ကိုဗစ် -၁၉ ချေးငွေကို သူတို့က လတိုင်းပေးရတယ်။ တစ်လဘယ်လောက် ဖြတ်လဲတော့ သေချာမသိရဘူး။ လစာနှုန်းပေါ်မှာ မူတည်ပြီး သူတို့က ဖြတ်တယ် “ ဟု ၎င်း အထက်ပုဂ္ဂိုလ်တစ်ဦးက ထပ်လောင်းပြောသည်။
ထိုသို့ စစ်အာဏာသိမ်းပြီးနောက်ပိုင်း စစ်ကောင်စီ တပ်ဖွဲ့များသည် (CDM) ပြုလုပ်သော ဝန်ထမ်းများကို နည်းမျိုးစုံဖြင့် ဖိအားပေးပြီး ယနေ့အချိန်ထိ ဖမ်းဆီးမှုများ ပြုလုပ်နေဆဲဖြစ်ကြောင်း သိရသည်။
Leave a Comments