သျှမ်းပြည်မြောက်ပိုင်း ကျောက်မဲမြို့နယ်အတွင်းတွင် အုပ်ချုပ်ရေးမှူးများ၏ ခွင့်ပြုချက်ဖြင့် လောင်းကစားဝိုင်းများကို တစ်နေရာပြီးတစ်နေရာ ပြောင်းရွှေ့ဖွင့်လှစ်နေကြောင်း သတင်းသိရသည်။

သြဂုတ်လဆန်းပိုင်းမှစတင်ကာ ကျောက်မဲမြို့နယ် အမှတ် (၁) ရပ်ကွက် နှင့် နမ့်ဟူးတောင်းတို့တွင် လောင်းကစားဝိုင်း နေရာသစ်အဖြစ် ဖွင့်လှစ်နေကြပြီး မကြိုက်သည့် ဒေသခံများရှိနေသော်လည်း အုပ်ချုပ်ရေးမှူးခွင့်ပြုချက်ဖြင့် ဖွင့်နေကြသည့်အတွက် ကန့်ကွက်မှု မပြုလုပ်နိုင်ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ခိုခမ်းဘက် တစ်ပတ်လောက်ပိတ်သွားတဲ့ လောင်းကစားဝိုင်းက နမ့်ဟူးတောင်း ဘောလုံးကွင်းထဲမှာ ထပ်လာဖွင့်နေတယ်၊ တစ်နေရာပြီးတစ်နေရာ ပြောင်းဖွင့်နေတဲ့ လောင်းကစားဝိုင်းကြောင့် ဒေသအတွင်း ခိုးဆိုးလုယက်မှုတွေများပေမဲ့ သက်ဆိုင်ရာအုပ်ချုပ်ရေးမှူးတွေ ကိုယ်တိုင် ခွင့်ပြုထားတော့ ကျနော်တို့လည်း မတားရဲဘူး၊ မတားနိုင်ဘူး” ဟု ၎င်းအမျိုးသားက ပြောသည်။

အဆိုပါ လောင်းကစားဝိုင်းများသည် မူရင်းဒိုင်ကိုင်သူ မည်သူဖြစ်ကြောင်း မသိရသော်လည်း အုပ်ချုပ်ရေးမှူးများ၏ ခွင့်ပြုချက်ဖြင့် ကျောက်မဲမြို့နယ်အတွင်းမှ ရပ်ကွက်/ကျေးရွာများတွင် လှည့်ပတ်ဖွင့်နေကြောင်း သိရသည်။

ကျောက်မဲမြို့နယ်တွင် ပြီးခဲ့သည့် ဇွန်လအတွင်းမှ စတင်ကာ လောင်းကစားဝိုင်းများ ရှိလာခဲ့ပြီး၊ ပြည်သူများက ငွေကြေး ဥစ္စာများစွာ ဆုံးရှုံးရသည့်အပြင် မိသားစုဝင်အချင်းချင်း သတ်ဖြတ်မှုများအထိပါ ဆိုးရွားလာကြောင်း ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ပြီးတဲ့လကတည်းက လောင်းကစားဝိုင်းတွေ တစ်နေရာပြီး တစ်နေရာ လုပ်လာတာ၊ ကျမတို့ဒေသ အတွင်း မှာ မိသားစု ပြဿနာတွေလည်း များသထက်များလာတယ်၊ လောင်းကစားဝိုင်းမှာ လျော်ကြေးပေးဖို့ ပိုက်ဆံ တောင်းမရလို့ ဖခင်ဖြစ်သူကို သမီးက သတ်လိုက်တာလည်း လောင်းကစားဝိုင်းရဲ့ အကျိုးဆက်ပဲ၊ ပြီးတော့ သူခိုးတွေ လုယက်မှုတွေလည်း အရင်ကထက်များလာတော့ ဒေသအတွင်းမလုံခြုံတော့ဘူး၊ ဖြစ်နိုင်ရင် လောင်းကစားဝိုင်းတွေ ပိတ်သိမ်းဖို့ အာဏာပိုင်တွေ လုပ်ပေးပါ” ဟု ၎င်းက ပြောသည်။

ကျောက်မဲမြို့နှင့် အလားတူ ကွတ်ခိုင်မြို့၊ သီပေါမြို့၊ လားရှိူးမြို့ နှင့် နောင်ချိုမြို့ အပြင် သျှမ်းပြည်အတွင်းမှ တခြား မြို့နယ်များတွင်လည်း လောင်းကစားများ တစ်နေ့ထက် တစ်နေ့များလာသည်။

ထိုလောင်းကစားဖွင့်လှစ်သည့်သူများသည် အာဏာသိမ်း စစ်ကောင်စီ လက်အောက်ခံ ဌာနဆိုင်ရာများနှင့် ပူးပေါင်းဆောင်ရွက်နေကြပြီး တစ်ချို့ဒေသမှာ ပြည်သူ့စစ်တပ်ဖွဲ့များက ဦးဆောင်ပြီး ဖွင့်လှစ်နေကြောင်း သိရသည်။