သျှမ်းပြည်ဝန်ကြီးချုပ် ဒေါက်တာလင်းထွဋ်ကို ရွေးကောက်ပွဲဥပဒေ ချိုးဖောက်မှု ရာဇသတ်ကြီး ဥပဒေ ပုဒ်မ -၁၃၀(က) ဖြင့် ထောင်ဒဏ် ၂ နှစ် ထပ်မံချလိုက်ကြောင်း စုံစမ်းသိရသည်။
သြဂုတ် ၃ရက်တွင် တောင်လေးလုံး အကျဥ်းထောင် တရားရုံးမှ သျှမ်းပြည်ဝန်ကြီးချုပ် ကို ရွေးကောက်ပွဲ ဥပဒေ ချိုးဖောက်မှု ရာဇသတ်ကြီး ဥပဒေ ပုဒ်မ- ၁၃၀ (က)ဖြင့် တရားစွဲဆိုလိုက်ကြောင်း တရားရုံးနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“ ဒေါက်တာလင်းထွဋ်ကို ဥပဒေပုဒ်မ -၁၃၀(က)နဲ့ နောက်ထပ် ၂နှစ်ချလိုက်တယ်။ အဲ့ဒါနဲ့ဆိုရင်တော့ စုစုပေါင်း ထောင်ဒဏ် ၁၈ နှစ်ချခံထားရတာပါ” ဟု တရားရုံးနှင့် နီးစပ်သူက ဆိုသည်။
ရွေးကောက်ပွဲ ဥပဒေချိုးဖောက်မှု ရာဇသတ်ကြီး ဥပဒေ ပုဒ်မ-၁၃၀(က) ကို ဇူလိုင် ၁၄ရက်တွင် အမှုဖွင့်ခံရပြီး ဇူလိုင် ၂၈ ရက်တွင် ထောင်လေးလုံး အကျဥ်းထောင်တွင် စွဲချက်တင်ခံလိုက်ရကြောင်း သိရသည်။
“သူကတော့ လက်ရှိ ထောင်လေးလုံးထောင်မှာပါ။ ကျန်းမာရေးကတော့ ကောင်းပါတယ်” ဟု ၎င်းကထပ်ပြောသည်။
သျှမ်းပြည် ဝန်ကြီးချုပ်သည် အဂတိလိုက်စားမှုတိုက်ဖျက်ရေး ဥပဒေပုဒ်မလေးခုဖြင့် ထောင်ဒဏ် ၁၆ နှစ် ချမှတ်ခံထားခဲ့ရ သူလည်း ဖြစ်သည်။
Leave a Comments