သျှမ်းပြည်တောင်ပိုင်း အောင်ပန်းမြို့မှ ပင်လောင်းမြို့ သို့သွားသည့် လမ်းခွဲဂိတ်တွင် စစ်ကောင်စီတပ်ဖွဲ့များက စားနပ်ရိက္ခာများ၊ ဆေးဝါးများ နှင့် ဓာတ်မြေသြဇာများကို သယ်ယူခွင့်မပြုကြောင်း စုံစမ်းသိရသည်။
ပင်လောင်းမြို့တွင် ယခုကာလ မိုးရာသီတွင်း လယ်ယာစိုက်ပျိုးရန်အတွက် လိုအပ်သော ဓာတ်မြေသြဇာများကို စစ်ကောင်စီတပ်ဖွဲ့များက သယ်ယူခွင့်မပေးသောကြောင့် တောင်ယာလုပ်ကိုင်သူများ အခက်အခဲကြုံတွေ့နေရကြောင်း ပင်လောင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဆေးဝါး နဲ့ စားနပ်ရိက္ခာက (PDF) တွေကို ပံ့ပိုးမှာကြောက်လို့ သူတို့လုံလုံလောက်လောက် မပေးသယ်ဘူး။ အခုက ပုလဲ ဓာတ်မြေသြဇာကိုလည်း မပေးသယ်ဘူး၊ အခုမိုးရာသီ လယ်ယာ စိုက်ပျိုးမယ့်ချိန် သူများလိုအပ်နေချိန် သူတို့က လုံးလုံးကို မပေးသယ်ဘူး ၊ အခုလယ်လုပ်တဲ့သူတွေအတွက် အဆင်မပြေဘူး“ ဟု ၎င်း ဒေသခံအမျိုးသားတစ်ဦးက ပြောသည်။
အဆိုပါ စားနပ်ရိက္ခာများ ၊ ဆေးဝါးများ နှင့် ဓာတ်မြေသြဇာများကို သယ်ယူရန်အတွက် ကျေးရွာ ထောက်ခံစာ၊ ရဲစခန်း ထောက်ခံစာ နှင့် ဆေးရုံထောက်ခံစာများ ရှိမှသာလျှင် သယ်ယူခွင့်ပြုကြောင်းလည်း သိရသည်။
ထိုအပြင် ဆေးရုံသို့ သွားရောက်ကုသသူများကိုလည်း ကိုဗစ်ကာကွယ်ဆေးထိုးပြီးကြောင်း ထောက်ခံစာ မပါရှိသည့်ကိစ္စကိုလည်း ဖြေလျှော့ပေးရန် ပင်လောင်းကုန်သည် အမျိုးသားတစ်ဦးက တောင်းဆိုထားသည်။
“အခု သူတို့ အရမ်းတင်းကြပ်လာတော့ သွားလာတဲ့သူ နည်းလာမယ်။ တချို့ဆေးရုံသွားတက်မယ် ဆိုရင် ကိုဗစ် ထောက်ခံစာမရှိလို့ မတက်လိုက်ရဘူး၊ မသေသင့်တဲ့သူလည်း သေရတယ်။ ဖြစ်နိုင်ရင်တော့ ဆေးရုံသွားတက်မယ့်သူကို ကိုဗစ်ထောက်ခံစာမရှိလည်း ခွင့်ပြုပေးဖို့ တောင်းဆိုချင်တယ် “ ဟု ၎င်းကုန်သည် တစ်ဦးက ပြောသည်။
အလားတူ အောင်ပန်းလမ်းခွဲ ဂိတ်တွင် ည (၆) နာရီ မှ မနက် (၆) အထိ ဂိတ်တွင် အသွားအလာများကို ပိတ်ပင်ထားပါသည်။
စစ်ကောင်စီတပ်ဖွဲ့များက ဆေးဝါးများ နှင့် စားနပ်ရိက္ခာများကို လုံလုံလောက်လောက် သယ်ယူခွင့် မပေးခြင်းများ ပြုလုပ်လာရာမှ ပင်လောင်းဒေသခံများနှင့်အတူ လွယ်ကျိုင့် စစ်ဘေးရှောင် (၆၀၀) ကျော်များ ဆေးဝါးများ၏ အခက်ခဲဖြင့်ကြုံနေရသည်။
Leave a Comments