အာဏာသိမ်း စစ်ကောင်စီ နှင့် စစ်ရေးတင်းမာမှုများ ရှိနေသည့် သျှမ်းပြည်တောင်ပိုင်း မိုင်းရှူးမြို့နယ်အတွင်း ပြည်သူကို ငဲ့ညှာပြီး တိုက်ပွဲရှောင်သည့်အနေဖြင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ကိုယ်စားလှယ်များ နေပြည်တော်သို့ ရောက်ရှိနေကြောင်း သတင်းသိရသည်။
ယင်းကဲ့သို့ သွားရောက်တွေ့ဆုံဆွေးနွေးမှုနှင့် ပတ်သက်ပြီး တိုက်ပွဲကြောင့် ပြည်သူများ ခက်ခဲမည့်ဖြစ်စဥ်ကို ရှောင်ရှားပြီး ဆွေးနွေးညှိနှိုင်းရေးဖြင့် ဖြေရှင်းရန် တွေ့ဆုံဆွေးနွေးခြင်းဖြစ်ကြောင်း SSPP ပြောရေးဆိုခွင့်ရှိသူ ဗိုလ်မှူး ဖုန်းဟန်က သျှမ်းသံတော်ဆင့်ကို ပြောသည်။
“ကျနော်တို့က ပြည်သူတွေရဲ့ အခက်အခဲနဲ့ ထိခိုက်နစ်နာမှုကိုရှေးရှုပြီး တိုက်ပွဲကို တိုက်နိုင်သမျှရှောင်တယ်၊ ဒါကြောင့် ဆွေးနွေးညှိနှိုင်းမှုကို လက်ခံခဲ့တာပေါ့” ဟု ဗိုလ်မှူးဖုန်းဟန်က ပြောသည်။
စစ်ကောင်စီ နှင့် ဆွေးနွေးရန်အတွက် ဒုဥက္ကဌ (၁) ဗိုလ်ချုပ်ကြီး ခေးတိုင်းနှင့် ဒုဥက္ကဌ (၂) ဗိုလ်ချုပ် ခွန်ဆိုင် တို့က ဦးဆောင်သည့် SSPP ကိုယ်စားလှယ် အဖွဲ့ဝင် စုစုပေါင်း ၁၀ ဦး ဝန်းကျင်သည် ယမန်နေ့ သြဂုတ်လ ၂ ရက်နေ့တွင် နေပြည်တော် သို့ ရောက်ရှိခဲ့ကြောင်း သတင်းသိရသည်။
SSPP ကိုယ်စားလှယ်အဖွဲ့များသည် မနက်ဖြန် သြဂုတ်လ ၄ ရက်နေ့တွင် စစ်ကောင်စီခေါင်းဆောင်နှင့် စတင် တွေ့ဆုံဆွေးနွေးမည်ဖြစ်ပြီး စစ်ကောင်စီ၏ ငြိမ်းချမ်းရေးဖော်ဆောင်ရေးကော်မတီ နှင့် ဆက်လက် တွေ့ဆုံဆွေးနွေးမည့်အကြောင်းလည်း ဗိုလ်မှူးဖုန်းဟန်က ပြောသည်။
“ကျနော်တို့ အနေနဲ့ win- win solution ဖြစ်တဲ့ ဆွေးနွေးညှိနှိုင်းမှုကိုပဲ မျှော်လင့်နေတာပါ၊ ဒီလိုဖြစ်မှပဲ ဆွေးနွေးညှိနှိုင်းခြင်း ပီသမှာလို့ ယုံကြည်တယ်၊ ဆွေးနွေးရမယ့် ဖြစ်စဥ်နဲ့ အသေးစိတ်အချက်အလက်တွေတော့ နောက်မှ ထုတ်ပြန်ပေးပါ့မယ်” ဟု ဗိုလ်မှူးဖုန်းဟန်က ပြောသည်။
SSPP ကိုယ်စားလှယ်များ နေပြည်တော်သို့ မသွားမှီအချိန်တွင် စစ်ကောင်စီမှ သျှမ်းပြည်အခြေစိုက် တိုင်းမှူးများသည် စစ်ရေးကွပ်ကဲရန် မိုင်းရှူးမြို့နယ်အနီးတစ်ဝိုက်သို့ ရောက်ရှိလာပြီး စစ်ရေးတင်းမာမှု မြင့်တက်လာခဲ့သော်လည်း လက်ရှိတွင် မိုင်းရှူးမြို့နယ်အတွင်းမှ ဆုတ်ခွာပြီး SSPP/SSA နှင့် စစ်ရေးတင်းမာမှုကို ဖြေလျှော့နေကြောင်း သတင်းသိရသည်။
ပြီးခဲ့သည့် ဇူလိုင် ၁၈ ရက်နေ့တွင်လည်း SSPP နှင့် စစ်ကောင်စီတို့ စစ်ဆင်ရေးမြင့်တက်နေသည့် မိုင်းရှူးမြို့နယ် အတွင်း အရပ်သား မောင်းလာသည့် ကားကို စစ်ကောင်စီ မှ သေနတ်ဖြင့် ပစ်ခတ်လိုက်သဖြင့် ကားပေါ်ပါလာသော မိသားစု (၃) ဦးစလုံး သေဆုံးသွားခဲ့ ရသည်။
