Thursday, May 30, 2024

မိုင်းကိုင်မြို့ လင်မယားနှစ်ဦး ဓားပြတိုက်ခံရ ပွဲချင်းပြီးသေဆုံး

Must read

သျှမ်းပြည်တောင်ပိုင်း မိုင်းကိုင်မြို့ ရပ်ကွက် (၆) လွိုင်လိုင်ရွာနေ လင်မယား နှစ်ယောက်သည် မိုင်းကျက်ဂူသို့ သွားရန် ဇူလိုင် ၃၁ ရက် ညနေခင်းတွင် ဓားပြတိုက်ခံရပြီး လည်လှီးသတ်ဖြတ်ခံရကြောင်း စုံစမ်းသိရသည်။

အဆိုပါ လင်မယားနှစ်ယောက်ဖြစ်သော ဦးစိုင်းလောဝ် အသက် (၅၈) နှစ်အရွယ်ဖြစ်ပြီး မယားဖြစ်သူ ပါလှအုံ အသက် (၆၂) နှစ်သည် မိုင်းကျက်ဂူသို့ သွားရန် ပြင်ဆင်နေစဉ် အိမ်တွင်း၌ ဓားပြတိုက်ခံရပြီး သတ်ဖြတ်ခံရကြောင်း မိုင်းကိုင်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဓားပြတိုက်ခံရပြီး လည်ပင်းမှာ ဓား ဒဏ်ရာရှိတယ်။ သူတို့လင်မယား နှစ်ယောက်လည်း ချမ်းသာသလောက်တော့ ရှိတယ်၊ သူတို့လင်မယား အဝတ်အထည်တွေ အကုန်ထုတ်ထားတယ်။ ရွှေ ငွေ တွေလည်း အကုန်ယူသွားတယ်။ ရွှေအတုတော့ ထားခဲ့ပြီး ယူသွားရတဲ့ဟာတွေ အကုန်လုံးကို ယူသွားတာ“ ဟု ၎င်း အမျိုးသားတစ်ဦးက ပြောသည်။

ပြီးခဲ့သည့် ဇူလိုင် (၃၀) ရက် ညနေခင်းအချိန်တွင်လည်း ၎င်းလင်မယားနှစ်ဦး နေအိမ်ရှိ ရပ်ကွက် (၆) တွင် သေနတ်ဖောက်သံ တစ်ချက်ကြားရသည်ဟု သိရသည်။

အလားတူ စစ်အာဏာသိမ်းပြီးနောက်ပိုင်း မိုင်းကိုင်မြို့တွင် စစ်ကောင်စီတပ်ဖွဲ့များ နှင့်အတူ သျှမ်းလက်နက်ကိုင် တပ်ဖွဲ့များ လှုပ်ရှားရာနယ်မြေဖြစ်သောကြောင့် ပြည်သူများ ကြောက်ရွံ့နေရပြီး လုံခြုံရေးအတွက် စိုးရိမ်နေရကြောင်း သိရသည်။

“ကျနော်တို့ လုံခြုံရေးက လုံးဝမရှိတော့ဘူးဗျ၊ ပြည်သူတွေလည်း အရမ်းကို ကြောက်နေပါပြီ။ စစ်ကောင်စီ တပ်ဖွဲ့တွေကော သျှမ်းလက်နက်ကိုင် အားလုံးတွေကိုလည်း ကြောက်ရတယ်။ သူခိုး၊ ဓားပြ တွေလည်း အရမ်းကို ကြောက်ရတယ်။ ဒီနှစ် ကျနော်တို့ မိုင်းကိုင်ကလူငယ်တွေ တခြားမြို့ကို ပြေးကုန်ကြပြီ၊ လူငယ် (၁၀) ယောက်ရှိရင် (၄) ယောက်ပဲ ကျန်တော့တယ်“ဟု ၎င်းက ထပ်လောင်းပြောသည်။

ထိုအပြင် မိုင်းကိုင်မြို့ လုယက်မှုများ ဖြစ်ပွားပြီးနောက် လယ်ထဲသို့ဆင်းရန် လုံခြုံမှုမရှိသောကြောင့် လယ်ယာ လုပ်ကိုင်သော တချို့တောင်သူလယ်သမားများသည် ဆက်မလုပ်တော့ဘဲ လယ်ယာများ ပစ်ထားခဲ့ရသည်ဟု သိရသည်။

Leave a Comments

- Advertisement -spot_img

Latest article