သျှမ်းပြည်မြောက်ပိုင်း ကျောက်မဲမြို့နယ် မိုင်းတင်းကျေးရွာအုပ်စု နှင့် သျှမ်းပြည်တောပိုင်းဘက်တွင် ရောက်ရှိနေသည့် ကျောက်မဲစစ်ရှောင်များ စားနပ်ရိက္ခာအကူအညီများ လိုအပ်နေကြောင်း သတင်းသိရသည်။
ပြီးခဲသည့် ၂၀၂၁ ခုနှစ်ကတည်းမှ မိုင်းတင်းကျေးရွာအုပ်စုအတွင်းသို့ ရောက်ရှိလာသည့် စစ်ရှောင် ၄၅ ဦးခန့် သည် ဝမ်းစာအတွက် ဒေသအတွင်း အငှားအလုပ်လုပ်ပြီး ဖြေရှင်းနေရကြောင်းနှင့် စားနပ်ရိက္ခာ အကူအညီများ လိုအပ်နေကြောင်း မိုင်းတင်းရွာခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဒေသအတွင်း ကောက်စိုက် အငှားအလုပ်လုပ်ပြီး စားဝတ်နေရေးကို ဖြေရှင်းနေကြရတယ်၊ အလုပ်မရှိတဲ့ ရက်တွေကျတော့ အရင်က အလှူရှင်တွေထောက်ပံ့ထားတဲ့ ဆန်၊ ဆီ၊ ဆားတွေကိုဝေမျှပြီးစားသောက်နေကြ ရတယ်” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။
လက်ရှိ စစ်ဘေးရှောင်များသည် မိုင်းတင်းကျေးရွာအုပ်စုအတွင်းရှိ အခြေခံပညာအထက်တန်းကျောင်း ခွဲ နှင့် နားမွန်း အမက ကျောင်းတို့တွင် ခိုလှုံနေထိုင်ကြရပြီး အလုပ်ရှားပါး မရှိသည့်အချိန်တွင် စားနပ်ရိက္ခာ အလွန် ခက်ခဲကြောင်း သတင်းသိရသည်။
ထို့အပြင် သျှမ်းတောင်ပိုင်း ရပ်စောက် နှင့် တောင်ကြီးမြို့နယ်အတွင်း ရောက်ရှိလာသည့် ကျောက်မဲဘက်မှ စစ်ဘေးရှောင်များလည်း ဝမ်းစာ လုပ်ကိုင်စားသောက်ရေးအတွက် ခက်ခဲနေကြောင်းလည်း သတင်းသိရသည်။
“သျှမ်းတောင်ဘက် စစ်ရှောင်လာတဲ့ ကျောက်မဲဒေသခံတွေ အခြေချနေထိုင်ဖို့ နဲ့ ဝမ်းစာရှာဖွေ စားသောက်ရေး တွေ အရမ်းခက်ခဲနေကြတယ်၊ တော်တော်များများက လက်ဖက်လုပ်ငန်း အလုပ်လုပ်ခဲ့ကြသူတွေဖြစ်ကြတယ် ဆိုတော့အခုလို နေရာအသစ်မှာ ပြောင်းတို့လိုမျိုး မြေပြန့်စိုက်ပျိုးရေးလုပ်ငန်းတွေက သူတို့အတွက် စိန်ခေါ်မှု ဖြစ်လာတယ်” ဟု စစ်ရှောင်များကူညီပေးနေသည့် တောင်ကြီးမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ၂၀၂၁ ခုနှစ် ကျောက်မဲမြို့နယ်အတွင်း ဖြစ်ပွားခဲ့သည့် မြောက်ပိုင်းမဟာမိတ်တပ်ဖွဲ့နှင့် သျှမ်းပြည် ပြန်လည်ထူထောင်ရေး ကောင်စီ၊သျှမ်းပြည်တပ်မတော် (RCSS/SSA) တို့၏ တိုက်ပွဲကြောင့် ကျောက်မဲမြို့နယ်မှ ဒေသခံပြည်သူများစွာတို့သည် ယနေ့ထက်တိုင် နေရပ်စွန့်ခွာပြီး စစ်ဘေးတိမ်းရှောင်နေဆဲဖြစ်သည်။
Leave a Comments