သျှမ်းပြည်တောင်ပိုင်း မိုင်းကိုင်မြို့နယ်မှ ဒေသခံအမျိုးသား တစ်ဦးသည် မိုင်းနင်းမိပြီး ထိခိုက်ဒဏ်ရာ ပြင်းထန်စွာ ရရှိသွားကြောင်း သတင်းသိရသည်။
ယမန်နေ့ (ဇူလိုင်လ ၂၀) ရက် ညပိုင်းတွင် ကျွဲသွားရှာသည့် စိုင်းစင်းသည် မိုင်းနင်းမိပြီး ဒဏ်ရာပြင်းထန်သည့် အတွက် ဆေးရုံသို့ ပိုဆောင်ထားရကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ညနေ ၄ နာရီလောက်မှာ ကျွဲသွားရှာရင်းနဲ့ မိုင်းနင်းမိတာတဲ့၊ ထိခိုက်ဒဏ်ရာလည်း တော်တော်များတယ်၊ ရင်ဘတ်ထိတော့ ပိုဆိုးတာပေါ့၊ ခြေထောက် နဲ့ လက်နှစ်ဖက်လုံးမှာလည်း ဒဏ်ရာပြင်းထန်တယ်၊ မိုင်းကိုင်ဆေးရုံ ကို အရင်ပို့တာ အခြေအနေဆိုးလို့ ဆိုပြီး လွိုင်လင် ခရိုင်ဆေးရုံကို ပြန်ပို့ထားရတယ်” ဟု အထက်ပါ အမျိုးသားက ပြောသည်။
မိုင်းနင်းမိသူ စိုင်းစင်းသည် ပန်ကေတု ကျေးရွာဒေသခံဖြစ်ပြီး အသက် ၃၀ ဝန်းကျင် ဖြစ်ကြောင်း နှင့် ဒဏ်ရာပြင်းထန်သည့်အတွက် မိုင်းကိုင်ဆေးရုံမှ လွိုင်လင်ခရိုင်ဆေးရုံသို့ ညတွင်းချင်း ပို့ဆောင်ထားရကြောင်း ၎င်းက ဆက်လက်ပြောဆိုထားသည်။
အဆိုပါ ပေါက်ကွဲမှုဖြစ်ပွားသည့် မိုင်းသည် မည်သည့်လက်နက်ကိုင်တပ်ဖွဲ့၏ လက်ချက် မသိရှိရသေးကြောင်း သတင်းသိရသည်။
၂၀၂၁ ခုနှစ် နှစ်ကုန်ပိုင်း မှစပြီး လက်ရှိအချိန်ထိ မိုင်းကိုင်မြို့နယ်အတွင်း မိုင်းနင်းမိသူ ၁၀ ဦး အထက်ရှိပြီး သေဆုံးသူ ၂ ဦးခန့်ရှိသည်။
မိုင်းကိုင်မြို့နယ် နှင့် အနီးပတ်ဝန်းကျင်တစ်ဝိုက်တွင် လှုပ်ရှားသည့် လက်နက်ကိုင် တပ်ဖွဲ့များ အနေဖြင့် အာဏာသိမ်း စစ်ကောင်စီ တပ်ဖွဲ့အပြင် တိုင်းရင်းသားလက်နက်ကိုင် တပ်ဖွဲ့တို့က သွားလာလှုပ်ရှားနေလျက်ရှိ ကြောင်း သိရသည်။
