သျှမ်းပြည်မြောက်ပိုင်း မိုးမိတ်မြို့နယ်အတွင်း ကျေးရွာတစ်ချို့တွင် ကချင်လွတ်မြောက်ရေးတပ်မတော် KIA နှင့် ပြည်သူ့ကာကွယ်ရေးတပ်ဖွဲ့ PDF တို့က ပြည်သူများကို လယ်ထွန်စက်မှ စက်မနိုးခိုင်းကြောင်း စုံစမ်းသိရှိရသည်။
အဆိုပါ လယ်ထွန်စက်နိုးခြင်းကြောင့် စစ်ကောင်စီ၏ လေယာဉ်ပျံဝဲသံ မကြားမှာကို စိုးရိမ်သောကြောင့် KIA နှင့် PDF တို့မှ လယ်ထွန်စက်မသုံးခိုင်းခြင်းဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။
“ကျနော်တို့ဆိုင်းလျန်ရွာမှာက ရေတွေ စပါးကို လာမြှုပ်တယ်။ တစ်ချို့အိမ်ဆို စပါးကို မရိတ်သိမ်းလိုက်ရသေးတော့ ပျက်စီးသွားတယ်။ အစကနေအသစ်ပြန်လုပ်မယ်ဆိုတော့ KIA နှင့် PDF တပ်ဖွဲ့က လယ်ထွန်စက်အသံမထွက်ရဘူးလို့ပြောထားတယ်။ ကျနော်တို့ ပြည်သူတွေဘာမှ လုပ်လို့မရဘူး။ ရပ်ထားလိုက်ရတယ်။ သူတို့ တားဆီးလာတာတော့ ၃ ရက်လောက်တော့ ရှိပါပြီ။ ဒီအတောအတွင်း ဘာစက်အသံမှ မထွက်စေနဲ့တဲ့” ဟု နေရာဒေသ အမည်မဖော်လိုသည့် ဒေသခံအမျိုးသားတစ်ဦးက ပြောသည်။
အလားတူ စင့်ကင်ကျေးရွာ နှင့် သရက်တောကျေးရွာတွင်လည်း စက်နိုးသံမထွက်ခိုင်းကြောင်း၊ ထိုဒေသတွင် စစ်ကောင်စီတို့တပ်ဆွဲထားပြီး လက်ရှိမှာ KIA နှင့် PDF တို့က ထိုကျေးရွာကို ဝိုင်းထားကြောင်းသိရသည်။
ထိုသို့ လယ်ယာလုပ်ချိန်တွင် လယ်ထွန်စက်မသုံးခိုင်းသောကြောင့် ပြည်သူများအတွက် ခက်ခဲနေကြောင်း သိရသည်။
“ ဒီစင့်ကင်ကျေးရွာထဲမှာက စစ်ကောင်စီတွေရှိတယ်။ ရွာပတ်လည်မှာ KIA နဲ့ PDF တို့ကဝိုင်းထားတယ်။ လေယာဉ်လာရင် အသံမကြားမှာဆိုလို့ ပြီး လယ်ထွန်စက်တွေ မနိုးခိုင်းထားတာ။ သူတို့ ဒီလိုမလုပ်ခိုင်းတော့ ကျနော်တို့ အလုပ်လုပ်တဲ့ချိန်မှာခက်ခဲတယ်” ဟု မိုးမိတ်မြို့နယ် ဒေသခံတစ်ဦးက ပြောသည်။
ထိုအပြင် ဆိုင်းလျန် (သဲနီကျေးရွာ)တွင်လည်း စစ်ကောင်စီက စစ်အင်အားဖြည့်နေကြောင်းသိရသည်။
အဆိုပါ KIA နှင့် PDF တပ်ဖွဲ့တို့က မိုးမိတ်မြို့နယ်အတွင်းရှိ ဆိုင်းလျန်(သဲနီကျေးရွာ)၊ စင့်ကင်ကျေးရွာ နှင့် သရက်တောကျေးရွာတို့ကို စက်သံများမထွက်စေရန်အတွက် ပြောဆိုထားကြောင်းသိရသည်။
