သျှမ်းပြည်မြောက်ပိုင်း ဟိုပန်မြို့နယ် ပန်ယောင်းကျေးရွာ လူနာတစ်ဦးသည် လားရှိုးမြို့သို့ ဆေးကုရန် အတွက် ရောက်ရှိလာစဥ် ကိုဗစ် – ၁၉ ပိုးစစ်ဆေးတွေ့ရှိခဲ့ကြောင်း စုံစမ်းသိရသည်။

ပြီးခဲ့သည့် ဇူလိုင်လ ၁၇ ရက်တွင် လားရှိုးသို့ ဆေးကုသမှုခံယူရန်အတွက် ပန်ယောင်းရွာ ဒေသခံများသည် ဟိုပန်ဆေးရုံမှ လူနာတင်ကားဖြင့် လားရှိုးပြည်သူ့ဆေးရုံကြီးသို့ ရောက်ရှိလာကြောင်း လားရှိုးမြို့ Covid-19 Operation Team မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“လားရှိုးဆေးရုံကြီးကိုရောက်လာပြီး ရောဂါအခံရှိထားတဲ့သူကို RDT နဲ့စစ်လိုက်တဲ့အချိန် ကိုဗစ် ပိုးတွေ့လို့ ကိုဗစ် လူနာသီးသန့်ဆောင် ပို့နေစဉ်မှာပဲ သေဆုံးသွားပါတယ်၊ သူနဲ့ပါလာတဲ့ မိသားစုဝင် အမျိုးသမီးငယ် တစ်ဦးထံလည်း ကိုဗစ်ပိုးထပ်တွေ့တယ်၊ ကိုဗစ် – ၁၉ ပိုးပါ အသစ်ထပ်ထွက်လာတဲ့ ပိုးမဟုတ်ပါဘူး” ဟု အထက်ပါ ပုဂ္ဂိုလ်ကပြောသည်။

လက်ရှိတွင် ကိုဗစ် – ၁၉ ပိုးစစ်ဆေးတွေ့ရှိသည့် သေဆုံးသူ အတည်ပြုလူနာ မိသားစုဝင် အမျိုးသမီးကို လားရှိုးပြည်သူ့ဆေးရုံကြီး ကိုဗစ်-၁၉ လူနာ သီးသန့်စောင့်ကြည့် ကုသဆောင်မှာ ထားရှိပြီး ကုသမှုများ ခံယူနေကြောင်းလည်း အထက်ပါ ပုဂ္ဂိုလ်က ပြောသည်။

“ပိုးထပ်တွေ့တဲ့ မိသားစုဝင်က မိန်းကလေးတစ်ဦးတည်း ဖြစ်နေလို့ မိသားစုဝင် အကိုဖြစ်သူက လူနာစောင့် လုပ်ပေးနေပါတယ်။ လားရှိုးဆေးရုံကြီး ကိုဗစ် လူနာ သီးသန့်ဆောင်မှာပဲထားထားပါတယ်” ဟု ၎င်းက ပြောသည်။

ထို့အပြင် ပိုးတွေ့လူနာနှင့်ထိစပ်သည့် မိသားစုဝင်များနှင့် လိုက်ပို့လာသည့် ဟိုပန်မြို့မှ ယာဉ်မောင်းများ လားရှိုးမြို့ ခရိုင်ကျန်းမာရေးရုံးမှာ ကွာရန်တင်း ထားရှိကြောင်းလည်း သတင်းသိရသည်။

လက်ရှိတွင် ကွာရန်တင်းဝင်ထားရသည့် ပိုးတွေ့လူနာများ အပါအဝင် ထိစပ်သူများ၏ စာရေးသောက်ရေးနှင့် ဆေးဝါးများကို လားရှိုးမြို့ Covid-19 Operation Team နှင့် အလှူရှင်တစ်ချို့မှ ကူညီဆောင်ရွက်မှုများ ပြုလုပ်နေကြောင်း သတင်းသိရသည်။

ယင်းကဲ့သို့ ကိုဗစ် – ၁၉ ပိုးတွေ့လူနာ တစ်ဖန် ပြန်လည်တွေ့ရှိလာခြင်းနှင့် ပတ်သက်ပြီး လားရှိုးမြို့ Covid-19 Operation Team အဖွဲ့ဝင်တစ်ဦးက ပြည်သူများ သွားရေးလာရေးနှင့် ကျန်းမာရေး ဂရုစိုက်မှုများကို အထူးဂရုစိုက်ရန် လိုအပ်ကြောင်း ပြောဆိုထားသည်။

ကိုဗစ် – ၁၉ ရောဂါပျံ့နှံ့ကူးစက်မှုသည် ပြီးခဲ့သည့် မတ်လအတွင်းမှ စတင်ကာ ကူးစက်မှုများ လျှော့ကျလာပြီး ယခုတစ်ဖန် ပိုးတွေ့လူနာများပြန်လည်တွေ့ရှိလာခြင်းဖြစ်သည်။