သျှမ်းပြည်မြောက်ပိုင်း သီပေါမြို့နယ် အတွင်းရှိ ကျွဲ ၊ နွားများတွင် အရေပြားအနာကျိတ် ရောဂါများဖြစ်ပွားနေကြောင်း စုံစမ်းသိရှိရသည်။
သီပေါမြို့နယ် ဆောင်ကြဲကျေးရွာအုပ်စု ၊ဆီထောက်ကျေးရွာအုပ်စု နှင့် စိန်ကျော့ကျေးရွာအုပ်စုအတွင်းရှိ ကျွဲ ၊နွားများတွင် အရေပြားအနာကျိတ် ရောဂါများ ဖြစ်ပွားကာ (၃-၄) လခန့်ကြာပြီး သေဆုံးမှုများရှိကြောင်း ဒေသခံပြောပြချက်အရသိရသည်။
ထိုသို့ ကျွဲ ၊နွားများ အရေပြား အနာကျိတ်ရောဂါများ ဖြစ်ပွားခြင်းကြောင့် ဒေသခံများ လယ်ယာလုပ်ကိုင်ရန် အတွက် ခက်ခဲနေကြောင်း ဆီထောက်ဒေသခံ ဦးလုံးစိုင်းက သျှမ်းသံတော်ဆင့်ကို ပြောသည်။
“ကျနော့် နွားတော့ ဆေးထိုးပြီးနည်းနည်း သက်သာလာပြီ ။ ဒီရောဂါက ဘာရောဂါမှန်းလည်း မသိဘူး။ နွားရဲ့အရေခွံမှာ အဖု့တွေအများကြီး ပေါက်နေတာ။ ကျနော့် နွားက ၅ ကောင်လောက် ဒီလိုရောဂါမျိုးကိုဖြစ်နေတယ် ၊ ကျွဲတွေတော့ ဒီနောင်ခွန်မှာ ဖြစ်တယ်“ ဟု ၎င်းဒေသခံ တစ်ဦးကဆိုသည်။
အဆိုပါ အရေပြား အနာကျိတ်ရောဂါများသည် ဆောင်ကြဲကျေးရွာအုပ်စု ဆိုင်လဲရွာတွင် ကျွဲ၊ နွားများ အကောင် (၄၀) ဝန်းကျင် သေဆုံးခဲ့ကြောင်း သိရသည်။
ထို ကျွဲ ၊ နွားများ ကူးစက်ခံရသော ရောဂါသည် ၎င်းအရေပြားပေါ်တွင် အဖု့များဖြင့် ပြည့်နှက်နေပြီး (၅) ရက်မြောက် ဖြစ်ပွားလာချိန်တွင် ထိုအဖု့များပေါက်ပြီး နောက်ဆုံး သေဆုံးသွားကြသည်။
“ အစကထင်တာတော့ အပူချိန်ကြောင့်လို့ပဲ ထင်တယ်။ ဒီ (၅-၆) လ လောက်ဖြစ်လာတာ ဗိုင်းရပ်စ်ရောဂါအသစ်ပဲ။ အစက ဆိုင်လဲ ကနေစဖြစ်တာ အခုတော့နေရာတိုင်းကို ဖြစ်နေပြီ” ဟု ဆောင်ကြဲဒေသခံ တိရိစ္ဆာဆန်ကျန်းမာရေးအဖွဲ့မှ တာဝန်ခံတစ်ဦးက ပြောသည်။
ကျွဲ၊နွား အရေပြားအဖု့ကြောင့် ဆိုင်လဲကျေးရွာမှ နွား (၅) ကောင်သေသွားပြီး ကူးစက်ခံရတာတော့ (၃၅) ကောင်ခန့်ရှိပြီး၊ မန်ကိတ်ရွာတွင်လည်း (၃) ကောင်ခန့် ကူးစက်ကြောင်း သိရသည်။
“လူတွေက ထိတွေ့မိမယ် တစ်ခါတစ်လေ စားမိမယ်ဆို လူတွေကို ကူးစက်သွားမှာလည်း ကြောက်ရတယ်။ ဒီရောဂါလည်း အခုမှပေါ်လာစဆိုတော့ သူ့ဗီဇကိုကောင်းကောင်းမသိဘူး။ စစ်ဆေးရမယ်လေ ၊ ပိုးသတ်ဆေးသုံးမယ်ဆိုရင်လည်း မထိရောက်ဘူး၊နွားတွေမှာ ဒီရောဂါကို ကူးစက်လာပြီဆိုရင်လည်း ရောပြီး မထိတွေ့ နဲ့ လူကိုကူးစက်သွားမှာကို စိုးရိမ်ရတယ် “ ဟု တိရိစ္ဆာန်ကျန်းမာရေးအဖွဲ့က ဆိုသည်။
သီပေါမြို့ရှိ ၎င်းကျေးရွာများသည် လယ်၊ ယာများကို အဓိအားဖြင့် လုပ်ကိုင်လျက်ရှိပြီး နွားတစ်ကောင် ဈေးနှုန်းမှာ (၆၀၀၀၀၀) ကျပ် ၊ ကျွဲမှာ (၅၀၀၀၀၀) ကျော်အထိ ရှိသဖြင့် ယခုကာလ စက်သုံးဆီများ မြှင့်တက်လာခြင်းကြောင့် လယ်ထွန်လျှင် ကျွဲ ၊ နွားများကို ပြန်လည်အသုံးပြုနေရသည်။
