သျှမ်းပြည် မြောက်ပိုင်း သီပေါမြို့တွင် တလ ကျော်ကြာ ပျောက်ဆုံးနေသည့် အမျိုးသမီး၏ မိဘများကို အမည်မသိလက်နက်ကိုင် တပ်ဖွဲ့က မြန်မာကျပ်ငွေ ၁၅ သိန်း ခြိမ်းခြောက်တောင်းဆိုခဲ့ကြောင်း စုံစမ်းသိရသည်။

သီပေါမြို့နယ် အုမ်မူ့ကျေးရွာအုပ်စု ဝမ်တက်နားမွန်ကျေးရွာနေ အသက် ၁၉ နှစ် အရွယ်ရှိ နန်းခမ်းအောင်သည် လွန်ခဲ့သည့် ဇွန် ၂ ရက် တွင် သူငယ်ချင်းထံ သွားမည်ဟုဆိုပြီး ယနေ့ထိ အိမ်ပြန်မရောက်ဘဲ ပျောက်ဆုံးသွားခဲ့သည်။

ထိုသို့ ပျောက်ဆုံးပြီးနောက် နန်းခမ်းအောင်ကို ပြန်လိုချင်ပါက မြန်မာကျပ်ငွေ ၁၅ သိန်းဖြင့် လာရောက် ရွေးရန် သူမ၏ မိဘများထံ အမည်မသိ အမျိုးသားတစ်ဦးက ဖုန်းဆက်ပြီး ခြိမ်းခြောက်ပြောဆိုခဲ့ကြောင်း ပျောက်ဆုံးနေသည့် အမျိုးသမီး၏ ညီမဖြစ်သူက သျှမ်းသံတော်ဆင့်ကို ပြောပြသည်။

“လွန်ခဲ့တဲ့ ၂ ရက် ၃ ရက်လောက်က ကျမတို့ အဖေဆီကို အမျိုးသားတစ်ဦးက ဖုန်းဆက်လာပြီး ဗမာစကားနဲ့ ခင်ဗျားတို့ သမီးကို ပြန်လိုချင်ရင် ပိုက်ဆံ ၁၅ သိန်းလွှဲပေးရမယ်။ ပြီးတော့ ပြောလိုက်သေးတယ် သမီး (ပျောက်ဆုံးသူ) ကိုပြန်လိုချင်လား၊ မလိုချင်ဘူးလား၊ မလိုချင်ရင် သတ်ပစ်ပြီးခွေးစာကျွေးလိုက်မှာတဲ့” ဟု ၎င်း၏ ညီမဖြစ်သူက ပြန်ပြောပြလာသည်။

ဆက်လက်ပြီး ဖုန်းဆက်လာသည့် အမျိုးသားကို ၎င်း၏ ဖခင်ဖြစ်သူမှ သမီး (နန်းခမ်းအောင်) သည် မည်သည့်နေရာရောက်နေသည်ကို မေးမြန်းသည့်အခါ ရိုင်းစိုင်းစွာ ဆဲဆိုပြီး ဖုန်းချသွားကြောင်းလည်း ၎င်းက ဆက်လက်ပြောသည်။

ပျောက်ဆုံးနေသူ နန်းခမ်းအောင်ကို မည်သည့်နေရာ မည်သည့်အချိန်တွင် သွားရောက်တွေ့ဆုံနိုင်ကြောင်း မေးမြန်းရာတွင်လည်း တစ်ဖက်မှ ဖြေကြားပေးနိုင်ခြင်း မရှိသည့်အတွက် မိဘများကလည်း ငွေကြေးလိမ်လည် ခြိမ်းခြောက်တောင်းဆိုခြင်းအဖြစ် နားလည်သိရှိလိုက်ကြောင်းလည်း ညီမဖြစ်သူက ပြောသည်။

“ဖုန်းစ ဆက်လာ တုန်းကတော့ အစ်မကို (ပျောက်ဆုံးသူ) တွေ့ချင်စောနဲ့ သူ့စကားတွေ ယုံပြီး သူတောင်းထားတဲ့ ပိုက်ဆံတောင် လွှဲပေးမလို့ပဲ၊ ဒါပေမယ့် ဘယ်နေရာဘယ်အချိန်မှာ အစ်မနဲ့ တွေ့ရမယ်လို့ သူက မပြောနိုင်တော့ ကျမတို့လည်း မယုံကြည်တော့တာ၊ ကျမသူငယ်ချင်းကလည်း ကျမတို့ကို အသိပေးတာ မြန်လို့ပေါ့” ဟု ၎င်းက ပြောသည်။

နန်းခမ်းအောင်၏ မိဘများထံ ဖုန်းဆက် ခြိမ်းခြောက်ငွေတောင်းသည့် ဖုန်းနံပတ်သည် 09-949-135-168 ဖြစ်သည်။

၎င်း ပျောက်သွားစဥ်တွင် တွေ့ရှိပါက အကြောင်းကြားပေးရန် ပုံနှင့်တကွ ဆက်သွယ်ရမည့် ဖုန်းနံပါတ် များပါ ထည့်သွင်းပြီး လိုင်းပေါ်တင်ထားသည့်အတွက် မသမာသူများက အခွင့်အရေးကို အသုံးချကာ ငွေကြေး ခြိမ်းခြောက်တောင်းခံမှုများ ပြုလုပ်နေခြင်း ဖြစ်ကြောင်း နန်းခမ်းအောင်၏ ညီမဖြစ်သူက ဆက်လက်ပြောသည်။

နန်းခမ်းအောင်သည် သီပေါမြို့ နားမွန်းကျေးရွာနေ လုံးစိုင်းအောင်လ နှင့် ပါနန်းခမ်းအိမ်တို့၏ သမီးအကြီး ဖြစ်သည်။

ထိုနည်းတူ ဇွန်လ ၂၁ ရက်နေ့မှာလည်း ကွတ်ခိုင်မြို့မှ လူငယ်တစ်ဦး အဆက်အသွယ်မရ ပျောက်ဆုံး ပြီးနောက်တစ်နေ့တွင် အမည်မသိလူတစ်စုမှ အဆိုပါ ပျောက်ဆုံးလူငယ်ပြန်လိုချင်ပါက ပိုက်ဆံနှင့် လာရောက် လဲလှယ်ရန် ပြောဆို ခြိမ်းခြောက်မှုများ ရှိနေကြောင်းသိရသည်။

ပြီးခဲ့သည့် လပိုင်းတွင်လည်း ကွတ်ခိုင်မြို့နေ ကလေးငယ်တစ်ဦးကို အမည်မသိ အဖွဲ့မှ ပြန်ပေးဆွဲသတ်ဖြတ်ခဲ့သည့်ဖြစ်စဥ်များ ဖြစ်ပွားခဲ့ဖူးသည်။

စစ်တပ်မှ နိုင်ငံတော်အာဏာသိမ်းပြီးနောက်ပိုင်းတွင် သျှမ်းပြည်အပါအဝင် တစ်နိုင်ငံလုံးမှ တရားဥပဒေစိုးမိုးမှုများ ကင်းမဲ့လာပြီး ဥပဒေမဲ့ လုပ်ရပ်များလည်း တစ်နေ့တစ်ခြား ပိုမိုများပြားသည်။