သျှမ်းပြည်တောင်ပိုင်း တောင်ကြီးမြို့အတွင်း ယာဥ်ရပ်နားခများကို ယခင်ကထက် အဆမတန်ကောက်ယူနေကြောင်း စုံစမ်းသိရသည်။
တောင်ကြီးမြို့နယ် စည်ပင်သာယာရေး ကော်မတီမှ ယခင်စစ်အာဏာမသိမ်းခင်တွင် ယာဉ်ကြီး (၅၀၀)ကျပ် ၊ ယာဉ်ငယ် (၃၀၀) ၊ ဆိုင်ကယ် (၂၀၀) ကျပ်နှင့် စက်ဘီးတစ်စီးလျှင် (၁၀၀) ကျပ်ဟု သတ်မှတ်ထားခဲ့သည်။
စစ်အာဏာသိမ်းပြီး (၁) နှစ်ကျော်အတွင်း တောင်ကြီးမြို့ရှိ ဈေးများ နှင့်လမ်းမကြီးဘေးတွင် ယခုကာလအတွင်း သတ်မှတ်နှုန်းထက်ကို အဆမတန် ကောက်ခံနေကြောင်း တောင်ကြီးဒေသခံ အမျိုးသမီးတစ်ဦးက သျှမ်းသံတော်ဆင့် ကိုပြောသည်။
“ အရင်ကတည်းက ဈေးထဲမှာ စည်ပင်ကကောက်တာ ပြေစာရွက်ပေးတယ် ။ အခုက ပြေစာလည်း မပေး ကောက်ချင်သလို ကောက်နေတယ်။ တချို့ကလည်း ဆိုင်ကယ်ကို (၅၀၀) လောက်ပေးရတဲ့ သူလည်း ရှိတယ်။ လူတိုင်းစားဝတ်နေရေး ခက်ခဲနေချိန်မှာ (၅) မိနစ်လောက်သွားရပ်လည်း ကောက်နေတော့ အဆင်မပြေတော့ဘူး“ ဟု ၎င်းကပြောသည်။
အဆိုပါ တောင်ကြီးမြို့ပေါ် ရှိ ယာဉ်ရပ်နားခ ကောက်လာသည့်အပြင် စတိုးဆိုင်ရှေ့ ရပ်ထားသည့် ယာဉ်များအပါအဝင် ကောက်ခံနေကြောင်း ၎င်းက ဆိုသည်။
ယာဉ်ရပ်နားချိန် တစ်နာရီအထက် အပ်နှံထားသော ယာဉ်များကို (၁) နာရီလျှင် (၁၀၀) ကျပ်နှုန်းဖြင့် ယာဥ်ရပ်နားခွန်ပေးဆောင်ရမည်ဖြစ်ကြောင်း တောင်ကြီးမြို့နယ်စည်ပင်က သတ်မှတ်ခဲ့သော်လည်း လက်ရှိမှာ ယာဥ်ရပ်နားခကို ကြုံသလို ကောက်ခံနေကြောင်း၊ စျေးနှုန်းမှာလည်း အတိအကျမရှိကြောင်း တောင်ကြီး ဒေသခံများ ပြောပြချက်အရသိရသည်။
ယခုကာလ စားဝတ်နေရေးအတွက် ခက်ခဲနေချိန် ယာဉ်ရပ်နားခ အဆမတန်ကောက်ခံလာခြင်းကြောင့် ဒေသခံများလည်း ပိုခက်ခဲလာကြောင်း တောင်ကြီးလူငယ်တစ်ဦးက ဆိုသည်။
“ဒီလိုခက်ခဲနေချိန်မှာ ယာဥ်ရပ်နားခကို ကောက်ချင်သလိုကောက်တယ်။ ပိုကောက်တယ်။ မရှိတဲ့သူအတွက် ပိုခက်သွားတယ်” ဟု ၎င်းလူငယ်က ဆက်ပြောသည်။
စစ်အာဏာသိမ်းလာပြီးနောက် သျှမ်းပြည်ရှိ စည်ပင်များသည် ယာဥ်ရပ်နားခကို ယခင်ကထက် အဆမတန်ကောက်လာသည့်အပေါ် ဒေသခံများမှ သက်ဆိုင်ရာသို့ တိုင်ကြားရန် ခက်ခဲနေကြောင်း သိရသည်။
ထိုအပြင် တောင်ကြီးမြို့ပေါ် ခရီးသွားလာသူများအနေဖြင့် ဧည့်စာရင်းမတိုင်ပါက ငွေကြေး တောင်းခံမှုများ လည်းရှိပြီး ဆိုင်ကယ်ဉီးထုပ်နှင့် ဆိုင်ကယ်နံပါတ်ပြား မပါသူများကို (၂၀၀၀၀) အထက်ကောက်ခံလျက်ရှိ ကြောင်းသိရသည်။
Leave a Comments