သျှမ်းပြည်တောင်ပိုင်း ဖယ်ခုံမြို့အတွင်း ယမန်နေ့ ဇူလိုင် (၁၀) ရက်တွင် ပြည်သူ့ကာကွယ်ရေးတပ်ဖွဲ့ PDF နှင့် စစ်ကောင်စီတို့ ပစ်ခတ်မှုဖြစ်ပွားခဲ့ပြီး ယနေ့အချိန်ထိ နှစ်ဖက်တပ်များ စစ်ရေးတင်းမာနေသေးကြောင်း စုံစမ်းသိရသည်။
ယမန်နေ့ ဖယ်ခုံမြို့လယ်ရှိ ရဲစခန်း နှင့် ထွေအုပ်ရုံးကို ဖယ်ခုံမြို့နယ် ပြည်သူ့ကာကွယ်ရေးတပ်ရင်း ၂ မှ လက်နက်ကြီးဖြင့် ဝင်ရောက်ပစ်ခတ်ခဲ့ပြီးနောက် စစ်ကောင်စီက မြို့တွင်းရမ်းသမ်းပစ်ခတ်ခဲ့ကြောင်း သိရသည်။
“ မနေ့က ဖယ်ခုံ PDF တပ်ရင်း ၂ က ရဲစခန်းနဲ့ ထွေအုပ်ရုံးတွေကို ပစ်ခတ်လိုက်တာ။ ပြီးတော့ နောက်ပိုင်းမှာ စစ်သားတွေက ဆင်းလာပြီးမြို့ထဲကို သေနတ်ပစ်ဖောက်လိုက်တာ။ ရမ်းသမ်းပစ်ခတ်ခဲ့တာ။ လူတွေ ထိခိုက်မှုတော့ မရှိဘူး” ဟု ဖယ်ခုံမြို့ ဒေသခံ အမျိုးသားတစ်ဦးက ပြောသည်။
အလားတူ ယနေ့ ဇူလိုင် ၁၁ ရက်တွင် ဖယ်ခုံမြို့အဝင် လဝှဲကျေးရွာထဲကို စစ်ကောင်စီက မနက် ၅ နာရီမှ နေ့လည် ၁၁ နာရီအထိ ရွာအတွင်း တပ်ဆွဲနေထိုင်ခဲ့ကြောင်း သိရသည်။
“သူတို့ ဒီနေ့ မနက် လဝှဲကျေးရွာထဲကို မနက်အစောကြီးဝင်လာတာ။ ကျနော်တို့ထင်တာတပ်စွဲပြီး လာနေမလို့လားလို့။ နေ့လည် ၁၁ နာရီလောက်တော့ သူတို့တပ်ထဲပဲပြန်သွားနေလိုက်တာ။ လဝှဲကျေးရွာက ဖယ်ခုံမြို့အဝင်နားပဲရှိတာ” ဟု လဝှဲကျေးရွာဒေသခံ အမျိုးသားတစ်ဦးက ပြောသည်။
လက်ရှိမှာ စစ်ကောင်စီ နှင့် KNDF တို့ စစ်ရေးတင်းမာနေလျက်ရှိပြီး၊ ဖယ်ခုံမြို့တွင်း စစ်ကောင်စီ နှင့် PDF တို့ တိုက်ပွဲဖြစ်ပွားမှုသည် ပထမဆုံးအကြိမ်ဖြစ်ကြောင်း သိရသည်။
Leave a Comments