သျှမ်းပြည်တောင်ပိုင်း မိုးနဲမြို့နယ်အတွင်း မိုးသည်းထန်စွာ ရွာသွန်းမှုကြောင့် ရေကြီးကာ စိုက်ပျိုးထားသည့် စပါးများ ပျက်စီးသွားကြောင်း စုံစမ်းသိရှိရသည်။
ယခုရက်ပိုင်း မိုးနဲမြို့နယ်ထဲတွင် မိုး ၄ – ၅ ရက် ဆက်တိုက်ရွာသွန်းမှုကြောင့် လယ်ယာထဲ ရေကြီးလာပြီး ပြည်သူများ စိုက်ပျိုးထားသည့် စပါးများ ရေထဲမျောပါသွားပြီး အရှုံးပေါ်နေကြောင်း သိရသည်။
“မိုးကနေ့တိုင်း ဆက်တိုက်ရွာနေတော့ ချောင်းရေကတက်လာတယ်။ ကျနော်တို့ လယ်တွေရေမြှုပ်သွားတာ။ တစ်ချို့လယ်သမားတွေဆို သူတို့ စပါးပျိုးပင်တွေကို စိုက်တော့မယ်။ မိုးကြီးတော့ မစိုက်ရသေးဘူး။ အဲ့ပျိုးပင်တွေလည်း ရေထဲအကုန်ပါသွားတယ်။ တစ်ချို့လယ်သမားတွေက အရှုံးတောင်ပေါ်တယ်” ဟု မိုးနဲမြို့ ဒေသခံ အမျိုးသားက ပြောသည်။
ထိုသို့ မိုးရေကြီးမှုကြောင့် ပြည်သူများ စပါးစိုက်ပျိုးရန် ခက်ခဲသောကြောင့် လယ်ယာကို အသစ်တစ်ဖန် ပြန်လည်စိုက်ပျိုးနေရကြောင်း သိရသည်။
“အခုတော့ မိုးက တိတ်သွားပြီး။ မိုးရွာတုန်းကဆိုရင် ပြည်သူတွေ လယ်ထဲကိုတောင် မသွားနိုင်ကြဘူး။ ဒီတစ်ခါ ရေကြီးတာကတော့ အရင်နှစ်တွေထက်ဆိုးတယ်။ ဒီတစ်ခါ ရေကြီးတာ လယ်ကွက်တွေကိုတောင် မမြင်ရတော့ဘူး။ တစ်ချို့ဆိုရင် လယ်ကို အသစ်ကနေ ပြန်စိုက်ရတာရှိတယ်။ လယ်ပြန်ထွန်ရတာပေါ့” ဟု အထက်ပါ ဒေသခံတစ်ဦးက ပြောသည်။
မိုးနဲမြို့နယ်အတွင်း ယခင်က ကျောက်မီးသွေးတူးဖော်ရန် အတွက် သစ်ပင်များကို ခုတ်ယူပြီးနောက်ပိုင်း သဘာဝပတ်ဝန်းကျင် ပျက်စီးလာခဲ့သဖြင့် မိုးရာသီတွင် ရေကြီးရေလျှံပြီး နွေရာသီတွင် ရေခန်းခြောက်မှု ကြုံနေရသည်။
Leave a Comments