ထိုင်းနိုင်ငံတွင် တရားမဝင်သွားရောက် အလုပ်လုပ်ကိုင်ကြသော မြန်မာ၊ လာအို၊ ကမ္ဘောဒီးယား နှင့် ဗီယက်နမ် လုပ်သားများကို ထိုင်းအစိုးရအဖွဲ့မှ ပန်းရောင်ကဒ်အသစ်ပြုလုပ်ပေးမည် ဖြစ်ကြောင်း စုံစမ်းသိရှိရသည်။
ထိုင်းနိုင်ငံတွင် တရားမဝင်သွားရောက် အလုပ်လုပ်ကိုင်ကြသော လုပ်သားများကို ပန်းရောင်ကဒ် အသစ်ပြုလုပ် ပေးရန် ထိုင်းအစိုးရအဖွဲ့မှ အတည်ပြုပြီးနောက် ထိုင်းအစိုးရအဖွဲ့မှ ပြောခွင့်ရသူ ဓနကော် ဝမ်ဘွန်ချန်သည် ယမန်နေ့ ဇူလိုင် ၅ ရက်တွင် ပြောကြားပြီး ထုတ်ပြန်ချက်မှ သိရသည်။
ထိုင်းနိုင်ငံတွင် တရားမဝင်သွားရောက် အလုပ်လုပ်ကိုင်သူများကို ပန်းရောင်ကဒ်အသစ်ကို ပြုလုပ်ပေးခြင်းဖြစ်ကြောင်း ချင်းမိုင်မြို့တွင်း အလုပ်သမားကဒ် လုပ်ဆောင်ပေးသူတစ်ဦးက သျှမ်းသံတော်ဆင့်ကို ပြောသည်။
“ပန်းရောင်ကဒ်ကတော့ တကယ်လုပ်ပေးမယ်ထင်တယ်၊ အချိန်အတိကျကိုတော့ မသိရသေးဘူး၊ အခုလ ကတော့ အလုပ်သမားကဒ် (work permit) စာအုပ်ကိုလည်း မလုပ်ပေးသေးဘူး၊ လာမယ့် နောက်လတော့ အားလုံးပုံမှန်အတိုင်း ပြန်လုပ်ပေးမယ် ထင်တယ် “ဟု ၎င်းက ပြောသည်။
ထိုနောက် ပန်းရောင်ကဒ် လုပ်ကိုင်ရသည့် အဆင့်များမှာ အလုပ်အကိုင် ရှာဖွေရေးဦးစီးဌာနတွင် အမည်စာရင်း (Name list) တင်ရခြင်း ၊ ရက် (၆၀) အတွင်း အလုပ်လုပ်ကိုင်ခွင့်လက်မှတ် (work permit) လျှောက်ထားရ မည်ဖြစ်ပြီး လုပ်သားအမည်စာရင်း နှင့် အလုပ်လုပ်ကိုင်ခွင့်လက်မှတ် (၁၀၀၀) ဘတ် ပေးဆောင်ရကြောင်း သိရသည်။
ထိုအပြင် ပြည်ပရောက် ထိုင်းနိုင်ငံတွင်း မြန်မာနိုင်ငံသားများအနေဖြင့် မိမိတို့၏ နိုင်ငံကူးလက်မှတ် (Passport) သက်တမ်းတိုး လုပ်ငန်းများကို သံရုံး၌ ပုံမှန်အတိုင်း လက်ခံဆောင်ရွက်ပေးလျက်ရှိကြောင်း ဘန်ကောက် အခြေစိုက် မြန်မာသံရုံး မှ ထုတ်ပြန် ကြေညာထားသည်။
သို့သော် ချင်းမိုင်မြို့ မြန်မာကောင်စစ်ဝန်ရုံးတွင် ယနေ့အချိန်ထိ နိုင်ငံကူးလက်မှတ် (Passport) ကို မလုပ်ပေးသေးပေ။
“ချင်းမိုင်မှာတော့ Passport စာအုပ်သက်တမ်းတိုးတာ အခုမလုပ်ပေးသေးဘူး။ ဘယ်ချိန်မှာ ပြန်ဖွင့်ပေးမှာလည်း သူတို့မပြောသေးဘူး။ သိရတာတော့ နောက်လတဲ့ သေချာလားတော့ ကျနော်မသိရသေးဘူး” ဟု ချင်းမိုင်မြို့မှ Passport သက်တမ်းတိုးမည့်သူတစ်ဦးက ပြောသည်။
ထိုင်းနိုင်ငံတွင် မြန်မာအလုပ်သမားများ ကိုင်ဆောင်ထားသည့် နိုင်ငံကူးလက်မှတ် (PJ) လက်မှတ် ၊ ထိုင်းနိုင်ငံ၌ မှီခိုဗီဇာဖြင့် နေထိုင်လျက်ရှိသော (PT) လက်မှတ် ၊ မြန်မာနိုင်ငံသား သင်္ဘောသားများ ကိုင်ဆောင်သည့် (PS) လက်မှတ်၊ ပြည်ပ၌ ပညာသင်ကြားလျက်ရှိသည့် ကျောင်းသား(PE) ကဒ်နှင့် သံဃာတော်များ ကိုင်ဆောင်သည့် နိုင်ငံကူးလက်မှတ် (PR) လက်မှတ် စသည့်လက်မှတ်များကို ပုံမှန်အတိုင်းပြန်လည် သက်တမ်းတိုးပေးခြင်းဖြစ်ကြောင်း ဘန်ကောက် မြန်မာသံရုံး ထုတ်ပြန်ချက်မှ သိရသည်။
