သျှမ်းပြည်တောင်ပိုင်း ပင်လုံမြို့နယ် နောင်လိုင်ကျေးရွာတွင်နေထိုင်သည့် အမျိုးသားတစ်ဦးသည် ကျွဲသွားရှာစဥ် မြေမြှုပ်မိုင်း နင်းမိပြီး ထိခိုက်ဒဏ်ရာပြင်းထန်ကြောင်း သတင်းသိရသည်။
ယမန်နေ့ (ဇူလိုင် ၃) ရက် ညနေပိုင်းတွင် နောင်လိုင်ရွာ မြောက်ဘက်ရှိ လဲချားဘက်သို့ သွားသည့် လမ်းကြောင်း အတိုင်း ကျွဲသွားရှာသည့် အသက် (၆၂) နှစ်အရွယ်ရှိ အမျိုးသားတစ်ဦး မြေမြှုပ်မိုင်း နင်းမိကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ရွာထဲကနေ သူတို့နှစ်ဦးက (အမျိုးသားနှစ်ယောက်) ဆိုင်ကယ်တစ်ယောက်တစ်စီးစီ ထွက်သွားကြတာ၊ ကျနော်တို့ရွာ(နောင်လိုင်ရွာ) ရဲ့ မြောက်ဘက် တောလမ်းဘေးတစ်နေရာမှာ ဆိုင်ကယ်က မိုင်းနင်းမိပြီးတော့ ပေါက်ကွဲမှုဖြစ်သွားတယ်၊ ဒဏ်ရာလည်း တော်တော်ပြင်းတယ် ၊ သူနဲ့ ပါသွားတဲ့ အဖော်တော့ လွှတ်သွားတယ်” ဟု ၎င်းက ဆိုသည်။
မြေမြှုပ်မိုင်း နင်းမိသူသည် အသက် (၆၂) နှစ်အရွယ်ရှိ လုံးဆုစိန္တ ဖြစ်ပြီး ခြေတလုံး ထိခိုက်ဒဏ်ရာ နှစ်ချက်နှင့် ခေါင်းမှာ တစ်ချက် ပြင်းထန်စွာ ဒဏ်ရာရရှိသွားကြောင်း သိရသည်။
“ခေါင်းပိုင်းထိတဲ့ ဒဏ်ရာက တော်တော်ကို ပြင်းတယ်၊ မိုင်းစတွေက အသားထဲထိ စိုက်ဝင်ထားတော့ ခွဲစိတ်ရမယ်တဲ့၊ အသက်လည်း ကြီးနေတော့ စိတ်ပူရပါတယ်၊ ပြီးတော့ သူ့မိသားစုတွေက ဆေးဖိုးစားရိတ်တွေလည်း အခက်အခဲရှိနေမှာ၊ အကူအညီလိုအပ်တာပေါ့” ဟု မိုင်းနင်းမိသူနှင့် နီးစပ်သည့် အမျိုးသားတစ်ဦးက ပြောသည်။
လက်ရှိတွင် ဒဏ်ရာရသူ လုံးဆုစိန္တသည် ဆေးရုံတွင်ဆေးကုသမှုများ ခံယူနေလျက်ရှိပြီး ဆေးကုသမှု စားရိတ်များ အတွက် အကူအညီလိုအပ်နေကြောင်းလည်း သိရသည်။
အဆိုပါ မှိုင်းပေါက်ကွဲမှု ဖြစ်ပွားခဲ့သည့်နေရာသည် လဲချားမြို့နှင့် ပင်လုံမြို့ကြားရှိ ယခင် တပ်နေရာဟောင်း ဖြစ်ပြီး မြောက်ပိုင်းမဟာမိတ်တပ်ဖွဲ့ နှင့် RCSS/SSA တို့ ပြင်းထန်စွာ တိုက်ပွဲဖြစ်ပွားပြီးနောက်ပိုင်း ယင်းနေရာနှင့် အနီးတစ်လျှောက်နေရာများတွင် မြေမြှုပ်မှိုင်း နင်းမိပေါက်ကွဲမှုများ မကြာခဏဖြစ်ပွားလေ့ရှိကြောင်း ဒေသခံ များက ပြောသည်။
ထိုမိုင်းပေါက်ကွဲမှုများ မကြာခဏဖြစ်ပွားလေ့ရှိသည့်အတွက် ဒေသခံပြည်သူများမှ တောနင်း ဟင်းရှာရန် နှင့် ကျွဲ၊ နွားများကို စားကျက်လွတ်ရန်အတွက် စိုးရိမ်ထိတ်လန့်မှုနှင့် အခက်အခဲများ ရှိနေကြောင်းလည်း သိရသည်။
Leave a Comments