သျှမ်းပြည်တောင်ပိုင်း ပင်လောင်းမြို့သည် လက်ဖက်ကို အဓိက စိုက်ပျိုးသည့် ဒေသဖြစ်ပြီး၊ လက်ရှိကာလမှာ လက်ဖက်စိုက်ပျိုးသူများအတွက် အခက်ကြုံတွေ့နေရကြောင်း စုံစမ်းသိရသည်။

ယခုကာလသည် နိုင်ငံရေးရှုပ်ထွေးမှုဖြစ်ပွားကာ ကုန်စျေးနှုန်းများလည်း မြင့်တက်လာသည့်အတွက် လက်ဖက်စျေးနှုန်းမတက်လာဘဲ စိုက်ပျိုးရာတွင် အသုံးပြုသည့် မြေသြဇာ၊ စက်သုံးဆီစျေးနှုန်းလည်း အဆမတန်မြင့်တက်လာကြောင်း လက်ဖက်စိုက်ပျိုးသူများက သျှမ်းသံတော်ဆင့်ကို ပြောသည်။

“လက်ဖက်စျေးနှုန်းက မတက်ဘူး။ အခုစိုက်ပျိုးရေးမှာ သုံးတဲ့ မြေသြဇာတွေ စက်သုံးဆီစျေးတွေက အရမ်းတက်လာတယ်လေ။ စားသောက်ကုန်တွေလည်း တက်လာတော့အရမ်းကို ခက်ခဲလာပြီ” ဟု ပင်လောင်း လက်ဖက်စိုက်ပျိုးသူ ခွန်မိုးကျော် က ပြောသည်။

ယခုမိုးတွင်းကာလသည် လက်ဖက်စိုက်ပျိုးကောင်းသော ကာလဖြစ်ပေမယ့် မြေသြဇာမြင့်တက်လာ မှုကြောင့် လက်ဖက်စိုက်ပျိုးသူ လျော့နည်းလာကြောင်း ခွန်မိုးကျော်က ပြောသည်။

“အဖက်ဖက်က စျေးတက်ပြီး လက်ဖက်ကျတော့ စျေးမတက်တော့ တချို့ တောင်သူတွေ လက်ဖက်မစိုက်တော့ဘူး။ ရှေ့ဆက် ကျနော်တို့ ဘယ်လို လုပ်ရမှန်းမသိဘူး” ဟု ၎င်းက ဆိုသည်။

လက်ဖက်ခြောက် စျေးနှုန်းမှာ တပိဿလျှင် (၆၀၀၀) ကျပ်သာ ရရှိကြောင်း သိရသည်။

ထို့ပြင် လက်ဖက်ခြံနှင့်ဝေးသော တောင်သူများသည် လက်ဖက်ခူးရန် ယခင်ကဆိုင်ကယ်ဖြင့် သွားလာရပြီး၊ ယခုစက်သုံးဆီ မြင့်တက်လာပြီးနောက် တချို့သောတောင်သူများမှာ လက်ဖက်ခူးရန် လမ်းလျှောက်သွား နေရကြောင်း ပင်လောင်း ဒေသခံများက ပြောသည်။

“တချို့ခြံဝေးတဲ့နေရာဆို ဆိုင်ကယ်နဲ့သွားမှ အဆင်ပြေတာ။ ခူးပြီးယူပြန်ရင် ဆိုင်ကယ်နဲ့မှ အဆင်ပြေတာလေ၊ ဆီဈေးကတော့ (၂၀၀၀) ကျော် (၃၀၀၀) နီးပါး မဝယ်နိုင်တဲ့သူလည်း ရှိတယ် ၊ မဝယ်နိုင်တော့လည်း လမ်းလျှောက်သွားကြတယ်။ ဒီအချိန်က လက်ဖက်လုပ်ရတာလည်း အဆင်မပြေဘူး“ ဟု ပင်းလောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ဆက်လက်ပြီး စစ်အာဏာသိမ်းပြီးနောက် ပင်လောင်းမြို့တွင် မီးမကြာခဏ ပျက်သဖြင့် လက်ဖက်လုပ်ငန်း အတွက်ထိခိုက်လာကြောင်းလည်း သိရသည်။