မိုင်းကိုင်မြို့နယ် သျှမ်းသံဃာများ ဦးဆောင်ပြီး စာသင်ကျောင်း ဖွင့်လှစ်နေ

0

သျှမ်းပြည်တောင်ပိုင်း မိုင်းကိုင်မြို့နယ် သျှမ်းသံဃာတော်များ ဦးဆောင်ပြီး ဘုန်းတော်ကြီး သင်ပညာရေးကျောင်း (ဘကကျောင်း) ဖွင့်လှစ် သင်ကြားပေးနေကြောင်း သတင်းသိရသည်။

ပြီးခဲ့သည့် ဇွန်လ ၂၈ ရက်တွင် သံဃာတော်များ၏ ဦးဆောင်မှုဖြင့် မိုင်းကိုင်မြို့နယ် ပန်စက်ကျေးရွာ (ဗဟိုစာသင်ကျောင်း)၊ ကုန်းလုံကျေးရွာ၊ ဖောင်းဆိုင်ကျေးရွာ၊ ပုန်းယမ်းကျေးရွာ၊ ကုန်းကောက်ကျေးရွာ၊ ပန်ဝါကျေးရွာ နှင့် နောင်ပူးကျေးရွာ စသည့် ကျေးရွာ ၇ ရွာတွင် ဘကကျောင်းများ ဖွင့်လှစ်ခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

မိုင်းကိုင်မြို့နယ် ဘုန်းတော်ကြီးစာသင်ကျောင်း

“ဒီကျေးရွာ ၇ ရွာလုံးက ပန်စက်ကျေးရွာအုပ်စုထဲမှာပါတဲ့ ရွာတွေဖြစ်တယ်၊ ဒီရွာတွေဟာဆိုရင် သျှမ်းတောင် သျှမ်းမြောက် နယ်စပ်က ရွာဖြစ်နေတော့ မိုးတွင်းဆို သွားလာရေးခက်ခဲတယ်၊ ပြီးတော့ အခြေအနေအရပ်ရပ်ကြောင့် ဒီဒေသက ကလေးတွေ ပညာရေးနဲ့ သင်ကြားရေးနဲ့ ကင်းကွာနေတာ တစ်နှစ်ကျော်ကြပြီ၊ ဒါကြောင့် ဦးဇင်းတို့ကနေ ကလေးတွေရဲ့ ပညာရေးကို ရှေးရှူပြီး ဒီဘကကျောင်း ဖွင့်လှစ်ခဲ့တာပါ” ဟု ဘက ကျောင်းဖွင့်လှစ်မှုမှာ တာဝန်ရှိ ဦးဇင်းတစ်ပါးက သျှမ်းသံတော်ဆင့်ကို မိန့်သည်။

အဆိုပါ ဘကကျောင်းကို အစိုးရသင်ရိုးညွှန်းတမ်းများနှင့်အညီ အခြေခံပညာ ဘာသာရပ်များကို သင်ကြားပေးမည် ဖြစ်ပြီး ၅ တန်းအထိ သင်ကြားပေးမည်ဟုလည်း ဦးဇင်းက ဆက်လက်ပြောဆိုထားသည်။

မိုင်းကိုင်မြို့နယ် ဘုန်းတော်ကြီးပညာသင်ကျောင်း

ယင်းဘက ကျောင်းဖွင့်လှစ်နိုင်ရေးအတွက် နမ့်လန်မြို့လယ်ဘုန်းတော်ကြီးကျောင်းမှ ကျောင်းထိုင်ဆရာတော် အဂ္ဂမဟာ သဒ္ဓမ္မဇောတိက ဓဇ ဆရာတော် ညာန္ဖောစ ၊ ဝိန်းစံမန်လီကျောင်းထိုင်ဆရာတော် ဝိရိယ၊ နမ့်လန်ကျောင်းတိုက် ဆရာတော် တက္ခညာန အပါအဝင် မြို့နယ်သံဃာနာယက အဖွဲ့ဝင် ဆရာတော်များ၊ ဦးဇင်းများ နှင့် ဒေသအသီးသီးမှ ဆရာတော်များ ပူးပေါင်းပါဝင်ဖွင့်လှစ်ခဲ့ကြောင်းသိရသည်။

လက်ရှိတွင် နိုင်ငံရေး နှင့် စစ်ရေး စစ်ဒဏ်များ ကြုံခဲ့ဖူးသည့် ဒေသမှ ကလေးငယ်များ၏ ပညာရေးအတွက် ဖွင့်လှစ်ထားသည့် ဘကကျောင်းကို ကူညီလှူဒါန်း ထောက်ပံ့မှုများ ပြုလုပ်လိုပါက တာဝန်ခံဖုန်း 096-838-146-44 သို့ ဆက်သွယ်လှူဒါန်းနိုင် ကြောင်းလည်း သိရသည်။

Leave a Comments