ကချင်ပြည် ဖားကန့်မြို့နယ် သျှမ်းနီ စာပေနှင့် ယဥ်ကျေးမှု နာယက ဦးသန်းဖေ ပစ်သတ်ခံရမှုကြောင့် သျှမ်းနီပြည်သူများ စိုးရိမ်ထိတ်လန့်နေကြောင်း စုံစမ်းသိရသည်။
ပြီးခဲ့သည့် ဇွန် ၂၅ ရက် ည ၆ နာရီဝန်းကျင်တွင် ဖားကန့်မြို့နယ် ဟောင်ပါးကျေးရွာမှ ကျေးရွာအုပ်စုလုံး ဆိုင်ရာ သျှမ်းနီစာ/ယဉ် ကော်မတီနာယက ဦးသန်းဖေသည် နေအိမ်တွင်ရှိနေစဥ် သေနတ်ဖြင့် ပစ်သတ်ခံရမှုသည် လူမျိုးတစုအပေါ် ရည်ရွယ်ချက်ရှိရှိလုပ်ကြံကြောင်း၊ လူမျိုးရေး ပဋိပက္ခဖန်တီးရာ ရောက်ကြောင်း ဖားကန့်ဒေသခံ သျှမ်းနီ လူထုများက ပြောဆိုလိုက်သည်။
“ကျနော်သိရသလောက်ပြောရရင် အမျိုးသားလူငယ် နှစ်ယောက်က ဆိုင်ကယ်နဲ့ ခေါင်းပိုင်းကို သုံးချက်ချိန်ပစ် သွားတယ်၊ အိမ်ဝိုင်းထဲကို လာပစ်သွားတာ၊ ညလည်းဖြစ်နေတော့ ဘယ်သူဘယ်ဝါမှန်းမသိလိုက်ရဘူး” ဟု ဖားကန့် မှ အသက် ၂၅ နှစ်အရွယ်ရှိ သျှမ်းနီလူငယ်အမျိုးသားတစ်ဦးက သျှမ်းသံတော်ဆင့်ကို ပြောသည်။
ပစ်သတ်ခံရသူ ဦသန်းဖေသည် အသက် (၆၀) ကျော်ရှိနေပြီး နှစ်ပေါင်းများစွာ သျှမ်းနီအရေးကို ဆောင်ရွက်နေသူ ဖြစ်သည့်အပြင် ပြီးခဲ့တဲ့ (၁၀) စုနှစ်ကျော်ကတည်းက ရပ်ကျေးအုပ်ချုပ်ရေးမှူးတာဝန်ကို ထမ်းဆောင်ခဲ့ဖူးသူ ဖြစ် ကြောင်းလည်း သိရသည်။
ယင်းကဲ့သို့ သျှမ်းနီစာ/ယဥ်နာယက ပစ်သတ်ခံလိုက်ရခြင်းနှင့် ပတ်သက်ပြီး လက်နက်ကိုင်တပ်ဖွဲ့တစ်ခုမှ သျှမ်းနီ ပြည်သူလူထုများကို တရားမဲ့ ဆောင်ရွက်နေကြသော လုပ်ရပ်ဖြစ်ကြောင်း ရှမ်းနီတပ်မတော် (SNA) မှ ပြီးခဲ့ သည့် ဇွန်လ ၂၇ ရက်တွင် ထုတ်ပြန်လာခဲ့သည်။
ထို့အပြင် ယခုလို နိုင်ငံရေး မငြိမ်မသက်ဖြစ်နေချိန် လူမျိုးတစ်မျိုးအပေါ် ရည်ရွယ်ချက်ရှိရှိ ပြုလုပ်နေသည်ဟု မြင်မိကြောင်း သျှမ်းနီပါတီမှ တာဝန်ရှိ အမျိုးသမီးတစ်ဦးက သျှမ်းသံတောင်ဆင့် ကိုပြော သည်။
“အခုဖြစ်ပျက်နေတဲ့ လုပ်ရပ်မျိုးက တော်လှန်ရေးကို အကြောင်းပြပြီး လူမျိုးတစ်မျိုးကို နိုင်ငံရေး၊ စစ်ရေး ပစ်မှတ်ထားနေတယ်လို့ ထင်မိတယ်၊ ပြီးရင် တော်တော်ကို အောက်တန်းကျတဲ့ နိုင်ငံရေးလုပ်ကြံမှုမျိုးလို့ ပြောရမှာ၊ ဒီလူမျိုးတစ်မျိုးအပေါ် ရည်ရွယ်ချက်ရှိရှိ လုပ်နေတယ်လို့ ခံစားမိတယ်” ဟု အထက်ပါ အမျိုးသားက ပြောသည်။
ပြီးခဲ့သည့် ဇွန်လ ၁၉ ရက်နေ့မှ ဗန်းမောက်တောင်ပိုင်း မံကပ်ကျေးရွာတွင် သျှမ်းနီလူငယ်ကွန်ယက်တာဝန်ခံ ဒု ဥက္ကဌ လူငယ်တစ်ဦးကို KIA လက်အောက်ခံ ပြည်သူ့ကာကွယ်ရေးတပ်ဖွဲ့အမည်ခံ PDF တပ်ဖွဲ့တစ်ဖွဲ့မှ ၅ ရက် ကြာ ဖမ်းဆီးရိုက်နက်ခံရပြီးနောက် ပြန်လည်လွတ်ပေးခဲ့သည့် ဖြစ်စဥ်လည်းဖြစ်ပွားခဲ့သည်။
သျှမ်းနီ စာ/ယဥ် ကျေးရွာအုပ်စုနာယက ပစ်သတ်ခံရခြင်းသည်လည်း KIA လက်အောက်ခံ လက်နက်ကိုင်တပ်ဖွဲ့ များနှင့် ဆက်စပ်ပတ်သက်သည်ဟု ဒေသခံများက ပြောဆိုသော်လည်း သျှမ်းသံတော်ဆင့် မှ သီးခြား အတည်ပြုနိုင်ခြင်း မရှိသေးပေ။
ယင်းကိစ္စ ဖြစ်စဥ်များနှင့် ဆက်စပ်ပတ်သက်ပြီး အသေးစိတ်ဖြစ်စဥ်များကို သိရှိနိုင်ရန်အတွက် KIA ပြောရေးဆို ခွင့်ထံသို့ နှစ်ရက်ဆက်တိုက် အကြိမ်ကြိမ် ဆက်သွယ်ခဲ့သော်လည်း ဖုန်းလက်ခံ ဖြေကြားခြင်းမရှိပါ။
Leave a Comments