သျှမ်းပြည်မြောက်ပိုင်း ကွတ်ခိုင်မြို့က စစ်ရှောင်စခန်းကို လက်နက်ကြီးကျ ပေါက်ကွဲသည့်အတွက် စစ်ရှောင် ပြည်သူသုံးဦး သေဆုံးခဲ့ရပြီး တစ်ဦးထိခိုက်ဒဏ်ရာပြင်းထန်စွာ ရရှိသွားကြောင်း စုံစမ်းသိရသည်။
ယနေ့ (ဇွန် ၁၇ )ရက် နံနက် ၁၁ နာရီခွဲ ဝန်းကျင်တွင် ကွတ်ခိုင်မြို့အနီးပတ်ဝန်းကျင်မှ ပစ်ခတ်သံ များ ထွက်ပေါ်လာပြီးနောက်တွင် ဇွပ်အောင်စစ်ရှောင်စခန်းသို့ လက်နက်ကြီးကျရောက်ခဲ့ကြောင်း စစ်ရှောင်စခန်းမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဇွပ်အောင် စစ်ရှောင်စခန်းမှာ လက်နက်ကြီးကျတာပါ၊ ဒီစစ်ရှောင်စခန်းအနီးမှာ တိုက်ပွဲဖြစ်တာတော့ မဟုတ် ဘူး၊ စစ်ကောင်စီက သူတို့လက်နက်ကြီးနဲ့ လှမ်းပစ်လိုက်တာ လက်နက်ကြီး နှစ်လုံးကျပါတယ်၊ ကျနော်တို့ ပြည် သူသုံးဦး သေသွားတယ်၊ တစ်ယောက် ကတော့ စိုးရိမ်ရတဲ့ အခြေအနေနဲ့ ဒဏ်ရာရထားပါတယ်” ဟု ဇွပ်အောင် စစ်ရှောင်စခန်းမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
ဇွပ်အောင် စစ်ရှောင်စခန်းထဲ လက်နက်ကြီးကျချိန်တွင် မိုးသည်းထန်စွာ ရွာသွန်းသည့် အပြင်လမ်းခရီးကလည်း ခက်ခဲကြမ်းတမ်းသည့် အတွက် ထိခိုက်ဒဏ်ရာရရှိသူ တစ်ဦးကို ဆေးရုံပို့ဆောင်ရန်ခက်ခဲနေကြောင်းလည်း ၎င်းက ဆက်လက်ပြောဆိုထားသည်။
ဇွပ်အောင် စစ်ရှောင်စခန်းတွင် မှီတင်းနေထိုင်ကြသည့် ပြည်သူပေါင်း ၁၀၀၀ ကျော် နေထိုင်လျက်ရှိပြီး ယခုကဲ့သို့ လက်နက်ကြီးကျ တိုက်ပွဲဒဏ်ခံနေရသော်လည်း တခြားနေရာကို ပြောင်း ရွှေ့နေထိုင်ရန် ခက်ခဲနေကြောင်းလည်း သိရသည်။
“မိုးကလည်းကြီးနေတယ်၊ ဒီလိုလက်နက်ကြီးပါကျတယ်ဆိုတော့ သွားလာဖို့လည်း ခက်ခဲနေတယ်၊ ရုတ်တရက် ရွှေ့ပြောင်းဖို့ ဆိုတာက ကျနော်တို့ တည်းဖို့ခိုဖို့ နေရာမရှိဘူးလေ၊ ပြီးတော့ လမ်းမလျှောက်တတ် သေးတဲ့ ကလေးတွေလည်း များတယ်၊ အဲ့ကြောင့် သွားလာဖို့လည်းအရမ်းခက်ခဲ နေပါတယ်” ဟု ၎င်းက ပြောသည်။
ဇွပ်အောင် စစ်ရှောင်စခန်းသည် လွန်ခဲ့သည့် ၂၀၁၂ခုနစ် တွင် မြန်မာ့တပ်မတော် နှင့် ကချင်လွတ်မြောက်ရေး တပ်မေတာ် (KIA)တို့ တိုက်ပွဲဖြစ်ပွားပြီး စစ်ရှောင်လာသည့် သူများဖြစ်ကြသည်။
ယခုရက်ပိုင်း ကွတ်ခိုင်မြို့နယ်အတွင်း တိုက်ပွဲမကြာခဏ ဖြစ်ပွားလေ့ရှိသည့်အတွက် စစ်ကောင်စီ အပါအဝင် တိုင်းရင်းသားလက်နက်ကိုင်တပ်ဖွဲ့များ အားလုံးကို ပြည်သူလူထုနေထိုင်မှု မရှိသည့် နေရာများ၌ သွားရောက်ပစ်ခတ်ကြရန် တောင်ဆိုလိုကြောင်းလည်း ဒေသခံများက ပြောသည်။
ယနေ့ နံနက်ပိုင်းတွင်လည်း အာဏာသိမ်း စစ်ကောင်စီ တပ်ဖွဲ့နှင့် KIA တို့က တိုက်ပွဲဖြစ်ပွားခဲ့သေးကြောင်း ဒေသခံများက ပြောသည်။
တိုက်ပွဲဖြစ်စဥ်နှင့် ပက်သက်ပြီး KIAကို ဆက်သွယ်မေးမြန်းရာ ယနေ့ တိုက်ပွဲဖြစ်စဥ်မသိရသေးကြောင်းနှင့် စစ်ကောင်စီတို့ကြောင့် စစ်ရှောင်နေရာ လက်နက်ကြီး ထိမှန်ကြောင်း မှန်ကန်ပါက စစ်စည်းကမ်းကို ချိုးဖောက် ရာရောက်ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို ပြောသည်။
“တိုက်ပွဲဖြစ်တယ်ဆိုတာလောက်တော့ ကျနော်သိပါတယ်၊ ဒါပေမဲ့အသေးစိတ် ဖြစ်စဥ်တော့ မသိရသေးဘူး၊ ဒါပေမဲ့ စစ်သားနဲ့ တပ်မတော်ဆိုတာ ပြည်သူတွေကို ကူညီစောင့်ရှောက်ပေးရမဲ့ သူတွေဖြစ်တယ်၊ ပြည်သူလူထုရှိ တဲ့ စစ်ရှောင်ရှိတဲ့ ဘက်ကို လက်နက်ကြီး နဲ့ လှမ်းပစ်တယ်ဆိုတာက စစ်ရာဇဝတ်မှု မြောက်ပါတယ်” ဟု ဗိုလ်မှူးကြီး နော်ဘူက ပြောသည်။
ထို့အပြင် ယမန်နေ့ ဇွန်လ ၁၆ ရက်နေ့ ကုန်ချမ်းကျေးရွာအနီးတွင် တိုက်ပွဲဖြစ်ပွားခဲ့ပြီး လက်နက်ကြီး ကျရောက်ရာ ရွာခံတစ်ဦး ထိခိုက်ဒဏ်ရာရရှိခဲ့ပြီး။ ယင်းနေ့ နံနက် ၁ နာရီကျော်တွင်လည်း နမ့်ဖတ်ကာ အခြေစိုက် စစ်ကောင်စီ ခြေလျင်တပ်ရင်း (၁၂၃)က လက်နက်ကြီးတွေနဲ့ ပစ်ခတ်ခဲ့ကြောင်း သတင်းသိရသည်။
