မြန်မာ – ထိုင်းနယ်စပ် သျှမ်းပြည်အရှ့ပိုင်း တာချီလိတ်မြို့တွင် နေ့စဉ်နှင့်အမျှ လိမ်လည်ခိုးယူမှုဖြစ်ပွားပြီး သက်ဆိုင်ရာမှ အရေးယူမှု မရှိကြောင်း စုံစမ်းသိရှိရသည်။

သျှမ်းပြည်အရှေ့ပိုင်း တာချီလိတ်မြို့တွင် နေ့စဉ် လုယက် ခိုးယူမှုများဆက်လက် ဖြစ်ပွားပြီး သက်ဆိုင်ရာများက အရေးယူမှုမရှိသဖြင့် ပြည်သူများ လုံခြုံရေး စိုးရိမ်နေရကြောင်း တာချီလိတ်မြို့ ဒေသခံက ပြောကြသည်။

တာချီလိတ်မြို့တွင် လူမျိုးပေါင်းစုံ နေထိုင်ပြီး အလုပ်လက်မဲ့ လူငယ်များ အပါအဝင် မူယစ်ဆေးဝါးသုံးစွဲသူ များပြားလာသည့်အတွက် ယခုလို နေ့စဉ်နှင့်အမျှ လုယက်၊ သတ်ဖြတ်မှုများပြား လာခဲ့သည်ဟု တာချီလိတ် ဒေသခံ ယာဉ်မောင်းတစ်ဦးက သျှမ်းသံတော်ဆင့်ကို ပြောသည်။

“မရှိရှိတာလေးနဲ့ လုပ်စားကြရတဲ့ ဒုက္ခသည်တွေအများကြီး၊ ဆေးစွဲတဲ့ လူငယ်တွေလည်း အများကြီးဘဲ ဆေးစွဲ တော့ဝင်ငွေရှာတယ်။ မရ ရတဲ့ နည်းလမ်းကို သုံးမယ်၊ ခိုးမယ် ဓားပြတိုက်မယ်ဆိုတဲ့ စိတ်တွေသူတို့မှာ ပေါက်ဖွား လာတော့ ကြုံရာကို လုပ်ကြတယ်” ဟု ၎င်းကပြောသည် ။

ထိုအပြင် နိုင်ငံရေးအခြေအနေ မကောင်းသောကြောင့် အိုးအိမ်စွန့်ခွာပြီး တာချီလိတ်မြို့တွင် လာရောက်လုပ်ကိုင် စားသောက်သူသည် ယခင်နှစ်ထက် ၂ ဆပိုများလာပြီး အိုးအိမ်မဲ့လမ်းဘေး ရောက်သူတွေ အများအပြား ရှိသည် ဟု ၎င်းက ဆက်ပြောသည် ။

တာချီလိတ်မြို့ပေါ်ရှိ လောင်းကစားများ၊ လုယက်မှု ၊သတ်ဖြတ်မှု တို့မှာ သက်ဆိုင်ရာရဲများက အရေးယူပေးရန် တာချီလိတ်ဒေသခံ အမျိုးသမီးတစ်ဦးက သျှမ်းသံတော်ဆင့် ကို ပြောသည်။

“ ကောင်းတဲ့ အခြေအနေကို ရောက်ဖို့ဆိုတာ မလွယ်လောက်ဘူး ၊ရဲတွေ စစ်သားတွေ ဖမ်းမိလို့ အရိုက်ခံရပြီး ပြန်ပို့လာတာတွေရှိတယ်၊ မလွှတ်ပေးဖို့ ဖြစ်နိုင်ရင် အရေးယူပေးဖို့ လုပ်ပေးရင် ကောင်းတယ်“ ဟု ၎င်းက ပြောသည်။

ထိုင်းနိုင်ငံအတွင်းသို့ သွားရောက်အလုပ်လုပ်နိုင်ရန်အတွက် အိမ်ပေါင်ပြီးလာသည့်သူများ၊ အကြွေးယူပြီး တာချီမြို့ပေါ်သို့ တံတားဖွင့်မည့်ရက်ကို စောင့်ဆိုင်းနေကြများ အများအပြားရှိနေသည် ဟု ၎င်းဒေသခံ အမျိုးသားတစ်ဦးက ပြောသည်။

ဇွန်လ (၆) ရက်မှာ ဟောင်လိတ်ရပ်ကွက်ရှိ သင်္ချိုင်းအနီးတွင် အမျိုးသားအလောင်းတွေ့ရှိခဲ့သည်။ ဇွန် (၁၂) ရက် ရန်အောင်မြေရပ်ကွက်တွင် ရွှေဆိုင် တစ်ဆိုင်မှာ ဘတ်တစ်သိန်းကျော် လိမ်ခံရသည် ဟု သိရှိရသည်။

မြန်မာ- ထိုင်းနယ်စပ် တာချီလိတ်မြို့ သည် ဇန်နဝါရီ (၁၇) ရက် ဆန်ဆိုင်း (ခ) ရပ်ကွက် ရီဂျီနားဟိုတယ်အောက် ဝမ်မိုင်ရွာဝင် ကုန်းဆင်းနားတွင် ဓားဖြင့် ခုတ်ပြီး ဆိုင်ကယ် လုယက်မှုရှိခဲ့သည်။