သျှမ်းပြည်အရှေ့ပိုင်း မိုင်းပျဉ်းမြို့အတွင်းရှိ တပိုင်တနိုင် ဖွင့်ထားသည့် ဓာတ်ဆီဆိုင်များ အားလုံးကို ပိတ်ထားခိုင်းကြောင်း စုံစမ်းသိရှိရသည်။

ယမန်နေ့ ဇွန် ၉ ရက်နေ့က စစ်ကောင်စီ လက်အောက်ခံ အုပ်ချုပ်ရေးမှူး၊ စည်ပင် နှင့် ရဲတို့က အိမ်နှင့် မြို့ပြင်တွင် တပိုင်တနိုင်ဖွင့်လှစ်ထားသည့် ဓာတ်ဆီဆိုင်ရှင်များအားလုံးကိုခေါ်ယူပြီး လက်ရှိဖွင့်ထားသည့်ဆိုင်များအားလုံး ပြန်လည်ပိတ်ခိုင်းကြောင်း တပိုင်တနိုင် ဓာတ်ဆီရောင်းသည့် အမျိုးသားတစ်ဦးက ပြောသည်။

ထို တပိုင်တနိုင် ဖွင့်လှစ်ရောင်းချသည့် ဓာတ်ဆီဆိုင်များသည် နှစ်ပေါင်း ၃၀ ကျော် ကြာလာခဲ့ပြီဖြစ်ပြီး တကြိမ်တခါမျှ ပိတ်ခိုင်းခြင်းမရှိခဲ့ပေ။

“ သူတို့ရုံးကိုလာခေါ်သွားတာ။ အိမ်မှာရောင်းနေတဲ့ဆီဆိုင်ဖြစ်ဖြစ်၊ လမ်းဘေးမှာ ရောင်းနေတဲ့ ဆီဆိုင်တွေပဲ ဖြစ်ဖြစ် မရောင်းရတော့ဘူးတဲ့။ အကုန်လုံးပိတ်ထားရမယ်တဲ့။ ဆီတွေမရောင်းရတော့ဘူးပေါ့။ ပန့်နဲ့ ရောင်းတဲ့ ဆီဆိုင်တွေတော့ ဖွင့်ထားသေးတယ်။ မပိတ်ရဘူး။ ဘာကြောင့် ပိတ်ခိုင်းလဲတော့ ကျနော်တို့လည်း မသိရဘူး” ဟု မိုင်းပျဉ်းမြို့ရှိ အိမ်ဆိုင်တစ်ဆိုင်မှာ ဆီဆိုင်ဖွင့်ထားသည့် အမျိုးသားတစ်ဦးက ပြောသည်။

ထို့အပြင် အိမ်တွင်းရောင်းနေသည့် ဆီဆိုင်များကို စစ်ကောင်စီက ပိတ်ထားခိုင်းပြီး၊ မိုင်းပျဉ်းမြို့တွင်ဖွင့်လှစ်ထားသည့် ပန့်ဆီဆိုင် (၃) ခုကိုသာ ဖွင့်ခွင့်ရကြောင်းသိရသည်။

“ အခု မိုင်းပျဉ်းမှာက ဆီဆိုင် (၃) ခုပဲ ဖွင့်ခွင့်ရတာ။ အဲ့တာတွေက ပန့်ဆီဆိုင်ကြီးတွေဖြစ်တယ်။ ဒီမှာလည်း ပန့်ဆီဆိုင်က ၃ ခုပဲရှိတာ။ သူတို့တွေကလိုင်စင်ရှိထားတယ်။ အဲ့ကြောင့် ဖွင့်ခွင့်ရတာတဲ့” ဟု မိုင်းပျဉ်းမြို့ ဒေသခံတစ်ဦးက ပြောသည်။

အာဏာသိမ်းပြီးတစ်နှစ်ကြာတွင် မြန်မာနိုင်ငံအတွင်းရှိ ဆီဈေးများမြင့်တက်လာပြီး၊ဆီဆိုင်ပြတ်လပ်မှုဖြစ်လာသဖြင့် တစ်ချို့ဆိုင်များက ပိတ်သိမ်းလိုက်ရကြောင်း သိရသည်။

ထိုအပြင် လက်ရှိ သျှမ်းပြည်အတွင်းရှိ ဆီများ ဈေးတက်လာမှုကြောင့် ဆိုင်တွေပိတ်လာရသည့်အပြင် ပြည်သူများတစ်ချို့ကလည်း ဆီဈေးမတက်နိုင်တာကြောင့် လမ်းလျှောက်သွားလာရကြောင်း သိရသည်။