သျှမ်းပြည်မြောက်ပိုင်း ဟိုပန်မြို့နယ်ရှိ ပြည်သူပိုင် စိုက်ပျိုးမြေ နေရာများကို “ဝ” တိုင်းရုံးစိုက်ရန်အတွက် သစ်တောဌာနမှ သိမ်းယူရန် ကြိုးစားနေမှုကို ဒေသခံပြည်သူများက ဝိုင်းဝန်းဆန့်ကျင် ဆန္ဒပြခဲ့ကြောင်း သိရသည်။

ပြီးခဲ့သည့် ဇွန်လ ၈ ရက်တွင် ဟိုပန်မြို့ မိန်းပန်းသျှမ်းရပ်ကွက် မှ ပြည်သူပိုင် စိုက်ပျိုးမြေနေရာများကို သစ်တောဦးစီးဌာန မှ လာရောက် တိုင်းတာရန် ပြင်ဆင်နေစဥ် ပြည်သူများက ဝိုင်းဝန်းကန့်ကွက် ဆန့်ကျင် ဆန္ဒပြခဲ့ကြောင်း ဒေသခံ သျှမ်းပြည်သူတစ်ဦးက သျှမ်းသံတော်ဆင့် ကိုပြောသည်။

“သစ်တောဌာနက လူတွေ ကျနော်တို့ ဘိုးဘွားအစဥ်အဆက် စိုက်ပျိုးခဲ့တဲ့ မြေနေရာဧက (၃၀) ကျော်ကို မတရား သိမ်းယူလို့ ဘယ်ဖြစ်မလဲ၊ ကျနော်တို့ ပြည်သူတွေက လက်မခံနိုင်ပါဘူး၊ သူတို့က “ဝ “ တိုင်းရုံးအတွက်လို့ ပြောပါတယ်၊ ကျနော်တို့က လုပ်ကိုင်စားသောက်ဖို့ စိုက်ပျိုးရမှာမို့ ကန့်ကွက်ပါတယ်” ဟု အထက်ပါ ဟိုပန် ဒေသခံ သျှမ်းအမျိုးသားက သျှမ်းသံတော်ဆင့် ကိုပြောသည်။

သစ်တောဌာနမှ သိမ်းယူရန် ကြိုးစားနေသည့် မြေနေရာများသည် စုစုပေါင်း ၃၀ ဧကခန့် ရှိနေပြီး ဟိုပန်မြို့ အခြေစိုက် “ဝ “ တိုင်းရုံး အသစ်ဆောက်လုပ်ရန်အတွက် ဖြစ်ကြောင်း ဒေသခံများက ပြောသည်။

လက်ရှိ မြေသိမ်းယူရန် ကြိုးစားနေသည့် သစ်တောဌာနမှ တာဝန်ရှိသူများသည် သစ်ပင်စိုက်ပျိုးရန် မြေသိမ်းခြင်း မဟုတ်သည့် အတွက် ဆန့်ကျင် ကွန့်ကွက်မှုများ မပြုလုပ်နိုင်ပါက တခြားနေရာများမှ မြေနေရာများလည်း ထပ်မံသိမ်း ခံနိုင်ကြောင်း ဒေသခံများက ပြောသည်။

“ကျနော်တို့ ပြည်သူပိုင်တဲ့ မြေနေရာတွေ ဖြစ်နေလို့ သူတို့အခုလို လာရှုပ်တာ လာသိမ်းတာတွေကို လက်ခံနိုင်မှာ မဟုတ်ဘူး၊ ဒါကြောင့် ကျနော်တို့ ဆန့်ကျင်ကန့်ကွက်တာ ၊ အခုချိန်မှာ ဆန့်ကျင်ကန့်ကွက်တာ မလုပ်နိုင်လို့ တခါသိမ်းနိုင်ခဲ့ရင် နောက်ထပ်လည်း မသိမ်းတော့ဘူးလို့ မပြောနိုင်ဘူး” ဟု ဟိုပန် ဒေသခံတစ်ဦးက ဆိုသည်။

ထို့အပြင် လက်ရှိ မြေနေရာသိမ်းယူသည့် သစ်တောဌာန နောက်ကွယ်တွင် အဖွဲ့အစည်း နောက်ခံရှိနိုင်ကြောင်း ဒေသခံပြည်သူများက ဝေဖန်ပြောဆိုကြသည်။

ယင်းကိစ္စဖြစ်စဥ်များ နှင့် ပတ်သက်ပြီး UWSA မှ ပြောရေးဆိုခွင့်ရှိသူ နှင့် ဆက်သွယ်မေးမြန်းရာ ဟိုပန်မြို့နယ်သည် ၎င်းတို့ ထိန်းချုပ်ရာနယ်မြေ မဟုတ်သည့်အတွက် မသိရှိရကြောင်း သျှမ်းသံတော်ဆင့်ကို ပြောသည်။

“ဟိုပန်မြို့နယ်က UWSA ထိန်းချုပ်နယ်မြေထဲမပါ ပါဘူး၊ အဲ့ဒါ “ဝ” တိုင်းအစိုးရဘက်က ထိန်းချုပ်ထားတဲ့ နယ်မြေ ဖြစ်ပါတယ်၊ ဒါကြောင့် ဒီကိစ္စကို ကျနော်တို့မသိရဘူး” ဟု UWSA ပြောရေးဆိုခွင့်ရှိသူ ဦးညီရမ်းက သျှမ်းသံတော်ဆင့်ကို ပြောသည်။

သျှမ်းသံတော်ဆင့်မှ “ဝ” တိုင်းအစိုးရဌာနမှ တာဝန်ရှိသူများနှင့် ဆက်သွယ်နိုင်ရန် ကြိုးစားဆက်သွယ် နေသော်လည်း အဆက်အသွယ်မရရှိခဲ့ပေ။

ဟိုပန်မြို့နယ်သည် ၂၀၀၈ ဖွဲ့စည်းပုံ အခြေခံ ဥပဒေအရ “ဝ” ကိုယ်ပိုင်အုပ်ချုပ်ခွင့်ရ နယ်နမိတ်ထဲပါရှိသည့် မြို့နယ်တစ်ခုဖြစ်ပြီး ဒေသခံပြည်သူ အများစု သျှမ်းလူမျိုးများဖြစ်ကာ ပြောင်း၊ ပဲ နှင့် ကြံစိုက်ပျိုးမှုနှင့် အသက် မွေးဝမ်းကြောင်း ပြုလုပ်သည့် ဒေသဖြစ်ကြောင်း သိရသည်။

ယခုကဲ့သို့ မြေနေရာ သိမ်းယူမှုအောင်မြင်သွားပါက ဒေသခံ ပြည်သူများ၏ စိုက်ပျိုးမြေနေရာများ ဆုံးရှုံးသွား ရသည့် အပြင် ရှေ့ဆက် လုပ်ကိုင်စားသောက်ရမည့် အသက်မွေးဝမ်းကြောင်း နှင့် စီးပွားရေး လုပ်ငန်းများ ထိခိုက်နိုင်ကြောင်း ဒေသခံများထံမှ သိရသည်။