သျှမ်းပြည်တောင်ပိုင်း မိုးဗြဲမြို့ အတွင်း စစ်ကောင်စီနှင့် ပြည်သူ့ကာကွယ်ရေးတပ် (PDF) တို့ ယနေ့ချိန်ထိ စစ်ရေးတင်းမာမှုရှိနေသဖြင့် ပြည်သူများ စိုးရိမ်နေရကြောင်း စုံစမ်းသိရသည်။
ဇွန် ၇ ရက် တွင်လည်း မိုးဗြဲမြို့အတွင်းရှိ ကျေးရွာသို့ စစ်ကောင်စီ တပ်သားများရုတ်တရက် ရောက်ရှိလာပြီး PDF နှင့် တိုက်ပွဲဖြစ်ပွားကာ အရပ်သား အမျိုးသားတစ်ဦး၊ အမျိုးသမီးတစ်ဦး လက်နက်ကြီး ထိမှန်သေဆုံးခဲ့ပြီး၊ အမျိုးသား ၂ ဦး ထိခိုက်ဒဏ်ရာရရှိခဲ့သည်။
စစ်ကောင်စီတို့သည် ကြိုတင်အကြောင်းကြားမှု မရှိပဲ ကျေးရွာအတွင်းသို့ စစ်ကြောင်းဖြင့် ဝင်ရောက်ရှိလာသဖြင့် ပြည်သူများပြင်ဆင် ရှောင်တိမ်းချိန် မရကြောင်း အဆိုပါ တိုက်ပွဲအတွင်းမှ ရှောင်တိမ်းမှု မပြုလုပ်နိုင်ခဲ့သည့် အမျိုးသမီးက သျှမ်းသံတော်ဆင့်ကို ပြောသည်။
“မသိလို့ မရှောင်ဖြစ်လိုက်ရဘူး၊ စစ်ကောင်စီ စစ်ကြောင်းကို အုပ်လိုက်ကြီး ထွက်ကြည့်ကြတဲ့သူရှိတယ်၊ ဒါပေမယ့် ရွာကို လွန်သွားပြီး ခနကြာမှာ တိုက်ပွဲစဖြစ်တယ်၊ အဲ့ကနေ လက်နက်ကြီးလက်နက်ငယ်တွေ ပစ်ကြတာပဲ၊ အဲ့ခါ ကျမှ အိုးအိမ်တွေ မပျက်စီးအောင်၊ အသက်ဘေးလွတ်အောင် ဆုတောင်းရုံမှ တပါး ဘာမှ မလုပ်နိုင်ခဲ့ဘူး” ဟု အထက်ပါ အမျိုးသမီးက ပြောသည်။
လက်ရှိမှာလည်း မိုးဗြဲပြည်သူတချို့သည် စစ်ဘေးမရှောင်ကြဘဲ မိမိနေအိမ်တွင်သာ နေထိုင်နေကြကြောင်း၊ တိုက်ပွဲ များဖြစ်ပွားလာမည်ကို စိုးရိမ်ကြောင်း ၎င်းအမျိုးသမီးက ဆိုသည်။
မိုးဗြဲမြို့အတွင်း ဖြစ်ပွားခဲ့သည့် တိုက်ပွဲတွင် ပိတ်မိနေသည့် ပြည်သူများ ရှိနေသည့်အတွက် တိုက်ပွဲအရှိန်ကို လျှော့ချခြင်းဖြစ်ကြောင်း ဒေသအတွင်းမှ ပြည်သူ့ကာကွယ်ရေးတပ်ဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။
ထိတွေ့တိုက်ပွဲမှု မဖြစ်ပွားခင်တွင် ဆောင်ကန်းကျေးရွာ နှင့် အရှေ့ဘက်ကမ်းမှ ကျေးရွာများ အချိန်မှီ ရှောင်တိမ်းနိုင်ခဲ့သော်လည်း ဘီကင်း နှင့် ခေါခူကျေးရွာဘက်မှ ပြည်သူများ ထွက်ပြေးတိမ်းရှောင်နိုင်ခဲ့ခြင်း မရှိကြောင်း ၎င်းက ပြောသည်။
“ဇွန်၇ ရက် တိုက်ပွဲမှာ စစ်ကောင်စီတွေ စနက်ပါထိပြီး အနည်းဆုံး ၁၀ ဦးသေတယ်။ ကျနော်တို့ ရဲဘော်တစ်ဦး ခြေထောက်မှာ ဒဏ်ရာရပါတယ်၊ ကျနော်တို့ ပူးပေါင်းတပ်ဖွဲ့တွေက ပြည်သူ့အကျိုးကိုကြည့်ပြီး တိုက်ပွဲအရှိန်ကို လျှော့ခဲ့ပါတယ်” ဟု အထက်ပါ PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
အင်အား ၁၀၀ ကျော်ရှိသည့် စစ်ကောင်စီ တပ်ဖွဲ့တို့သည် ကုန်းသာတောင်ပေါ်ဘုရားမှ ဆင်းလာခြင်းဖြစ်ပြီး ဆောင်ကန်းကျေးရွာမှ စတင်ကာ မိုးဗြဲမြို့ ညောင်ဝိုင်းဘက် အထိ ဒေသခံပြည်သူ့ကာကွယ်ရေး တပ်ဖွဲ့များ နှင့် ထိတွေ့ တိုက်ပွဲ ဖြစ်ပွားခဲ့ ကြောင်း သိရသည်။
အဆိုပါ တိုက်ပွဲတွင် ဒေသခံပြည်သူ့ကာကွယ်ရေး တပ်ဖွဲ့တို့သည် ခုခံစစ်မှ တန်ပြန် တိုက်ခိုက်မှု ထိုးစစ်ဆင်နိုင် သည်အထိ အသာစီးရရှိခဲ့ပြီး စနက်ပါ သေနတ်များဖြင့် စစ်ကောင်စီ တပ်သား အယောက် ၁၀ ဦးကျော်ကိုလည်း သုတ်သင်ရှင်းလင်းနိုင်ခဲ့ကြောင်း သိရသည်။
တိုက်ပွဲအတွင်း အထိနာခဲ့သည့် စစ်ကောင်စီတပ်သားများသည် ပြည်သူများ၏ နေအိမ်များကို ဖျက်ဆီးခြင်း၊ နေအိမ်တံခါး နှင့် တခါးပေါက်များကို ဖျက်ဆီးကာ နေအိမ်အတွင်း နေရာယူခြင်းများလည်း ရှိခဲ့ကြောင်း သတင်းသိရသည်။
