သျှမ်းပြည်တောင်ပိုင်း တောင်ကြီးခရိုင် အောင်ပန်းမြို့ နှင့် ညောင်ရွှေမြို့များတွင် ညအချိန် သေနတ်ပစ်ခတ်သံများ ဆက်တိုက် ကြားနေရကြောင်း သတင်းသိရသည်။
ယမန်နေ့ ဇွန်လ ၇ ရက်နေ့ ည ၉ နာရီဝန်းကျင်အချိန်တွင် အောင်ပန်းမြို့ အမှတ် ၄ ရပ်ကွက် နှင့် အမှတ် ၃ ရပ်ကွက် လမ်းဆုံရှိ ကမ္ဘောဇဘဏ်လမ်းတောင့်ဘက်မှ သေနတ်ပစ်ခတ်သံများ ထွက်ပေါ်လာကြောင်း ဒေသခံများထံမှ သိရသည်။
“မနေ့က သေနတ်သံ ငါးချက်၊ ခြောက်ချက်လောက် ဆက်တိုက်ထွက်လာတယ်၊ ကမ္ဘောဇဘဏ်ဘက်မှာပေါ့၊ အဲ့အနီးမှာ စစ်ကောင်စီတွေက ည ၇ နာရီကျော် ၈ နာရီလောက်ဆိုရောက်လာပြီး လမ်းမပေါ်ရှိတဲ့သူတွေကို ရစ်တာ ပိုက်ဆံတောင်းတာတွေ လုပ်နေတာပေါ့၊ မနေ့က ကားတားတာ မရပ်လို့ ပစ်လိုက်တာလို့လည်း ကြားရတယ်” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အောင်ပန်းမြို့ပေါ်တွင် စစ်ကောင်စီလက်အောက်ခံ မြို့နယ်အုပ်ချုပ်ရေးမှူးမှ ည ၈ နာရီနောက်ပိုင်း ပြည်သူများ အပြင်မထွက်ကြရန် ညွှန်ကြားထားပြီး စစ်ကောင်စီတပ်ဖွဲ့တို့မှလည်း ည ၈ နာရီဝန်းကျင်တွင် မြို့တွင်း လမ်းဆုံ လမ်းခွ နှင့် မြို့ပြင် ယာဥ်များဖြတ်သန်းသွားလာမှုများသည့် နေရာများတွင် စောင့်ဆိုင်းနေကြောင်း သိရသည်။
ထို့အတူ ယမန်နေ့ ဇွန်လ ၇ ရက် ညပိုင်းတွင် ညောင်ရွှေမြို့ရှိ ရဲစခန်းဘက်မှလည်း သေနတ်သံ လေးချက် ဆက်တိုက် ကြားရကြောင်း ဒေသခံများထံမှ သတင်းသိရသည်။
“ဘာကြောင့်ရယ်လို့တော့ မသိဘူး၊ ပစ်ခတ်သံတွေတော့ လေးချက်ဆက်တိုက်ကြားရတယ်၊ သေနတ်သံပေါ့၊ ကြားနေကြမဟုတ်တော့ လန့်သွားပါတယ်၊ ဒီမနက်ရောက်တော့ အားလုံးက ပုံမှန်အတိုင်းပဲ” ဟု အထက်ပါ ညောင်ရွှေမြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီမှ နိုင်ငံတော်အာဏာသိမ်းယူပြီးနောက်ပိုင်းတွင် ပြည်သူများ အပြင်ထွက် သွားလာခွင့် ပိတ်ပင် တားဆီးမှု အမျိုးမျိုး ပြုလုပ်သည့်အပြင် အပြင်ထွက်ကန့်သတ်ထားသည့် အချိန်ကာလအတွင်း ပစ်ခတ်သံများ မကြာခဏ ကြားရလေ့ရှိကြောင်း ဒေသခံများက ပြောဆိုကြသည်။
ထို့အပြင် စစ်တပ်အာဏာသိမ်းပြီးနောက်ပိုင်း သျှမ်းပြည်တောင်ပိုင်း အပါအဝင် နိုင်ငံတဝန်းလုံး၌ ခိုးဆိုးလုနှိုက် မှုများ ပေါ်ပေါ်တင်တင်ဖြစ်ပွားလာနေသော်လည်း ဖမ်းဆီးအရေးယူခြင်းမရှိသည့် ရဲတပ်ဖွဲ့နှင့် လုံခြုံရေး တပ်ဖွဲ့ များကို ပြည်သူတို့က ပြစ်တင်ဝေဖန်နေကြသည်။
Leave a Comments