ကရင်ပြည် ဖာပွန်မြို့နယ် ငါးအိမ်စုကျေးရွာ(သျှမ်းရွာ)တွင် နေထိုင်သည့် သျှမ်းစာပေနှင့် ယဥ်ကျေးမှု အဖွဲ့ ဦးဆောင်သူ တစ်ဦး သေနတ်ဖြင့် လုပ်ကြံသတ်ဖြတ်ခြင်းခံလိုက်ရကြောင်း သတင်းသိရသည်။

ဖြစ်စဥ်မှာ ပြီးခဲ့သည့် မေလ ၃၁ ရက် ည ၅ နာရီခွဲဝန်းကျင်တွင် နေအိမ်အတွင်းရေကန်ဆေးနေသည့် ကရင်ပြည် သျှမ်းစာ/ယဥ် ဦးဆောင်သူဖြစ်သည့် လုံးစိုင်းဝင်းအောင်ကို လက်နက်ကိုင် တပ်ဖွဲ့တစ်ခုမှ စနက်ဘာ သေနတ်ဖြင့် ပစ်ခတ်ခဲ့ကြောင်း ကရင်ပြည် သျှမ်းတိုင်းရင်းသားရေးရာ စိုင်းစံ(ခ) ကျောက်ဝ်ဆိုင်မိန်း က သျှမ်းသံတော်ဆင့်ကို ပြောသည်။

“တွေ့ရတဲ့ ကျည်ဆံအရဆိုရင် စနက်ဘာ သေနတ်နဲ့ ပစ်သတ်ခံလိုက်ရတာပါ၊ သူကအများအကျိုး ရပ်ရွာအကျိုးနဲ့ သျှမ်း စာ/ယဥ် အဖွဲ့အစည်းကြီးအတွက် ကိုယ့်အိတ်စိုက်နဲ့ကိုယ် စွမ်းစွမ်းတမံ လုပ်ဆောင်ခဲ့တဲ့လူပါ၊ ဘာကြောင့် အခုလို အသတ်ခံလိုက်ရလဲ မသိဘူး” ဟု ၎င်းအမျိုးသားက ပြောပြသည်။

သေနတ်ပစ်သတ်ခံလိုက်ရသည့် လုံးစိုင်းဝင်းအောင်သည် ငါးအိမ်စု ကျေးရွာတွင် မိသားစုများနှင့်အတူနေထိုင်ကာ စိတ်ထားကောင်းသူ တစ်ယောက်ဖြစ်ကြောင်း ဒေသခံများက ပြောသည်။

လုံးစိုင်းဝင်းအောင်သည် အိမ်ဝန်းအတွင်းရှိ အုတ်ရေကန်ကို ဆေးကြောနေစဥ်တွင် နောက်ဘက်ကနေ ပစ်ခတ် လိုက်သည့် သေနတ်ကျည်ဆန်က အရှေ့ဘက် မျက်နှာအထိ ဖောက်ထွက်သွားပြီး သေဆုံးသွားခဲ့ ရကြောင်း နီးစပ်သူ တစ်ဦးက သျှမ်းသံတော်ဆင့်ကို ပြောသည်။

“နောက်ဘက်ကနေပြီး ပစ်လိုက်တဲ့ ကျည်ဆံက ဦးခေါင်းကိုဖြတ်ပြီး မျက်နှာဘက်အထိကို ဖောက်ထွက်သွားတယ်၊ သေဆုံးသွားတဲ့အချိန်မှာ မျက်နှာနဲ့ ဦးခေါင်းပိုင်းကတော့ တော်တော်လေးကို ရုပ်ပျက်ဆင်းပျက် ဖြစ်ပါ တယ်၊ ကျည်ဆံ တစ်ချက်တည်းပါ” ဟု အထက်ပါ နီးစပ်သည့် ပုဂ္ဂိုလ်က ပြောသည်။

လုံးစိုင်းဝင်းအောင်၏ ရုပ်အလောင်းကို သုဿာန်ရှိရာသို့ သွားသဂြိုလ်ရန် ကြောက်လန့်နေကြသဖြင့် အိမ်နီးချင်း နှင့် နီးစပ်သည့်ဆွေမျိုးများ စုပေါင်းကာ ချောက်ကမ်းပါးအနီးသို့ တတ်တဆိတ် မြေမြုပ်သဂြိုလ်လိုက်ရကြောင်း လည်း သိရသည်။

“လက်ရှိ ကျန်နေတဲ့ မိသားစုဝင်တွေကလည်း သူတို့ပါ လုပ်ကြံခံရမလားဆိုပြီး စိုးရိမ်နေရပါတယ်၊ တရားဥပဒေ စိုးမိုးမှု မရှိတော့ နီးရာဓားကို ကြောက်နေရတဲ့ အနေအထားပေါ့၊ ကျနော်တို့ ဖာပွန်ဒေသက သျှမ်းလူမျိုးတွေဟာ လက်နက်ကိုင်အဖွဲ့အစည်းတွေရဲ့ လူ့အခွင့်အရေးချိုးဖောက်မှုတွေ ခဏခဏကြုံရတယ်၊ လုပ်တဲ့တရားခံကို သိရင်တောင် မပြောရဲတဲ့ ချုပ်ခြယ်ခြိမ်းခြောက်မှု ကြုံနေရတယ်” ဟု ၎င်းက ပြောသည်။

ကရင်ပြည်နယ် ဖာပွန်ခရိုင် ဖာပွန်မြို့နယ်မှ ငါးအိမ်စုကျေးရွာ(သျှမ်းရွာ) သည် KNU/KNLA တပ်မဟာ ၅ သွား လာလှုပ်ရှားသည့် နေရာဒေသတစ်ခုဖြစ်ပြီး လုံးစိုင်းဝင်းအောင်သည် စစ်ကောင်စီအားပေးထောက်ခံသူ မဟုတ်သည့် အတွက် မည်သည့်အတွက်ကြောင့် အသတ်ခံလိုက်ရခြင်းကို နားမလည်နိုင်ကြောင်း ဆွေမျိုး အသိုင်းအဝိုင်းများက ပြောဆိုကြသည်။

ဖာပွန်မြို့နယ်တွင် သျှမ်းလူမျိုး (၈၄၇၄) ဦး ရှိပြီး ငါးအိမ်စုရွာတွင် လူဦးရေ (၃၀၀) နီးပါးရှိကြောင်း သိရသည်။

ယင်းကိစ္စဖြစ်စဥ်များနှင့် ပက်သက်ပြီး မြေပြင်အနေအထားနှင့် ဖြစ်စဥ်အခြေအနေများ မေးမြန်းရန်အတွက် KNU/KNLA တပ်မဟာ ၅ ထံ ကြိုးစားဆက်သွယ်နေသော်လည်း အဆက်အသွယ်မရရှိသေးပေ။