သျှမ်းပြည်တောင်ပိုင်း လင်းခေးမြို့တွင် စစ်ကောင်စီ လက်အောက်ခံ ဌာနေ ပြည်သူ့စစ်တပ်ဖွဲ့တို့ ဦးဆောင်ပြီး လောင်းကစားဝိုင်းများ ဖွင့်လှစ်နေကြောင်း ဒေသခံများထံမှ စုံစမ်းသိရသည်။
ပြီးခဲ့သည့် မေလ ၁၇ ရက်မှ စတင်ပြီး လင်းခေးမြို့နယ်အတွင်း စတင်ဖွင့်လှစ်ကာ လောင်းကစားဝိုင်းများသည် လာမည့် ဇွန်လ ၈ ရက်နေ့အထိ ဖွင့်လှစ်သွားမည်ဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။
“ပြီးခဲ့တဲ့ မေ ၁၇ ရက်ကတည်းက ဖွင့်လာတာပါ၊ စေတီထီးတော်တင်ပွဲအတွက် ဆိုပြီး လာဖွင့်တာ၊ ဒါပေမဲ့ အဲ့ထီးတော်က လာမယ့် လပြည့်နေ့မှ တင်မှာ၊ S သုံးလုံးပြည်သူ့စစ်တပ်ဖွဲ့က ဦးဆောင်ဖွင့်တဲ့ လောင်းကစားဝိုင်း တွေပေါ့၊ တစ်လကြာအောင်ဖွင့်မှာ” ဟု လင်းခေးဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။
လောင်းကစားဝိုင်းပြုလုပ်ရန် အတွက် ဌာနေပြည်သူ့စစ်တပ်ဖွဲ့များ၏ တောင်းဆိုမှုကို ငြင်းပယ်သည့် ရပ်ကျေး လူကြီးများလည်း ရှိသည့်အတွက် နောက်ဆုံးတွင် မြို့နယ်ထွေအုပ်နှင့် ဗျူဟာမှူးခွင့်ပြုချက် လက်မှတ်ပါသည့် စာစောင်ဖြင့် ရပ်ကျေးအုပ်ချုပ်ရေးမှူးထံ အကြောင်းကြားကာ လောင်းကစားဝိုင်း ပြုလုပ်ခဲ့ခြင်း ဖြစ်ကြောင်းလည်း သိရသည်။
လက်ရှိတွင် စစ်ကောင်စီတို့၏ ခွင့်ပြုချက်နှင့် ဌာနေပြည်သူ့စစ်တပ်ဖွဲ့များ ဦးဆောင်ကာ လင်းခေးမြို့နယ်ရှိ တန်စန့်ကျေးရွာတွင် လောင်းကစားဝိုင်းများ ပြုလုပ်နေကြောင်း ဒေသခံများက ပြောသည်။
“ဟွေလိရွာနား မရောက်ခင် တန်စန့်ကျေးရွာမှာ လောင်းကစားဝိုင်းဖွင့်နေပါတယ်၊ ခုအတောအတွင်းမှာပဲ ကျနော်တို့ ဒေသထဲမှာ ဆိုင်ကယ်ပျောက်တယ်၊ မီးကြိုးတွေပျောက်တယ် ခိုးမှုတွေက များလာပြီ၊ အိမ်တွင်းရေး ဆူပူမှု တွေလည်း များလာတယ်” ဟု တာဆိပ်ကျေးရွာအုပ်စုမှ အမျိုးသားလူငယ်တစ်ဦးက ပြောသည်။
အဆိုပါ လောင်းကစားဝိုင်းများကြောင့် ဒေသအတွင်းအိမ်ထောင်ရေး ဆူပူမှုများအပြင် ပစ္စည်းများပေါင်နှံ၊ ရောင်းချ ၊ ခိုးယူပြီး လောင်းကြေးရှာဖွေနေသူများလည်း များပြားသည့်အတွက် ဒေသခံများက စိုးရိမ်မှုမြင့်တက်နေ ကြောင်း သိရသည်။
“ဖြစ်နိုင်ရင်တော့ လောင်းကစားဝိုင်းတွေမရှိတာပဲကောင်းပါတယ်၊ အခုဆို စလာတဲ့တစ်ပတ်အတွင်း သိန်းရာချီ ရှုံးတဲ့ သူလည်းရှိနေပြီ၊ ဒီပုံစံဆို ကြာလာရင် မလွယ်ဘူးလေ၊ ဒေသအတွင်းက မရှိဖူးတဲ့ လောင်းကစားဝိုင်းတွေ ရှိလာတော့ နောက်ပိုင်း ခိုးယူလုယက်မှုတွေ မရှိလာနိုင်ဘူးလို့လည်း မပြောနိုင်ဘူး” ဟု အထက်ပါ လူငယ်က ပြောသည်။
အဆိုပါ SSS ပြည်သူ့စစ် ဦးဆောင်ဖွင့်လှစ်သည့် လောင်းကစားဝိုင်းတွင် လေးကောင်ဂျင်၊ ဂုံးဂင်း၊ ဖဲဝိုင်း နှင့် သျှမ်းကိုးမီး အပါအဝင် တခြား လောင်းကစားဝိုင်းများလည်း ရှိနေကြောင်း သိရသည်။
အာဏာသိမ်းပြီး နောက်ပိုင်း သျှမ်းပြည်အတွင်းမှာ လောင်းကစားရုံများကို ဌာနေပြည်သူ့စစ် နှင့် စစ်ကောင်စီ အုပ်စုတို့ ပူးပေါင်းပြီး ကျယ်ကျယ်ပြန့်ပြန့်ဖွင့်လှစ်လာသည်။ ထိုကဲ့သို့ လောင်းကစားရုံများကို နေရာတိုင်း လွတ်လပ်စွာ ဖွင့်လှစ်လာသည့်နောက်ပိုင်း ပြည်သူများ၏ လုံခြုံရေးလည်း ယိုယွင်း ပျက်စီး လာကြောင်း သိရသည်။
Leave a Comments