သျှမ်းပြည်တောင်ပိုင်း နမ့်စန်မြို့နယ် ဌာနေပြည်သူ့စစ်များ ဦးစီးဖွင့်လှစ်သည့် လောင်းကစားပွဲတွင် မြန်မာပြည်မှာ နာမည်ကြီးအဆိုတော်များကို ခေါ်ဆိုကြောင်း စုံစမ်းသိရသည်။

လက်ရှိ နမ့်စန်မြို့နယ်အတွင်း ပြုလုပ်နေသည့် လောင်းကစားပွဲများကို နားရိုင်းပြည်သူ့စစ်၊ ပန်လျန်းဆိုင်ပြည်သူ့စစ် နှင့် SSS ပြည်သူ့စစ် တို့ ဦးဆောင်ပြီး ဖွင့်လှစ်ကာ နာမည်ကြီးအဆိုတော် နီးနီခင်ဇော်၊ ၀ေလ၊ သာဒီးလူ၊၀န ၊ဟန်ထွန်း၊ သအို နှင့် အတူ Mercury 9 Band တို့ က တီးခတ်ဖျော်ဖြေမည် ဟု ဒေသခံများက သျှမ်းသံတော်ဆင့်ကို ပြောသည်။

“ လောင်းကစား၀ိုင်းကတော့ လုပ်နေတာကြာပြီ။ နာမည်ကြီးအဆိုတော်ကိုခေါ်တာတော့ ၂လပိုင်းကတည်းစခေါ်တယ်။ အခုရက်ပိုင်းနီနီခင်ဇော်၊ ၀န၊ သအို၊ ဟန်ထွန်းတို့ အဖွဲ့၊ အဆိုတော် တယောက်ကို ၃ညစီ ဆိုပါတယ်။ ပြည်သူ့စစ်နဲ့ စကစ ပေါင်းလုပ်တာပါ” ဟု နာမည်မဖော်လိုသည့် နမ့်စန်ဒေသခံ အသက် ၃၅နှစ်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

နမ့်စန်မြို့နယ်အတွင်းကျင်းပမည့် လောင်းကစားပွဲသည် ၀ါတွင်းကာလ (၃)လ မှ လွဲပြီး ရက်ရှည် လရှည်ဖွင့်လှစ်ရန် စီစဥ်ထားကြောင်း လည်းသိရသည်?

“ အခုလက်ရှိက ရပ်ကွက် ၄ မှာ ပွဲလုပ်နေတယ်။ သူတို့ဖွင့်လာတာ ၂ လကျော်လောက်ရှိနေပြီ။ ပြည်သူ့စစ်တွေက ဦးဆောင်ပြီးဖွင့်ပေးနေတာ။ သူတို့လှုပ်ရှားတဲ့နေမြေတွေ မှာ ဖွင့်ပေးတာ။ နာရိုင်း ပြည်သူ့စစ်တွေ ထိန်းချုပ်တဲ့နယ်မြေမှာ အလှည့်ကျဖွင့်တာ” ဟု နမ့်စန်မြို့ အသက်၄၀ကျော် အမျိုးသားတစ်ဦး က သျှမ်းသံတော်ဆင့်ကို ပြောသည်။

စစ်အာဏာသိမ်းပြီးနောက် နမ့်စန်မြို့တွင် လောင်းကစားရုံ အများအပြားဖွင့်နေပြီး တစ်နေရာ နှင့် တစ်နေရာမတူညီသည့်အပြင် တစ်ချို့နေရာများတွင် လချီကြာဖွင့်လှစ်ကြောင်း သိရသည်။

“ နာရိုင်းပြည်သူ့စစ်တို့ ဦးဆောင်တဲ့ လောင်းကစားဆိုရင် တစ်ရွာပြီးတစ်ရွာ လုပ်သွားတာ။ ပန်လျန်းဆိုင် ပြည်သူ့စစ်တို့လည်းအတူတူပဲ။ စစ်တပ်က အာဏာသိမ်းပြီးနောက်ပိုင်းမှာဆိုရင် ဝါတွင်းက လွဲလို့ ဖွင့်နေတာပဲ။ သူတို့မဖွင့်တာဆိုရင် ၃ လပဲရှိတယ်” ဟု ဒေသခံ အမျိုးသားက ပြောသည်။

ထို့ပြင် လက်တလော လောင်းကစားရုံများကို ၂၄ နာရီဖွင့်လှစ်ထားပြီး လောင်းကစားသွားဆော့သည့် သူ အများစုသည် လူငယ် များဖြစ်ကြောင်းသိရသည်။

“ သူတို့ဖွင့်ထားတဲ့ လောင်းကစားက အားတဲ့ချိန်တိုင်းသွားဆော့လို့ရတယ်။ နေ့ကော ညကောသွားဆော့လို့ရတယ်။ မြို့ထဲမှာဆိုရင် လူလည်း အမြဲစည်ကားတယ်။ ရွာဘက်မှာတော့ လကွယ်၊ လပြည့်ညပဲ စည်တယ်။ ရဲတွေ ၊ စစ်တပ်တွေလည်းလောင်းကစားသွားတဲ့သူကို လွတ်လွတ်လပ်လပ်ထားထားပေးတယ်” ဟု အထက်ပါ ဒေသခံအမျိုးသားက ပြောသည်။

အာဏာသိမ်းပြီးနောက်ပိုင်း သျှမ်းပြည်အတွင်းမှာ လောင်းကစားရုံများကို ဌာနေပြည်သူ့စစ်၊ စစ်ကောင်စီ အုပ်စုပူးပေါင်းပြီး ကျယ်ကျယ်ပြန့်ပြန့်ဖွင့်လှစ်လာသည်။ ထိုကဲ့သို့ လောင်းကစားရုံများကို နေ့ရာတိုင်းလွတ်လပ်စွာ ဖွင့်လှစ်လာသည့်နောက်ပိုင်းတွင် ပြည်သူများ၏ လုံခြုံရေးလည်း ယိုယွင်းပျက်စီးလာကြောင်းသိရသည်။