သျှမ်းပြည်တောင်ပိုင်း မိုးဗြဲမြို့ ဝါရီဆူးဖလိုင်ကျေးရွာအတွင်း ဒေသခံများက ရိက္ခာပြန်ယူရာမှာ စစ်ကောင်စီနှင့် မိုးဗြဲပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားမှုနှင့် ကြုံခဲ့ရကြောင်း စုံစမ်းသိရသည်။
ယမန်နေ့ (မေလ ၂၂) ရက် ည ၄ နာရီဝန်းကျင် စစ်ဘေးရှောင်နေသည့် ဝါရီဆူးဖလိုင်ကျေးရွာ ဒေသခံများက ရိက္ခာပြတ်တောက်သွား၍ ကျေးရွာအတွင်း ရိက္ခာပြန်ယူရန်အတွက် မိုးဗြဲပြည်သူ့ကာကွယ်ရေး PDF များကို အကူအညီတောင်းကာ လမ်းကြောင်းရှင်းလိုက်ပါကူညီခဲ့သည်။
ထိုကြောင့် ကျေးရွာအတွင်း စစ်ကောင်စီက တပ်စွဲထားသဖြင့် PDF နှင့် စစ်ကောင်စီ ထိတွေ့မှုဖြစ်ပွားကာ တိုက်ပွဲ ဖြစ်ပွားခဲ့ကြောင်းသိရသည်။
“စစ်ဘေးရှောင်ပြည်သူတွေက ရိက္ခာပြန်ယူတယ်ဆိုလို့ လုံခြုံရေးကင်းထောက်ပေးရင် ရွာထဲမှာ တပ်စွဲထားတဲ့ စစ်ကောင်စီတပ်နဲ့ ထိပ်တိုက်တိုးပြီးတော့ တိုက်ပွဲ စဖြစ်ပွားခဲ့တာပါ” ဟု မိုးဗြဲပြည်သူ့ကာကွယ်ရေးတပ်ဖွဲ့ ဗဟိုသတင်း နှင့် ပြန်ကြားရေးဌာန တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
အဆိုပါ တိုက်ပွဲဖြစ်ပွားရာတွင် စစ်ကောင်စီဘက်က အသေအပျောက်ရှိကြောင်း နှင့် PDF ဘက်တွင်လည်း တစ်ဦး ဒဏ်ရာအနည်းငယ်ရရှိခဲ့ကြောင်း ၎င်းက ပြောသည်။
“စစ်ကောင်စီဘက်တော့ အသေအပျောက်တွေလည်းရှိတယ်။ ဘယ်လောက်ထိရှိလဲတော့ ကျနော်တို့ အတိကျမသိရသေးဘူး။ ကျနော်တို့ဘက်ကလည်း PDF တပ်ဖွဲ့ဝင်တစ်ဦး ဒဏ်ရာအနည်းငယ်လောက်တော့ ရရှိခဲ့ပါတယ်။ ဒါပေမယ့် အရမ်းတော့ မစိုးရိမ်ရဘူး” ဟု အထက်ပါ တာဝန်ရှိသူ တစ်ဦးက ဆိုသည်။
စစ်ကောင်စီဘက်က လက်နက်ကြီးဖြင့် တိုက်ခိုက်ခဲ့သော်လည်း ဝါရီးဆူဖလိုင် ကျေးရွာဒေသခံများအတွက် ရိက္ခာအနည်းငယ် ယူထုတ်လာနိုင်ကြောင်း သိရသည်။
လက်ရှိအချိန်ထိ ဝါရီးဆူဖလိုင်ကျေးရွာထဲတွင် စစ်ကောင်စီတပ်စွဲထားလျက်ရှိကြောင်းသိရသည်။
မေလ ၁၂ ရက်နေ့ကစပြီး ဖယ်ခုံမြို့နယ် အတွင်း စစ်ကောင်စီ နှင့် ဖယ်ခုံ PDF တို့ တိုက်ပွဲစတင်ဖြစ်ပွား ခဲ့ပြီး စစ်ကောင်စီက အင်အားအလုံးအရင်း အသုံးပြုကာ ထိုးစစ်ဆင်နေခြင်း၊ လေကြောင်းလိုင်းဖြင့် တိုက်ခိုက်မှုများရှိခြင်း၊ ဆောင်နန်းခဲကျေးရွာကို မီးရှို့ ဖျက်ဆီးခြင်းများ ပြုလုပ်ခဲ့သည်။
Leave a Comments