သျှမ်းပြည်တောင်ပိုင်း ဖယ်ခုံမြို့နယ် အတွင်းရှိ ကျေးရွာတစ်ချို့ ဖုန်းလိုင်းများ ပိတ်ထားခံရကြောင်း စုံစမ်းသိရှိရသည်။
ဖယ်ခုံမြို့တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ (PDF) တို့ တိုက်ပွဲပြင်းထန်ပြီးနောက် ယခုလ ၁၃ ရက်နေ့မှ စပြီး အင်တာနက် နှင့် ဖုန်းလိုင်းများ ပိတ်ခံထားရကြောင်း ဒေသခံ တစ်ဦးက သျှမ်းသံတော်ဆင့် ပြောသည်။
“ ၁၃ ရက်နေ့က စပြီးတော့ ဖုန်းလိုင်းတွေဖြတ်ခံရတာ။ ဖုန်းဆက်လို့မရဘူး ။ အိမ်မှာလည်း ဝိုင်ဖိုင်နဲ့ချိတ်ပြီးသုံးနေရတာ။ ဖုန်းခေါ်ရင်လည်း စစ်ကောင်စီက ခြေရာခံနိုင်တယ်။ ဖုန်းခေါ်လို့လည်း သိပ်အဆင်မပြေဘူး အရင်လို နေရာတကာလ ဝိုင်ဖိုင်သုံးလို့မရဘူး ” ဟု ဖယ်ခုံမြို့နယ် လွယ်ပေါ ကျေးရွာဒေသခံ တစ်ဦးက ပြောသည်။
အလားတူ ဖယ်ခုံမြို့နယ် PDF တပ်ဖွဲ့ဝင်တစ်ဦးကလည်း “ ဟုတ်တယ်။ တစ်ချို့နေရာက မရကြဘူး။ ကျနော်တို့နေရာတော့ ရပါတယ်။ အနောက်ဘက်ကမ်းက သိပ်မရဘူးလို့ကြားတယ်” ဟု ပြောသည်။
ဖယ်ခုံမြို့နယ်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ (PDF)တို့ မေလ ၁၂ ရက်မှ စပြီး တိုက်ပွဲပြင်းထန်ကာ မေ (၁၅)ရက်တွင် စစ်ကောင်စီဘက်မှ တိုက်လေယာဥ်ဖြင့် ထိုးစစ်ဆင်ခဲ့ကြောင်းသိရသည်။