သျှမ်းပြည်အရှေ့ပိုင်း တာချီလိတ်မြို့ စစ်တပ်ထွက် “အဆွေတော်” မီနီမတ် စတိုးဆိုင် ယမန်နေ့ (မေ ၉ ) ရက် ည (၈) နာရီဝန်းကျင်က ဗုံး (၂) လုံးပေါက်ကွဲခဲ့ပြီး ဆိုင်ဝန်ထမ်း (၄) ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
“ မနေ့က ဗုံး (၂) လုံးပေါက်ကွဲတာ။ ဆိုင်ကဝန်ထမ်း (၄)ယောက်လောက်တော့ ထိသွားတယ်လို့ကြားတယ်။ အဲဆိုင်က စစ်ထွက်က ပိုင်တာ။ အခုတော့ သူမရှိတော့ဘူး။ သူသားသမီးတွေဆက်ကိုင်ထားတာထင်တယ်။ သူဌေးအသိုင်းအဝိုင်းတွေပဲ။ စစ်တပ်ထွက်တဲ့သူတွေပဲဖြစ်တာ” ဟု တာချီလိတ်မြို့ ဒေသခံအမျိုးသားတစ်ဦးက ပြောသည်။
ယခုရက်ပိုင်း တာချီလိတ်မြို့တွင် ဗုံးပေါက်ကွဲမှုသည် နိုင်ငံရေးနှင့် ပတ်သတ်နေကြောင်း၊ ယခင်က အခွန် (ဆက်ကြေး ) ကြောင့်သာ ဗုံးပေါက်ကွဲမှုဖြစ်ပွားလေ့ရှိကြောင်းသိရသည်။
“ အရင်ကဆိုရင် ဗုံးပေါက်ကွဲတာက ဆက်ကြေးတွေကြောင့်ပဲ ဖြစ်တာ။ ဆက်ကြေးမပေးတဲ့နေရာတွေမှာပဲ အများဆုံးဗုံးပေါက်ကွဲတာ။ အခုမှ နိုင်ငံရေးနဲ့ ပတ်သတ်ပြီး ဗုံးပေါက်ကွဲမှုတွေဖြစ်နေတာ။ မနေ့က ဖြစ်သွားတဲ့ ဆိုင်ဆိုရင်လည်း စစ်တပ်အသိုင်းဝိုင်းနဲ့နီးစပ်တဲ့သူတွေဖြစ်တယ်” ဟု တာချီလိတ်မြို့ ဒေသခံ အမျိုးသားတစ်ဦးက ပြောသည်။
အလားတူ ပြီးခဲ့သည့် မေလ ၅ ရက်နေ့တွင်လည်း တာချီလိတ်မြို့ ပြည်ခိုင်ဖြိုးရုံး သေနတ် ပစ်ခတ်ခံခဲ့ရကြောင်း သိရသည်။
Leave a Comments