စစ်ခေါင်းဆောင် ရောက်သည့်ကာလအတွင်း တာချီလိတ်မှ လောင်းကစားဝိုင်းများ ပိတ်ထားခိုင်း

0

သျှမ်းပြည်အရှေ့ပိုင်း တာချီလိတ်မြို့တွင် ရဲတပ်ဖွဲ့ဟောင်းတစ်ဦးထံမှ မူးယစ်ဆေးဝါးများ စစ်ဆေးဖမ်းဆီးမိခြင်း နှင့် ပက်သက်ပြီး နေပြည်တော်မှ စစ်ခေါင်းဆောင်တစ်ဦး လာရောက်စစ်ဆေးမည်ဖြစ်သဖြင့် လောင်းကစား၀ိုင်းများ ပိတ်ခိုင်းထားကြောင်း စုံစမ်းသိရသည်။

ထို နေပြည်တော်မှ စစ်ခေါင်းဆောင်ရောက်ရှိလာသည့် ကာလအတွင်းတွင် တာချီလိတ်မြို့အတွင်းရှိ ကာစီနိုဝိုင်းများအပါအဝင် လောင်းကစားဝိုင်းများ အားလုံးပိတ်သိမ်းရန် ညွှန်ကြားထားကြောင်း ဒေသခံများထံမှ သိရသည်။

တာချီလိတ်မြို့ရှိ လောင်းကစားရုံ

“စစ်ကောင်စီဘက်က အရာရှိကြီး တစ်ဦးကိုယ်တိုင်က အဲ့အမှုကို လာစစ်မယ်ဆိုတော့ တာချီလိတ်မြို့နယ်ထဲက လောင်းကစားဝိုင်းတွေ အကုန်ပိတ်ထားခိုင်းတယ်၊ ၅ ရက်နေ့ ကတည်းက ပိတ်ထားတာ အခုထိ ပြန်မဖွင့်ရသေးဘူး၊ အဲ့မှာအလုပ်လုပ်တဲ့သူတွေလည်း အလုပ်မဆင်းရသေးဘူး” ဟု တာချီလိတ်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ နေပြည်တော်မှ စစ်ကောင်စီ အရာရှိသည် ပြီးခဲ့သည့် ဧပြီလ ၂၄ ရက်နေ့တွင် တာချီလိတ်မြို့နယ်အတွင်း ရဲတပ်ဖွဲ့ဟောင်းတစ်ဦးထံမှ စိတ်ကြွဆေးပြား ၁၂ သန်းကျော် ဖမ်းဆီးရမိခြင်းနှင့် ပက်သက်ပြီး လာရောက် စစ်ဆေးမည်ဖြစ်ကြောင်း သိရသည်။

လက်ရှိတွင် လောင်းကစားဝိုင်းများ ပိတ်ထားရသည်မှာ တစ်ပတ်နီးပါးရှိနေပြီ ဖြစ်သော်လည်း ပြန်မဖွင့် ရသလို လိုင်းခန်းတစ်လျောက်ဖွင့်ထားသည့် လောင်းကစားဆိုင်များမှ ကွန်ပျူတာ နှင့် တခြား အသုံးအဆောင် ပစ္စည်းများကိုလည်း ဆိုင်ခန်းနေရာအတွင်း မထားနိုင်ဘဲ နေအိမ်သို့ သယ်ဆောင်သိမ်းဆည်းရကြောင်းလည်း သိရသည်။

“ငါးပစ်ဂိမ်းတွေ၊ အွန်လိုင်းက ဂိမ်းတွေနဲ့ တခြားဂိမ်းက အသုံးအဆောင်နဲ့ ကွန်ပျူတာတွေကိုလည်း ဝန်ထမ်းတွေ က အိမ်သယ်သွားရတာ၊ အလုပ်လည်း မဆင်းရသေးတော့ တချို့ဝန်ထမ်းတွေက ကာစီနိုဝိုင်းတွေ လောင်းကစား ဝိုင်းကနေပဲ ဝင်ငွေရပ်တည်နေတော့ အလုပ်နားတာကြာရင် မလွယ်ဘူးလေ” ဟု အထက်ပါ ပုဂ္ဂိုလ်က ဆက်လက်ပြောပြသည်။

တာချီလိတ်မြို့သည် မြန်မာ – ထိုင်းနယ်စပ် ကုန်သွယ်ရေး မြို့တစ်ခု ဖြစ်သည့်အပြင် ဒေသအတွင်းကုန်သွယ်မှု များနှင့် တခြားဒေသမှ ကုန်သည်များ စီးပွားရေးလုပ်ငန်းရှင်များ လာရောက်ရင်းနှီးမြုပ်နှံသည့် မြို့တစ်ခုလည်း ဖြစ်ရာ လောင်းကစားဝိုင်းများ ပေါများရာ ဖြစ်ကြောင်း သိရသည်။

Leave a Comments