သျှမ်းပြည်မြောက်ပိုင်း ကွတ်ခိုင်မြို့နယ် အတွင်းရှိနေသည့် စစ်ဘေးရှောင်များသည် နေရာအသစ်ကို ပြောင်းရွှေ့ရန်အတွက် အခက်ခဲများစွာရှိနေကြောင်း စုံစမ်းသိရှိရသည်။လက်ရှိ စစ်ဘေးရှောင်များနေထိုင်နေသည့် အသင်းတော် နယ်မြေနေရာတွင် နေထိုင်လာရာ ၁၀ နှစ်ကျော်ရှိနေပြီ ဖြစ်သည့်အတွက် နေရာအသစ်ကို ပြောင်းရွှေ့ရန် မြေနေရာ အခက်ခဲရှိနေကြောင်း သိရသည်။

“ ကျမတို့ အခုနေတဲ့ နေရာကလည်း အသင်းတော်တွေရဲ့  နယ်မြေဖြစ်တယ်လေ။ ပြီးတော့ နေလာတာကလည်း ၁၀ နှစ် ရှိနေပြီ။ ကျမတို့လည်း အခု ကိုယ်ပိုင်နေရာအသစ်လေး ရအောင်မလို့ပါ။ အခုက ကျမတို့ပြောင်းဖို့ မြေကွက်တွေ ဝယ်ဖို့ အခက်ခဲတွေရှိနေပါတယ်။ မြေနေရာရဖို့ခက်ခဲနေတယ်” ဟု စစ်ဘေးရှောင်များကို ကူညီပေးနေသည့် အမျိုးသမီးတစ်ဦး က ပြောသည်။

အဆိုပါ စစ်ရှောင်များသည် နိုင်ငံရေး အခြေနေ နှင့် ကိုဗစ် – ၁၉ ကပ်ရောဂါတွေကြောင့် အလုပ်လက်မဲ့ဖြစ်ခဲ့ရပြီး ဝင်ငွေမရှိကြောင်းသိရသည်။ လက်ရှိတွင်လည်း နေရပ်ကို ပြန်ဖို့အတွက် နိုင်ငံရေးအခြေနေကြောင့် မပြန်နိုင်သေးကြောင်း သိရသည်။

“ နေရပ်ကို ပြန်သွားဖို့လည်း အခုက နိုင်ငံရေး အခြေနေကြောင့်လည်း မပြန်နိုင်သေးဘူးလေ။ အခုကလည်း အလုပ်လက်မဲ့ဖြစ်ကြပါတယ်။ နိုင်ငံရေးလည်းမကောင်းဘူး။ ကိုဗစ် ကလည်းရှိနေတဲ့ အတွက်ကြောင့် အလုပ်လက်မဲ့ ဖြစ်နေတယ်” ဟု အထက်ပါ အမျိုးသမီးကလည်း ပြောသည်။

ကွတ်ခိုင်မြို့နယ်အတွင်းရောက်ရှိနေသည့် စစ်ရှောင်များသည် စစ်ရှောင်စခန်း (၂) ခုရှိနေပြီး လူဦး‌ရေ စုစုပေါင်း (၄၀၀) ကျော်ရှိကြောင်းသိရသည်။