သျှမ်းပြည်မြောက်ပိုင်း မူဆယ်မြို့တွင် နေထိုင်သည့် PDF တပ်သား၏မိသားစုဝင် အမျိုးသမီးတစ်ဦးကို စစ်ကောင်စီက ဓားစာခံအဖြစ် လာရောက်ဖမ်းဆီးသွားကြောင်း စုံစမ်းသိရှိရသည်။
မူဆယ်မြို့ ပြည်သူ့ကာကွယ်ရေးတပ်ဖွဲ့ PDF တပ်ဖွဲ့ဝင်တစ်ဦး၏ အမဖြစ်သူကို စရဖက ယမန်နေ့ မေလ ၂ ရက်နေ့ ညနေပိုင်း ၄ နာရီဝန်းကျင်တွင် စစ်ကောင်စီ လက်အောက်ခံ စရဖ က ၎င်း၏ နေအိမ်သို့ ရွှေဝယ်ရန်ဟန်ဆောင်ပြီး လာရောက်ဖမ်းဆီးသွားကြောင်းသိရသည်။
“ သူ့အမကလည်း Keyboard fighter လည်းဖြစ်တယ်။ သူတို့နဲ့အမျိုးတော်တာလည်း သူတို့သိထားတယ်။ အရပ်ဝတ်တွေနဲ့ပဲလာခေါ်သွားတာ။ လူ (၃)ဦးက ရွှေဝယ်မယ်ဆိုပြီးတော့ ဟန်ဆောင်ပြောဆိုပြီး လာခေါ်သွားတာပေါ့” ဟု PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
ထိုအမျိုးသမီးကို လက်ရှိမှာ ၅၀၅(က) ဖြင့်ဖမ်းဆီးသွားပြီး စရဖ စစ်ကြောရေး စခန်းတွင်တည်ရှိနေကြောင်း PDF တပ်ဖွဲ့ဝင်က ထပ်လောင်းပြောပြသည်။
စစ်ကောင်စီက PDF တပ်ဖွဲ့ဝင် မိသားစုများကို ဓားစားခံအဖြစ်ထပ်မံဖမ်းဆီးလာပါက စစ်ကောင်စီ၏ ပိုင်ဆိုင်မှုများ၊ စစ်ကောင်စီ လက်အောက်ခံ ဝန်ထမ်းများ၊ ရဲများ၏ မိသားစုဝင်များကို ပြန်လည်တိုက်ခိုက်သွားနိုင်ကြောင်း သျှမ်းမြောက် PDF တပ်ဖွဲ့ဝင် တစ်ဦးက သျှမ်းသံတော်ဆင့် ကို ပြောသည်။
“ တော်လှန်ရေး မိသားစုဝင်တွေကို ဖမ်းဆီးဒုက္ခပေးနေရင်တော့ စစ်ကောင်စီလက်အောက်မှာနေတဲ့ ဝန်ထမ်းအားလုံးနဲ့ မိသားစုအားလုံးကို ပြန်တိုက်ခိုက်လိမ့်မယ်။ အရင်ကလည်း ကျနော်တို့ ညီနောင်ဖမ်းခံရတာတွေလည်း ရှိကြပါတယ်။ ကျနော်တို့က တဖြေးဖြေး စစ်ကောင်စီရဲ့ ဒေါက်တိုင်တွေကို ဆက်လက်အရေးယူ ဆောင်ရွက်မှု/တိုက်ခိုက်မှုတွေကို ဆက်လုပ်သွားမှာပါ။ ဒီထက်မက ကျနော်တို့ ပိုပြီး သူတို့ကို ဖိသွားမယ်ဆိုတာ သိသွားမှာပါ” ဟု အထက်ပါ သျှမ်းမြောက် PDF တပ်ဖွဲ့ဝင်တစ်ဦးက ပြောသည်။
အလားတူ ယမန်နေ့ မေလ ၂ ရက်နေ့တွင်လည်း စစ်ကောင်စီ လက်အောက်ခံ စရဖက တောင်ပိုင်းရပ်ကွက်တွင် နေထိုင်သည့် အမျိုးသမီးတစ်ဦးကို လူမှုကွန်ယက်ပေါ် စာတင်မှုကြောင့် လာရောက်ဖမ်းဆီးသွားကြောင်း သိရသည်။
