သျှမ်းပြည်မြောက်ပိုင်း ကျောက်မဲမြို့နယ်မှနေအိမ်တစ်လုံးတွင် ဓားပြတိုက်ခံရပြီး အိမ်ရှင်တစ်ဦးလည်း ဓားစာခံအဖြစ် ဖမ်းဆီးသွားခြင်းခံလိုက်ရကြောင်း သတင်းသိရသည်။

ဖြစ်စဥ်မှာ ယနေ့ (ဧပြီ၃၀ )ရက် နံနက် ၂ နာရီတွင် ကားနှစ်စီးနှင့် ဓားပြတိုက်သူတစ်စုတို့သည် ကျောက်မဲမြို့နယ် တိလင်ရပ်ကွက် ၁၉ ရှိ နေအိမ်တစ်အိမ်ကို ဓားပြဝင်တိုက်ပြီး မိသားစုဝင်တစ်ဦးကို ဖမ်းခေါ်သွားကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မြေကွက်ရောင်းရငွေတွေအကုန်ပါသွားတယ်လို့ သိရပါတယ်၊ ပြီးတော့ တခြားငွေကြေးတွေရော စုစုပေါင်း ကျပ်သိန်း ၃၀၀ ကျော် ပါသွားတယ်တဲ့၊ မိသားစုဝင် တစ်ဦးကိုလည်း ခေါင်းစွပ်ပြီးတော့ ခေါ်သွားတယ်လို့သိ ရပါတယ်” ဟု အဆိုပါ အမျိုးသမီးက သျှမ်းသံတော်ဆင့်ကို ပြောသည်။

အဆိုပါ ဓားပြတိုက်သည့် လူတစ်စုတို့သည် ကားနှစ်စီးဖြင့် ရောက်လာကြခြင်း ဖြစ်ကြပြီး အိမ်ရှင်၏ အမျိုးသမီးဖြစ်သူကိုလည်းရိုက်နှက်ကန်ကျောက်ကာ ပိုက်ဆံများကို ထုတ်ပေးရန် ပြောဆို ရန်ပြုသွားကြောင်းလည်း သိရသည်။

“အိမ်ရှင်အမျိုးသမီးကို ပိုက်ဆံတောင်းတာ ချက်ချင်းထုတ်မပေးလို့ ခြေထောက်နဲ့ ကန်လိုက်သေးတယ်တဲ့၊ သူတို့အုပ်စုက ၁၀ ယောက်လောက်ရှိတယ်၊ တချို့က ပိုက်ဆံတွေ တောင်းနေချိန် တချို့ကလည်း အိမ်ပြင်ကနေ လမ်းကြောင်းကြည့်ပေးတယ်” ဟု အိမ်နီးချင်းတစ်ဦးက သျှမ်းသံတော်ဆင့်ကို ပြောသည်။

လက်ရှိ အဆိုပါ ဓားပြတိုက်သွားသည့် အဖွဲ့များ ဖော်ထုတ်ဖမ်းဆီးနိုင်ရေးအတွက် ဒေသအတွင်းမှ သက်ဆိုင်ရာ အဖွဲ့အစည်းများထံ အကျိုးအကြောင်းပြောဆိုထားသော်လည်း ဖမ်းဆီးခေါ်ဆောင်သွားခြင်း ခံရသူ၏ အသက်အန္တရာယ် စိုးရိမ်သည့်အတွက် တိုင်ချက် မဖွင့်သေးကြောင်း သတင်းသိရသည်။
စစ်တပ်မှ နိုင်ငံတော် အာဏာသိမ်းယူပြီးနောက်ပိုင်း နိုင်ငံတစ်ဝှမ်းလုံးတွင် နိုင်ငံရေးမငြိမ်မသက်မှုများဖြစ်လာပြီး ကျောက်မဲမြို့နယ် အတွင်းမှာလည်း ခိုးဆိုးလုယက်မှုများအပါအဝင် ယခုလို အုပ်စုဖွဲ့ ဓားပြတိုက်မှုများလည်း ရှိလာခြင်းဖြစ်သည်။

ဒေသအတွင်းရှိနေသည့် ရဲတပ်ဖွဲ့ဝင်များအနေဖြင့်လည်း ဒေသတွင်းဖြစ်ပေါ်နေသည့် လုယက်တိုက်ခိုက်မှုများ အပါအဝင် ဒုစရိုက်လုပ်ငန်းများကို ထိရောက်စွာ အရေးဆောင်ရွက်ခြင်းမျာ မလုပ်ဆောင်နိုင်သည့်အတွက် ပြည်သူများအနေဖြင့် စိုးရိမ်ကြောက်လန့်မှုများဖြင့်နေ့စဥ်ဘဝကို ဖြတ်သန်းနေရကြောင်းလည်းဒေသခံများထံမှ သိရသည်။