သျှမ်းပြည်မြောက်ပိုင်း ကျောက်မဲမြို့ သျှမ်းလူငယ်တစ်ဦးသည် ညီဖြစ်သူကို ထောင်ဝင်စာသွားပို့ပြီး အပြန်တွင် ပျောက်ဆုံးသွားပြီးနောက် ဖမ်းဆီးထိန်းသိမ်းခံထားရသည့် သတင်းများလည်း ထွက်ပေါ်နေကြောင်း သတင်းသိရသည်။

ပြီးခဲ့သည့် ဧပြီ ၂၆ ရက် ညနေ ၅ နာရီဝန်းကျင်တွင် နေအိမ်မှ ကျောက်မဲမြို့  မြို့မရဲစခန်းသို့ ထောင်ဝင်စာ ထမင်းထုပ် သွားပို့သည့်  စိုင်းဝင်းဟန် (ခ) ကိုဖြိုးဝေဟန်သည် အပြန်လမ်းတွင် ပျောက်ဆုံးသွားပြီး အဆက်အသွယ်လည်း ပြတ်သွားကြောင်း မိသားစုတစ်ဦးက သျှမ်းသံတော်ဆင့်ကို ပြောသည်။

“ကျနော့်အစ်ကိုက နေ့တိုင်းထောင်ဝင်စာသွားပို့ပါတယ်၊ ဒါက သူ့ရဲ့ ပုံမှန်အလုပ်လိုလည်းဖြစ်နေပြီ၊ ဒါပေမဲ့ အဲ့ဒီ နေ့မှာ ထမင်းထုပ်သွားပို့ပြီး ပြန်မလာတော့ဘူး၊ အဆက်အသွယ်လည်း ပြတ်နေတယ်၊ သူသွားတတ်တဲ့ နေရာအနှံ့ ကိုလည်း လိုက်ရှာပြီးပါပြီ၊ ဒီနေ့ သုံးရက်မြောက်အထိ မတွေ့ရသေး/ အဆက်အသွယ်မရသေးဘူး” ဟု ပျောက်ဆုံးသူ စိုင်းဝင်းဟန်၏ ညီဖြစ်သူက သျှမ်းသံတော်ဆင့်ကို ပြောသည်။

စိုင်းဝင်းဟန် ပျောက်ဆုံးနေမှုသည် အဆိုပါ ဒေသအတွင်း လှုပ်ရှားနေသည့် စရဖ နှင့် စစ်ကောင်စီတပ်သားတို့ ဖမ်းဆီးထိန်းသိမ်းထားခြင်းဖြစ်ကြောင်းလည်း အဆိုပါ ကျောက်မဲမြို့နယ်မှ အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ကိုယ့်တူကိုယ့်သားလိုဖြစ်နေတော့ ကျနော်တို့လည်း စုံစမ်းကြည့်တာပေါ့နော်၊ နောက်ဆုံးကြားရတဲ့ သတင်း အရဆိုရင် သူထောင်ဝင်စာပို့ပြီးအပြန် ထမင်းဆိုင်မှာ ဝင်နေတုန်း ရဲတချို့က သူ့ကို လာဖမ်းသွားတယ်လို့ ကြား ရပါတယ်၊ စခန်းတွေဘက်က ဆက်သွယ်လာတာ မရှိသေးတော့ အတည်မပြုနိုင်သေးဘူး” ဟု အထက်ပါ အမျိုးသားက ပြောသည်။

ယင်းသတင်းဖြစ်စဥ်နှင့် ပက်သက်ပြီး စိုင်းဝင်းဟန်၏ မိသားစုဝင်များကို မေးမြန်းရာ သတင်းကြားမိရကြောင်း နှင့် အတည်မပြုနိုင်သေးကြောင်း သျှမ်းသံတော်ဆင့်ကို ပြောသည်။

“ကျနော်တို့လည်း ကြားမိသလောက်တော့ ကြားပါတယ်၊ အဖမ်းခံထားရတယ်ဆိုတာကိုပေါ့၊ ကျနော်တို့ အမေ ဆိုရင် အစ်ကိုကြီး (စိုင်းဝင်းဟန်) ပျောက်သွားတယ် ဆိုကတည်းက အိပ်ရာထဲလှဲနေရတယ်၊ အမေ့ကိုလည်း စိတ်ပူနေရသလို အစ်ကိုကြီး အတွက်လည်း ကျနော်တို့ စိတ်ပူနေပါတယ်၊ အစ်ကိုကြီးက ကျနော်တို့ရဲ့ ထောက်တိုင်ပါ” ဟု ၎င်း ညီငယ်က ပြောသည်။

မိခင်ဖြစ်သူနှင့် မိသားစုများကို လုပ်ကိုင်ကျွေးမွေးနေသူ စိုင်းဝင်းဟန် ပျောက်ဆုံးမှုကြောင့် မိသားစု၏ စီးပွားရေး / စားရေးသောက်ရေးများ အခက်အခဲဖြစ်လာနိုင်ကြောင်း သိရသည်။

စိုင်းဝင်းဟန် ပျောက်ဆုံးမှုနှင့် ပက်သက်ပြီး အမှန်တရားနှင့် တရားမျှတမှု ရရှိစေရန်နှင့် အမြန်ဆုံး ဘေးကင်းစွာ ဖြင့် ပြန်တွေ့နိုင်ရေးအတွက် သျှမ်းလူမှုအဖွဲ့အစည်းများနှင့် သက်ဆိုင်ရာများ ကူညီပေးကြရန်လည်း မိသားစုဝင် များမှ တောင်းဆိုထားသည်။

စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် ကျောက်မဲမြို့နယ် အတွင်း၌ စစ်ကောင်စီတပ်သားတို့၏ လက်ချက်ကြောင့် လူငယ်ပျောက်ဆုံးမှုများ၊ စွပ်စွဲ ချက်ဖြင့် ဖမ်းဆီးရိုက်နက်ခံရမှုများ၊ညကြီးအချိန်မတော် နေအိမ်အတွင်း စစ်ဆေးမှုများ ခံရသည့်အပြင် ခိုးဆိုးလုယက်သူတို့၏ ရန်မှလည်း စိုးရိမ်နေရကြောင်း ကျောက်မဲဒေသခံများက ပြောသည်။