သျှမ်းပြည်တောင်ပိုင်း ရွာငံမြို့နယ်အတွင်းရှိ နေအိမ်မီးရှို့ဖျက်ဆီးခံရသည့် ပြည်သူများနှင့် စစ်ဘေးသင့်ပြည်သူ များထံ စားနပ်ရိက္ခာတချို့ ကူညီထောက်ပံ့ရန်သွားသည့် လူမှုကူညီရေးအသင်းများကို စစ်ကောင်စီ စစ်ဆေးရေးဂိတ် အရောက်တွင် နောက်ပြန်လှည့်လာခဲ့ရကြောင်း သတင်းသိရသည်။
အောင်ပန်း – ရွာငံလမ်းမပေါ်မှ ကျုံးကျေးရွာလမ်းခွဲရှိ စစ်ကောင်စီ၏ စစ်ဆေးရေးဂိတ်တွင် စစ်ဆေးမေးမြန်းခြင်း ခံရပြီး ရိက္ခာနှင့်ဆေးဝါးတချို့သယ်ဆောင်လာကြောင်းပြောဆိုသော်လည်း လက်မခံသဖြင့် နောက်ကြောင်း ပြန်လှည့်လာခဲ့ရကြောင်း ကြုံတွေ့ရသည့် ဒေသတွင်းမှ လူမှုကူညီရေး အသင်းဝင်တစ်ဦးက သျှမ်းသံတော်ဆင့်ကို ပြောသည်။
“ကျနော်တို့က ကားနှစ်စီးနဲ့ လူ ၈ ယောက်လာက်ရှိတယ်၊ ဆေးဝါးပစ္စည်းတချို့ရယ် ဆန်ရယ်၊ တခြား ရိက္ခာ ခြောက်တွေ သယ်သွားတာပါ၊ ဒါပေမဲ့ အဲ့ဂိတ်ရောက်တော့ PDF တွေကို သွားပို့ပေးမလို့လား ဆိုပြီးမေးတယ်၊ မဟုတ်ကြောင်း ဒုက္ခရောက်နေတဲ့ ပြည်သူတွေကို သွားပေးဖို့ဆိုတော့လည်း လက်မခံဘူး၊ ရှေ့ဆက်သွား လို့မရတော့ဘူးဆိုလို့ ကျနော်တို့ ပြန်လှည့်လာခဲ့ရတယ်” ဟု ကြုံတွေ့ရသူက သျှမ်းသံတော်ဆင့်ကို ပြောသည်။
စစ်ကောင်စီတပ်သားတို့သည် ရွာငံမြို့နယ်အတွင်းရှိ စစ်ဘေးသင့်ပြည်သူများကို ကူညီရန်သွားသည့် ပရဟိတ လူမှုကူညီရေး အသင်းများကို ဒေသအတွင်းရှိ PDF များထံ သွားရောက်ပို့ဆောင်မည်ဟု ထင်မှတ်ပြီး မပေးဖြတ်တာ ဖြစ်နိုင်ကြောင်း လည်း ၎င်းက ပြောဆိုထားသည်။
ထို့အပြင် လူမှုကူညီရေးအသင်းများ သယ်ဆောင်သွားသည့် စစ်ဘေးသင့် ပြည်သူများအတွက် ရိက္ခာခြောက် တချို့ကို စစ်ဆေးရေးဂိတ်မှ စစ်သားများက ယူဆောင်သွားကြောင်းလည်း သိရသည်။
“ကျနော်တို့ မှတ်ပုံတင်တွေကို တချို့စစ်သားတွေက စစ်နေတဲ့အချိန်မှာ တချို့စစ်သားတွေကျ ကားထဲသယ်လာ တဲ့ ငါးသေတ္တာတို့၊ ခေါက်ဆွဲခြောက်တွေကို ယူနေတာ တွေ့ရတယ်၊ ပြီးတော့ သူတို့ (စကစ) ခွင့်ပြုချက်မရဘဲ ဒီရွာငံဘက်ကို ဘယ်သူမှ ဝင်ထွက်သွားလာလို့မရဘူးဆိုပြီး ကျနော်တို့ကို ခြိမ်းခြောက်တာ” ဟု အသက် ၃၀ ဝန်းကျင် လူမှုကူညီရေးအသင်းဝင် အမျိုးသားတစ်ဦးက သျှမ်းသံတော်ဆင့်ကို ပြောသည်။
လမ်းမကြီး တစ်လျှောက် ရှိနေသည့် စစ်ဆေးရေးဂိတ်စောင့် စစ်ကောင်စီတပ်သားတို့သည် လမ်းသွားလမ်းလာ ပြည်သူများကို ငွေကြေးတောင်းခံခြင်းများ ပြုလုပ်သည့်အပြင် ပရဟိတ နှင့် လူမှုကူညီရေးအသင်းများကိုလည်း တောင်းခံမှုများပြုလုပ်လေ့ရှိကြောင်း သတင်းသိရသည်။
“ကျနော်တို့ ညရေးညတာ အရေးပေါ်လူနာရှိလို့ လမ်းကြောင်းထွက်ရတဲ့အခါ ကိုဗစ် ဆေးစစ်/ဆေးထိုးလက်မှတ် မပါရင် ပိုက်ဆံ ငါးထောင်ပေးရတဲ့အခါရှိတယ်၊ ပြီးတော့သူတို့ချထားတဲ့ သံဆူးကာကိုလည်း ကိုယ်တိုင်ဆင်းဖွင့် ရတာ ရှိတယ်” ဟု အဆိုပါ ဒေသအတွင်းမှ အမည်မဖော်လိုသူ ပရဟိတ လူငယ်တစ်ဦးက ပြောသည်။
ယခု ၂၀၂၂ ခုနှစ် အစောပိုင်းမှ စတင်ကာ ရွာငံမြို့နယ်အတွင်းရှိ ကျေးရွာများကို စစ်ကောင်စီတပ်သားများမှ မကြာခဏ ရှာဖွေဖမ်းဆီးခြင်း၊ ဝင်ရောက်မွှေနှောက်မှုများပြုလုပ်သည့်အတွက် ဒေသခံ ၃၀၀ ကျော် အိုးအိမ်စွန့်ခွာ တိမ်းရှောင်ထွက်ပြေးရသည့်အပြင် ယခု ဧပြီလအတွင်းတွင် အပြစ်မဲ့ဒေသခံရွာသားများ ၁၀ ဦး ထက်မနည်း စွပ်စွဲသတ်ဖြတ်ခြင်းခံရကြောင်းလည်း သိရသည်။
Leave a Comments